អង្គការចលនាដើម្បីសុខភាពកម្ពុជា (CMH) គាំទ្រចំណាត់ការរបស់ក្រសួងសុខាភិបាល ដែលតម្រូវឱ្យក្រុមហ៊ុនថ្នាំជក់ បញ្ឈប់ជាបន្ទាន់នូវការឧបត្ថម្ភជាសម្ភារផ្សេងៗ ក្នុងន័យផ្សព្វផ្សាយផលិតផលថ្នាំជក់របស់ខ្លួនដល់ក្រសួងស្ថាប័នឬរដ្ឋបាលថ្នាក់ក្រោមជាតិ ដែលសកម្មភាពនេះជាការល្មើសទៅនឹងច្បាប់ស្តីពីការត្រួតពិនិត្យផលិតផលថ្នាំជក់។
សេចក្តីប្រកាសព័ត៌មានរបស់អង្គការចលនាដើម្បីសុខភាពកម្ពុជា ចេញផ្សាយនៅថ្ងៃទី១០ ខែកញ្ញានេះ បានលើកឡើងថា កាលពីថ្ងៃទី០៨ ខែសីហាថ្មីៗនេះ មន្ត្រីក្រសួងសុខាភិបាលបានស្នើសុំការសហការពីក្រសួងនិងស្ថាប័នពាក់ព័ន្ធទាំងថ្នាក់ជាតិនិងថ្នាក់ក្រោមជាតិទាំងអស់ មិនត្រូវទទួលយកជំនួយឧបត្ថម្ភពីក្រុមហ៊ុនថ្នាំជក់ដែលមានបង្ហាញពីឈ្មោះផលិតផល ឬឈ្មោះក្រុមហ៊ុនផលិតផលថ្នាំជក់នោះទេ ដោយហេតុថា ការឧបត្ថម្ភនេះមិនមែនជាកិច្ចការសប្បុរសធម៌ដែលចូលរួមចំណែកជួយសង្គមនោះឡើយ។
សេចក្តីប្រកាសព័ត៌មានដដែលបានស្រង់ប្រសាសន៍មន្ត្រីរូបនេះបន្ថែមថា ផ្ទុយទៅវិញ ទង្វើទាំងនេះគឺជាការផ្សព្វផ្សាយក្នុងគោលបំណងទាក់ទាញការចាប់អារម្មណ៍ និងឆ្លៀតឱកាសផ្សព្វផ្សាយលើកតម្កើងកេរិ៍្តឈ្មោះ និងដើម្បីផលប្រយោជន៍ក្រុមហ៊ុនថ្នាំជក់តែប៉ុណ្ណោះ ហើយនេះជាទង្វើល្មើសច្បាប់។
ករណីនេះ អង្គការចលនាដើម្បីសុខភាពកម្ពុជា បានគាំទ្រចំពោះចំណាត់ការនេះ ដើម្បីបញ្ចៀសហានិភ័យខ្ពស់ដល់ការឆ្លងជំងឺកូវីដ-១៩ និងជំងឺឆ្លងផ្សេងៗទៅដល់អ្នកប្រើប្រាស់ផលិតផលថ្នាំជក់។
អង្គការនេះបានលើកឡើងថា៖ «សកម្មភាពទាំងអស់នេះផ្ទុយទៅនឹងគោលការណ៍ណែនាំរបស់រាជរដ្ឋាភិបាលកម្ពុជា ក្នុងការកាត់បន្ថយការរីករាលដាលនៃជំងឺកូវីដ។ បើក្រុមហ៊ុនថ្នាំជក់មានបំណងរួមចំណែកកាត់បន្ថយជំងីកូវីដមែន ក្រុមហ៊ុនគួរតែបញ្ឈប់ការផ្សាយលក់បារីនិងបង្ហាញសកម្មភាពក្រុមហ៊ុនរបស់ខ្លួនដើម្បីបិទបាំងការពិតទៀតទៅ»។
មាត្រា៣ នៃអនុក្រឹត្យស្តីពីការបង្កើតនិងការប្រព្រឹត្តទៅរបស់គណៈកម្មាធិការត្រួតពិនិត្យផលិតផលថ្នាំជក់ បានចែងហាមសមាជិករបស់ខ្លួនមិនឱ្យមានទំនាស់ផលប្រយោជន៍ឬទំនាក់ទំនងជាមួយឧស្សាហកម្មថ្នាំជក់។ ក្រសួងស្ថាប័នមួយចំនួន និងរដ្ឋបាលរាជធានី-ខេត្តទាំង២៥ ជាសមាជិកនៃគណៈកម្មាធិការនេះ។
បើយោងតាមការសិក្សារបស់អង្គការសហប្រជាជាតិសម្រាប់ប្រទេសកម្ពុជា ដោយសារតែជំងឺបង្កឡើងដោយសារការប្រើប្រាស់ថ្នាំជក់ បានធ្វើឱ្យប្រជាពលរដ្ឋកម្ពុជាប្រមាណ១៥ ០០០នាក់បានស្លាប់ជារៀងរាល់ឆ្នាំ និងខាតបង់សេដ្ឋកិច្ចជាតិប្រមាណ៦៤៩លានដុល្លារសហរដ្ឋអាមេរិក៕