ពលករខ្មែរនៅថៃមួយចំនួនចាប់ផ្តើមមានការងារធ្វើឡើងវិញ បន្ទាប់ពីស្ថានភាពឆ្លងរាលដាលនៃជំងឺកូវីដ-១៩ក្នុងប្រទេសមួយនេះចាប់ផ្តើមថយចុះកាលពីដើមខែកញ្ញា ប៉ុន្តែពួកគេនៅតែជួបបញ្ហាខ្វះខាតផ្នែកជីវភាព និងបារម្ភខ្លាចឆ្លងជំងឺផ្លូវដង្ហើមថ្មីពីកន្លែងការងារ។
តាមរបាយការណ៍ពីក្រសួងសុខាភិបាលថៃ ចាប់ពីពាក់កណ្តាលខែសីហាមក ករណីវិជ្ជមានកូវីដ-១៩រកឃើញថ្មីប្រចាំថ្ងៃក្នុងប្រទេសនេះ បានធ្លាក់ចុះជាបន្តបន្ទាប់ពីជាង២០ ០០០ករណី មកនៅក្រោម១៣ ០០០ករណី គិតត្រឹមថ្ងៃទី៨ ខែកញ្ញា ឆ្នាំ២០២១។
ពលករខ្មែរជាមេការសំណង់មួយរូបនៅខេត្តណាខនប៉ាធំ លោក មិត្ត សារ៉ា ប្រាប់ វីអូឌី នៅថ្ងៃទី៨ ខែកញ្ញានេះថា លោកនិងពលករខ្មែរមួយចំនួនទៀតទើបចាប់ផ្តើមមានការងារធ្វើខ្លះៗវិញកាលពីដើមខែកញ្ញា ក្រោយរង់ចាំអស់ជិត៥ខែ ដោយសារបញ្ហារាតត្បាតនៃជំងឺកូវីដ-១៩ប្រភេទ ដែលតា។
យ៉ាងណា បុរសដែលមានកូន៤នាក់ មានស្រុកកំណើតក្នុងខេត្តសៀមរាប រូបនេះ បន្ថែមថា រូបលោកនៅតែប្រឈមបញ្ហាខ្វះខាតផ្នែកជីវភាព និងមិនទាន់អាចរកលុយសន្សំផ្ញើមកផ្គត់ផ្គង់ក្រុមគ្រួសារនៅស្រុកកំណើតបាននៅឡើយ ដោយសារការងារមិនទាន់មានពេញលេញដូចដើម។
លោក មិត្ត សារ៉ា និយាយថា៖ «ខែមុននោះ គឺយ៉ាប់គ្រាន់មែនទែន! ប៉ុន្តែក្នុងរយៈពេល១ខែនេះ ដែលបានធ្វើការខ្លះហើយ ក៏អាចថាផ្គត់ផ្គង់ទៅមុខបានមួយខែទៀត […] បើសិនជាថៅកែគាត់ឆាប់បានការងារថ្មី ឬក៏យ៉ាងណានោះ។ អាចថាបើបានការងារថ្មី ក៏អាចចាប់ផ្តើមធ្វើ OK ហើយតើ! គាត់ឆ្លើយថាបានហើយ»។
ពលករផ្នែកសាងសង់មួយរូបទៀតនៅខេត្តណាខនប៉ាធំ ឈ្មោះ ហេង ស្រីណុប បានឱ្យដឹងថា អ្នកស្រីនិងស្វាមីរកការងារធ្វើនៅក្រុមហ៊ុនសំណង់ថ្មីបានហើយ បន្ទាប់ពីពួកគាត់ត្រូវដើររកត្រីនិងខ្ចៅខ្ចង ដើម្បីលក់ដូរដោះស្រាយបញ្ហាជីវភាពប្រចាំថ្ងៃ អំឡុងពេលគ្មានការងារធ្វើរយៈពេលជិត៤ខែ។ ស្រី្តវ័យ២៦ឆ្នាំដែលចំណាកស្រុកទៅធ្វើការនៅថៃអស់រយៈពេល៣ឆ្នាំមកនេះ បន្តថា អ្នកស្រីលែងមានបញ្ហាទីទ័លផ្នែកជីវភាពទៀតហើយ។
អ្នកស្រី ហេង ស្រីណុប និយាយថា៖ «បានហើយបង បើអ្នកឯណោះគេនៅ។ គ្មានអ្នកណាបានធ្វើការទេ អ្នកឯណោះនោះនៅដេក។ ខ្ញុំស៊ូអត់បាន ក៏សុំគេចេញ»។
យ៉ាងណា ពលករខ្មែរមួយរូបធ្វើការនៅរោងចក្រកែច្នៃឈើក្នុងក្រុងបាងកក លោក កៅ យឺត ឱ្យដឹងថា ស្ថានភាពការងាររបស់លោកនៅតែមិនមានភាពល្អប្រសើរនៅឡើយ។ លោកថា ជួនកាលលោកត្រូវសម្រាកនៅផ្ទះ ហើយត្រូវធ្វើតេស្តសំណាក១សប្តាហ៍ម្តង។ លោកបន្ថែមថា នៅកន្លែងការងាររបស់លោកនៅតែរកឃើញអ្នកវិជ្ជមានជំងឺកូវីដ-១៩ជាហូរហែដដែល។
លោក កៅ យឺត និយាយថា៖ «ការងារ ធ្វើខានៗ ដូចតែគ្នាហ្នឹង! វាកូវីដផង ជួនកាលទៅ មួយអាទិត្យចាក់ច្រមុះម្តងអ៊ីចឹងទៅ។ ធ្វើខានៗ ចង់តែទៅផ្ទះអីដែរ តែបើទៅខ្មែរ មិនដឹងធ្វើអី ធ្លាប់នៅថៃអ៊ីចឹង»។
រដ្ឋាភិបាលកម្ពុជាបានសម្រេចបិទខ្ទប់ច្រកព្រំដែនគោកជាមួយប្រទេសថៃរយៈពេល២សប្តាហ៍ ចាប់ពីថ្ងៃទី៣១ ខែកក្កដា ដល់ថ្ងៃទី១៣ ខែសីហា ឆ្នាំ២០២១ ដើម្បីទប់ស្កាត់លំហូរពលករខ្មែរត្រឡប់ពីប្រទេសក្បែរខាងមួយនេះ ដោយសារបញ្ហាបាត់បង់ការងារ និងបារម្ភខ្លាចឆ្លងជំងឺកូវីដ-១៩ប្រភេទថ្មីដែលចាប់ផ្ទុះឡើងពីខែឧសភា។
បើតាមរបាយការណ៍ពីអង្គការអន្តរជាតិទេសន្តប្រវេសន៍ប្រចាំកម្ពុជា ចេញផ្សាយនៅថ្ងៃនេះ បានឱ្យដឹងថា ពលករខ្មែរប្រមាណជាង២សែន៣ម៉ឺននាក់បានវិលត្រឡប់ពីប្រទេសថៃ ចាប់ពីខែមីនា ឆ្នាំ២០២០ ក្នុងនោះមានជិត១ម៉ឺន៧ពាន់នាក់ បានសម្រុកមកវិញក្នុងខែសីហា បន្ទាប់ពីព្រំដែនត្រូវបានបើកឡើងវិញ។
យ៉ាងណា អ្នកនាំពាក្យរដ្ឋបាលខេត្តឧត្ដរមានជ័យ លោក ឌី រ៉ាឌូ ឱ្យដឹងថា ចាប់តាំងពីដើមខែកញ្ញាមក លំហូរពលករពីប្រទេសថៃតាមច្រកព្រំដែនអន្តរជាតិអូរស្មាច់បានធ្លាក់ចុះជាមធ្យមមកនៅត្រឹមប្រមាណ១០០នាក់ក្នុងមួយថ្ងៃ ហើយក្នុងនោះ ករណីឆ្លងក៏មានការថមថយផងដែរ។
លោកមានប្រសាសន៍ថា៖ «ពេលដែលយើងទើបនឹងបើកថ្មីៗ គឺថា ពលករចូលរង្វង់៣០០នាក់ជាង។ ប៉ុន្តែដើមខែកញ្ញានេះ យើងពិនិត្យឃើញមាននៅក្នុងរង្វង់១០០នាក់ទេ ហើយការឆ្លងកូវីដ-១៩ ដែលមន្រ្តីសុខាភិបាលយើងនៅព្រំដែនពិនិត្យលើពួកគាត់ហ្នឹង ក៏ឃើញថាមានការធ្លាក់ចុះគួរឱ្យកត់សម្គាល់ដែរ ថាក្នុងចំណោមពលករដែលត្រឡប់មកវិញតាំងពីដើមខែកញ្ញានេះ គឺក្នុងរង្វង់ពី១០នាក់ទៅ២០នាក់»។
បើតាមប្រភពពីក្រសួងការបរទេសកម្ពុជា ពលករខ្មែរប្រមាណ១លាននាក់កំពុងស្នាក់នៅនិងធ្វើការនៅក្នុងប្រទេសថៃ ខណៈតួលេខនេះគឺទាបជាងរបាយការណ៍ពីអង្គការ«សង់ត្រាល់» ដែលថា ពលករខ្មែរចំណាកស្រុកទៅធ្វើការនៅក្នុងប្រទេសនេះទាំងស្របច្បាប់និងមិនស្របច្បាប់ គឺមានប្រមាណ១លាន៦សែននាក់៕
