យ៉ាងហោចណាស់ អ្នកសារព័ត៌មាន៩នាក់ត្រូវកងរាជអាវុធហត្ថខេត្តស្ទឹងត្រែងចាប់ឃាត់ខ្លួន ក្រោយពីម្ចាស់រថយន្តដឹកឈើប្តឹងបកវិញពីបទ«កំហែងយក ឬជំរិតទារប្រាក់»។
ប្រធានមន្ទីរព័ត៌មានខេត្តស្ទឹងត្រែង លោក អ៊ុក ធាវី បានប្រាប់ VOD នៅថ្ងៃពុធនេះថា អ្នកសារព័ត៌មានអនឡាញ៩នាក់ ត្រូវកងរាជអាវុធហត្ថខេត្តចាប់ឃាត់ខ្លួនកាលពីថ្ងៃអង្គារម្សិលមិញ ប៉ុន្តែលោកពុំបានបញ្ជាក់លម្អិតពីស្ថាប័នដែលអ្នកសារព័ត៌មានទាំងនោះធ្វើការបាននៅឡើយទេ។ លោកបន្តថា ការចាប់ឃាត់ខ្លួននេះ ក្រោយពីអ្នកសារព័ត៌មានទាំងនោះបានឃាត់រថយន្តដឹកឈើចំនួន២គ្រឿង ហើយទារលុយ៤ ០០០ដុល្លារ។
តែយ៉ាងណា លោកថា ក្រោយពីទារមិនបានសម្រេច អ្នកសារព័ត៌មានទាំងនោះបានទូរសព្ទប្រាប់កងរាជអាវុធហត្ថប្រចាំខេត្តនេះឱ្យមានវិធានការផ្លូវច្បាប់ ប៉ុន្តែពេលកងកម្លាំងអាវុធហត្ថទៅពិនិត្យរកឃើញថា នៅលើរថយន្តនោះជាប្រភេទឈើដែលរុះពីផ្ទះចាស់ៗដែលពលរដ្ឋលក់ឱ្យ និងមានលិខិតអនុញ្ញាតពីរដ្ឋបាលព្រៃឈើ។
ប្រធានមន្ទីររូបនេះបន្តថា ករណីនេះ ម្ចាស់រថយន្តដឹកឈើបានប្តឹងចោទប្រកាន់ទៅលើអ្នកសារព័ត៌មានទាំងនោះវិញ ពីបទ ឃាត់រថយន្តទុក ដើម្បីជំរិតទារប្រាក់ពី៤ ០០០ដុល្លារ ទៅ៥ ០០០ដុល្លារ និងត្រូវបានកងរាជអាវុធហត្ថខេត្តស្ទឹងត្រែង ចាប់ខ្លួនបានជាបន្តបន្ទាប់។
លោក អ៊ុក ធាវី គូសបញ្ជាក់ថា៖ «អាទារលុយ វាមួយផ្នែកហើយ! តែគាត់ [អ្នកកាសែត] ជាអ្នកប្តឹងមកអាវុធហត្ថ ដល់អ៊ីចឹងទៅ វាត្រូវរឿងហ្នឹង អ្នកឡានដឹកឈើហ្នឹង វាប្តឹងវិញថា ពួកហ្នឹងទារលុយវានិងឃាត់ឡានវាទុកអ៊ីចឹងទៅ។ អាមួយនោះជិះលុចស៊ីស៤៧០ទៀត អ្នកសារព័ត៌មានហ្នឹង»។
បើតាមលោក អ៊ុក ធាវី អ្នកកាសែត២នាក់ក្នុងចំណោម៩នាក់អាចត្រូវបានដោះលែងវិញ ព្រោះពួកគេត្រូវបានចាប់ខ្លួន បញ្ជូនទៅកាន់បញ្ជាការដ្ឋានកងរាជអាវុធហត្ថខេត្តនេះមុនគេ។
មេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី សុំមិនធ្វើអត្ថាធិប្បាយជុំវិញចំណាត់ការចាប់ខ្លួនអ្នកសារព័ត៌មានទាំងនោះទេ ដោយបង្វែរឱ្យសួរទៅកងរាជអាវុធហត្ថលើផ្ទៃប្រទេសវិញ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍ថា មន្ត្រីអាវុធហត្ថខេត្តស្ទឹងត្រែងកំពុងធ្វើការសាកសួរអ្នកសារព័ត៌មានទាំងនោះ និងកសាងសំណុំរឿងបញ្ជូនទៅតុលាការ។
លោកថា៖ «ឃាត់ខ្លួន៧រូប ហើយពាក់ព័ន្ធដើមបណ្តឹងរដ្ឋប្បវេណី ៥រូប ដែលគាត់មកប្តឹង [គាត់ជាប់ចោទពីបទអីបង?] អត់ដឹងទេ! ព្រោះអាវុធហត្ថមិនមានសិទ្ធិចោទទេ គ្រាន់តែកសាងសំណុំរឿងទៅឱ្យអយ្យការទេ [អ៊ីចឹងគេសង្ស័យលើអីបានចាប់?] មកពីពួកគាត់ប្រព្រឹត្តអំពើល្មើសច្បាប់»។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យក្រសួងព័ត៌មាន លោក មាស សុភ័ណ្ឌ បានទេ នៅថ្ងៃពុធនេះ។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី យល់ថា ការដែលអ្នកសារព័ត៌មាន ទៅទារប្រាក់ពីបុគ្គលណាមួយដែលពួកគេមើលឃើញថាមានបទល្មើស ជាកំហុសវិជ្ជាជីវៈ ដែលករណីនេះ សមត្ថកិច្ចគួរយកច្បាប់ស្តីពីរបបសារព័ត៌មានមកអនុវត្ត មិនមែនចោទប្រកាន់ពីបទព្រហ្មទណ្ឌនោះទេ។
មួយវិញទៀត លោកថា សមត្ថកិច្ចក៏ត្រូវបង្ហាញតម្លាភាពផងដែរ ចំពោះការស៊ើបអង្កេតណាមួយដែលបញ្ជាក់ថា ភាគីដើមបណ្តឹងពិតជាមិនជាប់ពាក់ព័ន្ធនឹងបទល្មើសដូចអ្នកកាសែតរាយការណ៍ ដើម្បីកុំឱ្យមានការរិះគន់ថា ចំណាត់ការនេះមានភាពលម្អៀង និងមិនបានលើកទឹកចិត្តដល់អ្នកចូលរួមលាតត្រដាងបទល្មើសនានាដែលកំពុងកើតឡើងនៅក្នុងខេត្តនេះ។
លោកថា៖ «ព្រោះយើងដឹងហើយថា កិច្ចការងាររបស់អ្នកសារព័ត៌មាន លើកលែងតែគាត់ទៅប្រព្រឹត្តកំហុសព្រហ្មទណ្ឌ ទៅគំរាមកំហែង ឬមួយក៏ទៅបង្កឱ្យមានរបួសស្នាម ឬក៏សម្លាប់គេ អាហ្នឹងបានវាចូលទៅក្នុងបទល្មើសព្រហ្មទណ្ឌ។ តែបើនៅក្នុងអ្នកសារព័ត៌មានមានកំហុសឆ្លងផ្នែកវិជ្ជាជីវៈតិចតួច ខ្ញុំគិតថា វាគួរតែត្រូវបានសម្របសម្រួលនិងដោះស្រាយក្នុងក្របខណ្ឌវិជ្ជាជីវៈ»។
កាលពីថ្ងៃទី៤ ខែមិថុនា ឆ្នាំ២០២១ អ្នកសារព័ត៌មានអនឡាញចំនួន៨នាក់ ក្នុងនោះមានទាំងស្ត្រី២នាក់ផង ត្រូវបានសមត្ថកិច្ចខេត្តព្រះវិហារ ចោទពីបទ «កំហែងយក» បន្ទាប់ពីពួកគេរងការចោទថា បានទារប្រាក់ក្នុងម្នាក់ចំនួន១០០ដុល្លារ ពីម្ចាស់សិប្បកម្មឈើមួយកន្លែងនៅចំណុចអូរទីទុយ ភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ។ ក្រោយមក តុលាការខេត្តនេះបង្គាប់ឱ្យឃុំខ្លួនបណ្តោះអាសន្ននៅពន្ធនាគារ ប៉ុន្តែសមត្ថកិច្ចមិនបានស៊ើបអង្កេតលើម្ចាស់សិប្បកម្មឈើនោះទេ។
ក្រោយមកទៀត នៅថ្ងៃទី២២ ខែមិថុនា ឆ្នាំ២០២១ អ្នកកាសែតអនឡាញ៤នាក់ទៀតត្រូវបានតុលាការខេត្តកណ្តាល ចោទពីបទ «កំហែងយក» ពាក់ព័ន្ធនឹងទារប្រាក់១០០ដុល្លារពីម្ចាស់ហាងកាហ្វេមួយកន្លែងស្ថិតនៅឃុំព្រែកអញ្ចាញ ស្រុកមុខកំពូល ជាថ្នូរនឹងមិនឡាយផ្ទាល់រឿងដែលម្ចាស់ហាងនោះបើកល្បែងជល់មាន់ខុសច្បាប់តាមអនឡាញ។ ប៉ុន្តែករណីក្រោយនេះ ម្ចាស់ហាងកាហ្វេត្រូវបានចាប់ខ្លួននិងត្រូវបានតុលាការផ្តន្ទាទោសផងដែរ៕