គណៈកម្មាធិការជាតិរៀបចំការបោះឆ្នោត (គ.ជ.ប) នឹងទទួលពាក្យសុំចុះឈ្មោះអ្នកសង្កេតការណ៍ជាតិនិងអន្តរជាតិ រួមទាំងភ្នាក់ងារគណបក្សនយោបាយ សម្រាប់ការពិនិត្យនិងការចុះឈ្មោះបោះឆ្នោតឆ្នាំ២០២១ ចាប់ពីថ្ងៃអាទិត្យក្រោយទៅ។
តាមលិខិតជូនដំណឹងចុះថ្ងៃទី៧ ខែកញ្ញានេះ គ.ជ.ប បានលើកឡើងថា ការទទួលពាក្យសុំចុះឈ្មោះអ្នកសង្កេតការណ៍ជាតិ ចាប់ផ្តើមពីថ្ងៃទី១២ ខែកញ្ញា ឆ្នាំ២០២១ រហូតដល់ថ្ងៃទី២ ខែកុម្ភៈ ឆ្នាំ២០២២។
បើតាម គ.ជ.ប សមាគមឬអង្គការមិនមែនរដ្ឋាភិបាលដែលមានបំណងចូលរួមសង្កេតការណ៍ ត្រូវមកយកគំរូពាក្យសុំនៅទីស្តីការ គ.ជ.ប រាល់ម៉ោងធ្វើការ។
ចំណែកការទទួលពាក្យសុំចុះឈ្មោះអ្នកសង្កេតការណ៍អន្តរជាតិ គ.ជ.ប ថានឹងចាប់ផ្តើមពីថ្ងៃទី១២ ខែកញ្ញា ឆ្នាំ២០២១ដូចគ្នា រហូតដល់ថ្ងៃទី៩ ខែកុម្ភៈ ឆ្នាំ២០២២។ មួយវិញទៀត សម្រាប់ភ្នាក់ងារគណបក្សនយោបាយ គ.ជ.ប នឹងទទួលពីថ្ងៃទី៥ ខែតុលា ឆ្នាំ២០២១ ដល់ថ្ងៃទី២ ខែកុម្ភៈ ឆ្នាំ២០២២។
គ.ជ.ប បញ្ជាក់ទៀតថា គណបក្សនយោបាយដែលបានចុះបញ្ជីត្រឹមត្រូវតាមច្បាប់មានសិទ្ធិចាត់តាំងភ្នាក់ងាររបស់ខ្លួនតាមការចាំបាច់ ដើម្បីសង្កេតមើលការពិនិត្យបញ្ជីឈ្មោះនិងការចុះឈ្មោះបោះឆ្នោត នៅតាមសាលាឃុំ-សង្កាត់ និងតាមការិយាល័យចុះឈ្មោះបោះឆ្នោតក្នុងឃុំ-សង្កាត់ដែលកំណត់ដោយ គ.ជ.ប៕
