រដ្ឋាភិបាលដាក់ចេញគោលនយោបាយ «អក្ខរកម្មជាមូលដ្ឋានគ្រឹះនៃការសិក្សាពេញមួយជីវិត» ដើម្បីបណ្តុះបណ្តាលដល់យុវជនកម្មករនៅក្នុងនិងក្រៅប្រទេស រួមទាំងអ្នកជាប់ឃុំក្នុងពន្ធនាគារ បានសិក្សាពីចំណេះជំនាញក្នុងការលើកស្ទួយជីវភាពឱ្យបានកាន់តែប្រសើរ នៅពេលកម្ពុជាស្តារឡើងវិញនូវសង្គម-សេដ្ឋកិច្ច បន្ទាប់ពីវិបត្តិកូវីដ-១៩ផុតរលត់ទៅ។
ក្នុងសារលិខិតរបស់លោកនាយករដ្ឋមន្ត្រី ហ៊ុន សែន បានលើកឡើងថា ក្នុងឱកាសនៃការប្រារព្ធ «ទិវាអក្ខរកម្មជាតិ ៨កញ្ញា ២០២១» ថារដ្ឋាភិបាលកម្ពុជាយកចិត្តទុកដាក់លើការអភិវឌ្ឍធនធានមនុស្ស តាមរយៈការផ្តល់ជូនយុវជនគ្រប់រូបនូវការបណ្តុះបណ្តាលវិជ្ជាជីវៈឱ្យបាននូវ «យុវជនម្នាក់មានជំនាញមួយយ៉ាងតិចប្រចាំជីវិត»។
លោកបន្តថា ចំណែកសិស្សានុសិស្ស និស្សិត កម្មករ-កម្មការិនីនៅក្នុងនិងក្រៅប្រទេស រួមទាំងអ្នកជាប់ឃុំឃាំងនៅតាមមណ្ឌលអប់រំកែប្រែនិងពន្ធនាគារនៅតាមរាជធានី-ខេត្តទាំងអស់ ក៏បានរៀនសូត្រនៅក្នុងកម្មវិធីថ្នាក់ «អក្ខរកម្មជាមូលដ្ឋានគ្រឹះនៃការសិក្សាពេញមួយជីវិត» ដើម្បីជំរុញប្រជាពលរដ្ឋកម្ពុជាគ្រប់រូបឱ្យទទួលបានឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង គ្រប់មធ្យោបាយ ហើយទទួលបាននូវចំណេះដឹង ជំនាញ មុខរបរ ចេះអាន ចេះសរសេរ ចេះគិតលេខ និងចេះដោះស្រាយបញ្ហាដែលពាក់ព័ន្ធនឹងជីវភាពរស់នៅ បន្ទាប់ពីទទួលបានសេរីភាពនិងការធ្វើសមាហរណកម្មទៅក្នុងសង្គមវិញ និងក្រោយពេលដែលកម្ពុជាស្តារឡើងវិញនូវសង្គម-សេដ្ឋកិច្ច បន្ទាប់ពីវិបត្តិកូវីដ-១៩ផុតរលត់ទៅ។
បន្ថែមពីនេះ រដ្ឋាភិបាលក៏បានជំរុញទៅក្រសួងស្ថាប័នពាក់ព័ន្ធ ត្រូវរៀបចំគោលនយោបាយក្របខណ្ឌច្បាប់ លិខិតបទដ្ឋាន និងយន្តការចាំបាច់ ដើម្បីដឹកនាំ គ្រប់គ្រង និងអនុវត្តឱ្យមានប្រសិទ្ធភាព គុណភាព ធានាបាននូវការសិក្សាពេញមួយជីវិតសម្រាប់ប្រជាពលរដ្ឋគ្រប់រូប។
ចំណែកអ្នកដែលបោះបង់ការសិក្សាឬមិនបានរៀនសូត្រ រដ្ឋាភិបាលប្រាប់ទៅដៃគូអភិវឌ្ឍន៍ អង្គការមិនមែនរដ្ឋាភិបាល សហគ្រាស ម្ចាស់រោងចក្រ និងអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់គាំទ្រឱ្យបានខ្លាំងក្លាថែមទៀត តាមរយៈការលើកទឹកចិត្តដល់ពលរដ្ឋទាំងនោះឱ្យទទួលបានការអប់រំ ការសិក្សារៀនសូត្រ ប្រកបដោយសមធម៌ ដើម្បីទទួលបាលផលវិជ្ជមានទាំងអស់គ្នា ទើបធ្វើឱ្យសង្គមកម្ពុជារីកចម្រើនបន្ថែមទៀតនាពេលខាងមុខនេះ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន មានប្រសាសន៍ថា កម្មវិធីថ្នាក់ «អក្ខរកម្មជាមូលដ្ឋានគ្រឹះនៃការសិក្សាពេញមួយជីវិត» ដែលរដ្ឋាភិបាលដាក់ចេញជាគោលនយោបាយអនុវត្តនេះ មានភាពល្អប្រសើរខ្លាំង ដើម្បីជួយដល់ប្រជាពលរដ្ឋគ្រប់រូបទទួលបានការអប់រំ ចំណេះ ជំនាញពិតប្រាកដ ដើម្បីងាយស្រួលរកការងារនិងទទួលបានប្រាក់ទ្រទ្រង់ជីវភាពគ្រួសារ និងធ្វើឱ្យសង្គមសេដ្ឋកិច្ចរីកចម្រើនជាដើម។
លោកបញ្ជាក់ថា ក្រសួងក៏បានដាក់ចេញនូវការបង្រៀនតាមបែបបច្ចេកវិទ្យាឌីជីថលបន្ថែមទៀត ស្របតាមបរិបទកូវីដ-១៩កំពុងរីករាលដាល ដើម្បីឱ្យកម្មវិធីថ្នាក់ «អក្ខរកម្មជាមូលដ្ឋានគ្រឹះនៃការសិក្សាពេញមួយជីវិត» ទទួលបានផលវិជ្ជមានខ្ពស់ផងដែរ។
លោកមានប្រសាសន៍ថា៖ «នៅក្នុងសតវត្សរ៍ទី២១នេះ គឺយើងចូលទៅដល់ដំណាក់កាលថ្មីមួយទៀត ដែលយើងហៅថា អក្ខរកម្មឌីជីថល។ អក្ខរកម្មឌីជីថលនេះ ក៏មានអក្ខរកម្មប្រពៃណីដែលយើងធ្លាប់អនុវត្តរួចមកហើយ ក៏ប៉ុន្តែក៏ទាមទារឱ្យអ្នកសិក្សាត្រូវប្រើប្រាស់បច្ចេកវិទ្យា រៀននូវបច្ចេកវិទ្យា ហើយផ្តល់នូវសេវាអប់រំក៏ត្រូវរៀបចំឱ្យប្រព័ន្ធឌីជីថល ដើម្បីឆ្លើយតបទៅនឹងសភាពការណ៍ថ្មី ដែលទាមទារឱ្យប្រើប្រាស់នូវបច្ចេកវិទ្យា ដើម្បីផ្តល់ឱកាសអប់រំឱ្យយុវជនជំនាន់ក្រោយយើង»។
លោកបន្ថែមថា៖ «ជាការពិតណាស់ បើសិនជាយើងមានតែអក្ខរកម្មប្រពៃណី គឺការរកការងារធ្វើនៅក្នុងយុគសម័យថ្មីនេះក៏ពិបាក។ ដូច្នេះហើយ ក្រសួងអប់រំ យុវជន និងកីឡា ក៏បានដាក់ចេញជាគោលដៅថា ប្រែក្លាយមណ្ឌលសិក្សាសហគមន៍មួយចំនួនឱ្យទៅជាមជ្ឈមណ្ឌលសិក្សាពេញមួយជីវិត ជាពិសេសត្រូវបញ្ចូលនូវបច្ចេកវិទ្យា ដើម្បីអាចឱ្យយុវជនប្រើប្រាស់នូវបច្ចេកវិទ្យាបាន ក្នុងគោលដៅពង្រឹងនូវឱកាសទទួលបានូវការងារសម្រាប់យុវជនយើង»។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី មានប្រសាសន៍ថា ការដាក់ចេញគោលនយោបាយ «អក្ខរកម្មជាមូលដ្ឋានគ្រឹះនៃការសិក្សាពេញមួយជីវិត» របស់រដ្ឋាភិបាលនៅអំឡុងពេលជួបវិបត្តិកូវីដ-១៩ ទំនងជាមិនមានប្រសិទ្ធភាពនោះទេ ដោយសារពលរដ្ឋគ្រប់រូបកំពុងជួបបញ្ហាប្រឈមនឹងជីវភាព សេដ្ឋកិច្ចគ្រួសារ ហើយពួកគេប្រហែលជាមិនមានពេលសម្រាប់សិក្សាចំណេះជំនាញនោះទេ។
ទោះជាបែបនេះក្តី លោកស្រីផ្តល់ជាអនុសាសន៍ថា ដើម្បីឱ្យគោលនយោបាយនេះទទួលបានផលវិជ្ជមានខ្ពស់ លុះត្រាតែរដ្ឋាភិបាលបង្កើតការងារនៅក្នុងស្រុក រកការងារឱ្យពលរដ្ឋខ្លួនឯងធ្វើឱ្យបានគ្រប់គ្នា និងផ្តល់ប្រាក់ខែខ្ពស់ ជាដើម ។
លោកស្រីផ្តល់ជាអនុសាសន៍ថា៖ «បើសិនជាបង្កើតជាមុខរបរ បង្កើតជាកន្លែងការងារឱ្យគាត់ធ្វើនៅក្នុងស្រុក មានប្រាក់ចំណូលច្រើន អាចរស់បាន នេះជាកត្តាមួយដ៏សំខាន់ ហើយអាចជួយដល់ប្រទេសជាតិយើង ក៏ដូចជាក្រុមប្រជាពលរដ្ឋទាំងអស់ អត់ឱ្យគាត់មានចំណាកស្រុក»។
ក្នុងរបាយការណ៍ដែលចេញផ្សាយលើទំព័រហ្វេសប៊ុកអង្គការសហប្រជាជាតិនៅកម្ពុជា កាលពីថ្ងៃទី២១ ខែកក្កដា ឆ្នាំ២០២១ ឱ្យដឹងថា មុនពេលមានការឆ្លងរាលដាលជំងឺកូវីដ-១៩ កម្ពុជាបានសម្រេចគោលដៅអភិវឌ្ឍន៍ប្រកបដោយចីរភាព ឬ SDG ទី៤ ស្តីពីការរៀនសូត្រប្រកបដោយគុណភាពនិងចីរភាព។ ប៉ុន្តែចាប់តាំងពីខែមីនា ឆ្នាំ២០២០ ដែលមានការឆ្លងរីករាលដាលនៃជំងឺកូវីដ-១៩មក សិស្សចំនួន៣,២លាននាក់ បានរងផលប៉ះពាល់ការរៀនសូត្រ បន្ទាប់ពីរដ្ឋាភិបាលកម្ពុជាបានបិទសាលារៀនរយៈពេលជាង២០០ថ្ងៃ។
អង្គការសហប្រជាជាតិ បន្តថា ការប៉ះពាល់នេះបានជំរុញឱ្យវិស័យអប់រំមានការធ្លាក់ចុះយ៉ាងខ្លាំងក្នុងការអភិវឌ្ឍមនុស្ស (HDI) នៅកម្ពុជា សម្រាប់ឆ្នាំ២០២០ ដោយធ្លាក់ចុះជិត៤ភាគរយ (៣,៩៣%) បើប្រៀបធៀបពីឆ្នាំ២០១៩ ឬស្មើនឹងការលុបបំបាត់រាល់ការរីកចម្រើនលើវិស័យអប់រំដែលបានធ្វើក្នុងរយៈពេល៤ឆ្នាំកន្លងមក។
ក្រសួងអប់រំ យុវជន និងកីឡា បានចេញសេចក្តីណែនាំស្ដីពីការបង្រៀននិងរៀនពីចម្ងាយនិងតាមប្រព័ន្ធអេឡិចត្រូនិចក្នុងឆ្នាំសិក្សា២០២០-២០២១ ទាំងគ្រឹះស្ថានបឋមសិក្សា និងមធ្យមសិក្សាសាធារណៈ ព្រមទាំងសម្រាប់គ្រឹះស្ថានសិក្សាឯកជន ខណៈព្រឹត្តិការណ៍«សហគមន៍២០កុម្ភៈ» នៅមិនទាន់បញ្ចប់នៅឡើយ៕
