ក្រុមសហជីពបារម្ភពីការរកឃើញជាបន្តបន្ទាប់អំពីករណីឆ្លងជំងឺកូវីដ-១៩ក្នុងចំណោមកម្មកររោងចក្រ សង្ស័យពាក់ព័ន្ធប្រភេទបំប្លែងថ្មី ដែលតា ដែលអាចនឹងផ្ទុះការចម្លងក្នុងទ្រង់ទ្រាយធំសារជាថ្មី បើភាគីពាក់ព័ន្ធមិនមានវិធានការឆ្លើយតបនិងចូលរួមសហការឱ្យបានម៉ឺងម៉ាត់។
ការបារម្ភនេះធ្វើឡើងស្របពេលរោងចក្រកាត់ដេរក្នុងរាជធានីភ្នំពេញ ត្រូវបានរកឃើញករណីវិជ្ជមានកូវីដ-១៩ សង្ស័យពាក់ព័ន្ធវីរុសបំប្លែងថ្មីប្រភេទ “ដែលតា” ជាបន្តបន្ទាប់ ខណៈក្រសួងសុខាភិបាលប្រកាសនៅថ្ងៃម្សិលមិញ ពីការរកឃើញករណីឆ្លងជំងឺកូវីដ-១៩បំប្លែងថ្មីនេះ ជិត៧០០ករណីថ្មីបន្ថែមទៀត ដែលធ្វើឱ្យតួលេខឆ្លងសរុបកើនដល់ជាង៣ ០០០ករណី (៣ ៣២៣នាក់)។
ប្រធានសហព័ន្ធសហជីពជាតិកម្ពុជា លោក ហ្វា សាលី មើលឃើញថា វីរុសបំប្លែងថ្មីកំពុងរាលដាលចូលដល់សហគមន៍រោងចក្រកាត់ដេរ ដែលជាសញ្ញាណមួយគួរឱ្យព្រួយបារម្ភ។ លោកថា ភាគីពាក់ព័ន្ធ ជាពិសេសក្រសួងសុខាភិបាលនិងអាជ្ញាធរដែនដី ត្រូវរួមសហការគ្នាចាត់វិធានការបង្ការនិងទប់ស្កាត់ឱ្យបានទាន់ពេលនិងម៉ឺងម៉ាត់ ដើម្បីបញ្ចៀសការផ្ទុះការចម្លងក្នុងទ្រង់ទ្រាយធំសារជាថ្មី។
យ៉ាងណា លោកបន្ថែមថា ក្រសួងសុខាភិបាលគឺជាភាគីដែលមានសិទ្ធិក្នុងការសម្រេចថា ត្រូវតម្រូវឱ្យរោងចក្រណាត្រូវផ្អាក ឬមិនត្រូវផ្អាកការងារបណ្តោះអាសន្ន ឬត្រូវបញ្ជូនអ្នកពាក់ព័ន្ធចំនួនប៉ុន្មានឱ្យធ្វើចត្តាឡីស័ក ខណៈអាជ្ញាធរដែនដីមានតួនាទីសំខាន់ក្នុងការត្រួតពិនិត្យការអនុវត្តរបស់ភាគីពាក់ព័ន្ធទៅតាមការណែនាំរបស់មន្រ្តីក្រសួងសុខាភិបាល។
លោក ហ្វា សាលី មានប្រសាសន៍បន្ថែមថា៖ «វាអាចនឹងធ្ងន់ធ្ងរ អាចនឹងគ្រប់គ្រងលែងបាន ហើយបើសិនជាយើងអាចគ្រប់គ្រងបានទាន់ពេលវេលា នោះរោងចក្រអាចប្រកបដោយអចិន្រ្តៃយ៍ទៅមុខទៀត។ តែបើយើងធ្វេសប្រហែស អាចចម្លងតៗគ្នា អ៊ីចឹងទៅពីរោងចក្រមួយទៅរោងចក្រមួយ នោះវាជាផលលំបាកខ្លាំងណាស់ ហើយយើងមានការព្រួយបារម្ភ ដោយសារតែដែលតានេះបានហើបឡើងវិញនៅតាមបណ្តារោងចក្រ»។
វីអូឌី មិនអាចទាក់ទងសុំការអធិប្បាយពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន និងអភិបាលរងរាជធានីភ្នំពេញ លោក កើត ឆែ បានទេ នៅថ្ងៃទី៩ ខែកញ្ញា ឆ្នាំ២០២១នេះ។
យ៉ាងណា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ថ្លែងឱ្យដឹងតាមប្រព័ន្ធ Telegram ថា ចំពោះករណីរកឃើញមានវិជ្ជមានជំងឺកូវីដ-១៩ ក្នុងចំណោមកម្មករនិយោជិតនៅតាមរោងចក្រ ទោះជាប្រភេទបំប្លែងថ្មីក្តី គឺត្រូវអនុវត្តតាមវិធានការបញ្ជូនអ្នកជំងឺទៅព្យាបាល។ លោកបញ្ជាក់ថា សម្រាប់ការសម្រេចផ្អាកឬមិនផ្អាកប្រតិបត្តិការរោងចក្រជាបណ្តោះអាសន្ន អាស្រ័យទៅលើកម្រិតហានិភ័យនៃការចម្លង។
លោក ហេង សួរ បានលើកឡើងថា៖ «អនុវត្តតាមការវាយតម្លៃកម្រិតហានិភ័យ និងសម្រេចរបស់មន្ត្រីមានសមត្ថកិច្ច»។
តាមសេចក្តីប្រកាសរបស់អនុគណៈកម្មការស្រាវជ្រាវជំងឺកូវីដ-១៩ គិតចាប់ពីចុងខែសីហាមក អាជ្ញាធរបានរកឃើញរោងចក្រក្នុងរាជធានីភ្នំពេញចំនួន៣ រួមមាន រោងចក្រ Top Summit, ស៊ីន ហាវ ស៊ុន ខេមបូឌា, និងរោងចក្រ ជីអេធី មានករណីឆ្លងកូវីដ-១៩ សរុប៤៥ករណី ក្នុងចំណោមកម្មករ-កម្មការិនីជាង៦ ០០០នាក់ដែលសង្ស័យជាប់ពាក់ព័ន្ធនឹងវីរុសដែលតា។
ពាក់ព័ន្ធបញ្ហានេះ ប្រធានសហព័ន្ធសហជីពកម្ពុជា (CATU) លោកស្រី យ៉ាង សោភ័ណ្ឌ ឱ្យដឹងថា អ្នកស្រីបានទទួលព័ត៌មានពីសមាជិកមូលដ្ឋាននៅរោងចក្រ ជីអេធី មកថា ពិតជាមានករណីពាក់ព័ន្ធឆ្លងវីរុសបំប្លែងថ្មី “ដែលតា” ពិតមែន តែភាគីថៅកែមិនទាន់មានចំណាត់ការយ៉ាងណានៅឡើយ។
អ្នកស្រីមានប្រសាសន៍ថា៖ «ឥលូវហ្នឹងកំពុងតែពិនិត្យកម្មករនៅឡើយ ហើយបើតាមព័ត៌មានក្រៅផ្លូវការ ដូចជារកឃើញកម្មករនៅហ្នឹង ៤នាក់ហើយដែលបានឆ្លង។ ប៉ុន្តែគ្រាន់តែព័ត៌មាននេះមិនទាន់ពិត១០០ភាគរយ ថាយ៉ាងម៉េចទេ! យើងកំពុងតែតាមដានរឿងហ្នឹងដែរ ហើយក្រុមហ៊ុនមិនទាន់មានវិធានការចេញជាមធ្យោបាយមួយណាឱ្យកម្មករសម្រាកឬក៏អត់ឱ្យសម្រាកទេ»។
បើតាមក្រសួងសុខាភិបាល គិតត្រឹមព្រឹកថ្ងៃព្រហស្បតិ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួនជិត១០ម៉ឺននាក់ (៩៧ ៥២៤នាក់) ក្នុងនោះ អ្នកជំងឺព្យាបាលជាសះស្បើយចំនួនជាង៩ម៉ឺននាក់ (៩២ ៤៩៥នាក់) និងករណីស្លាប់កើនដល់ចំនួនជាង២ពាន់នាក់ (២ ០០៧នាក់)៕
