ពលរដ្ឋ៤នាក់ តំណាងឱ្យ៣០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវដែកនៅសង្កាត់បឹងកក់២ និងសង្កាត់ទឹកល្អក់១ ខណ្ឌទួលគោក បានយកញត្តិទៅដាក់នៅរដ្ឋបាលរាជធានីភ្នំពេញ ដោយស្នើឱ្យអាជ្ញាធរជួយពន្លឿនការដោះស្រាយបញ្ហាដីធ្លី ខណៈពួកគេបារម្ភខ្លាចអាជ្ញាធរចុះរុះរើផ្ទះសម្បែងដោយមិនមានដំណោះស្រាយ។
វ័យ៦១ឆ្នាំ អ្នកស្រី អ៊ឹវ ម៉ាច ដែលអះអាងថា ជាអ្នករងផលប៉ះពាល់ពីគម្រោងអភិវឌ្ឍន៍ផ្លូវដែក ថ្លែងប្រាប់ វីអូឌី នៅថ្ងៃចន្ទនេះថា ដើមចមដែលនាំឱ្យពួកគាត់នាំគ្នាដាក់ញត្តិនេះ ដើម្បីស្នើឱ្យអាជ្ញាធរជួយពន្លឿនការដោះស្រាយបញ្ហាដីធ្លីនិងផ្ទះសម្បែងរបស់ពួកគាត់ឱ្យបានឆាប់ ព្រោះនៅទីតាំងនោះកំពុងប្រឈមនឹងការរុះរើដោយអាជ្ញាធរខណ្ឌ ដើម្បីស្ថាបនាផ្លូវបេតុង និងអាងស្តុកទឹក។
អ្នកស្រីនិយាយថា៖ «ពួកខ្ញុំអ្នកដែលមកដាក់ញត្តិ គឺអ្នកដែលអស់ដី ហើយចង់បាន [ដំណោះស្រាយពីសាលាក្រុង] នៅជិតត្រឹម៥គីឡូម៉ែត្រ [ពីទីតាំងដីចាស់] ទៅវត្តទួល។ ហើយបើអ្នកប៉ះពាល់ពាក់កណ្តាល គឺសុំតម្លៃទីផ្សារសមរម្យកុំឱ្យរុះ [ផ្ទះ] ដោយខ្លួនឯង។ ខ្ញុំលុយរុះក៏គ្មាន ហើយប៉ះផ្ទះក៏ចង់អស់ ហើយគ្រួសារខ្ញុំច្រើននាក់គិតទាំងកូន ក្មួយ និងចៅ ទាំងអស់៣០នាក់ជាង។ ឥលូវខ្លះទៅនៅផ្ទះជួល ខ្លះទៅនៅកន្លែងធ្វើសំណង់ នៅអត់អស់គ្នាទេ ចង្អៀត ពិបាក! ខ្លះគេរុះរើ ហើយអត់ឱ្យសំណង»។
តំណាងសហគមន៍អភិវឌ្ឍន៍ថ្មី លោក ប៊ូ ចាន់ថន រស់នៅភូមិ១៦ ឱ្យដឹងថា រដ្ឋបាលរាជធានីភ្នំពេញ បានទទួលយកញត្តិរបស់ពួកគាត់ហើយ ប៉ុន្តែមន្ត្រីនៅទីនោះថា នឹងឱ្យមន្ត្រីទាក់ទងទៅប្រជាពលរដ្ឋ ដើម្បីផ្តល់ព័ត៌មាននៅពេលក្រោយ។ តែយ៉ាងណា លោកថា មន្ត្រីដែលទទួលឯកសារមិនបានបញ្ជាក់ពីពេលវេលាច្បាស់លាស់ទេ ខណៈតំណាងសហគមន៍ស្នើសុំជួបជជែកគ្នារកដំណោះស្រាយជុំវិញករណីនេះ នៅថ្ងៃទី២៧ ខែកញ្ញា ឆ្នាំ២០២១។
លោកបន្តថា កន្លងមក អាជ្ញាធរមូលដ្ឋាននិងមន្ត្រីនៅរដ្ឋបាលរាជធានីភ្នំពេញ ធ្លាប់ប្រាប់ពលរដ្ឋថា នឹងផ្តល់ដីនៅតំបន់អភិវឌ្ឍន៍របស់ក្រុមហ៊ុន 7NG ដែលស្ថិតនៅខេត្តកណ្តាល និងនៅគោកខ្សាច់។ ប៉ុន្តែពួកគេបានបដិសេធទទួលយកដីនៅតំបន់អភិវឌ្ឍន៍របស់ក្រុមហ៊ុន 7NG ដោយពួកគេស្នើសុំដីនៅ«វត្តទួលអស់លោក» ឬដីក្នុងខណ្ឌទួលគោកវិញ ដើម្បីងាយស្រួលប្រកបមុខរបរចិញ្ចឹមជីវិត ម្យ៉ាងកូនៗស្រួលទៅរៀនផងដែរ។
លោកនិយាយថា៖ «ខ្ញុំសូមអំពាវនាវដល់អាជ្ញាធរ សូមចូលរួមដោះស្រាយបញ្ហាជូនបងប្អូនយើងទាំងអស់គ្នាឱ្យបានលឿនផង ព្រោះយើងដឹងស្រាប់ហើយ បញ្ហាកូវីដ-១៩ កំពុងតែវាយលុកផង ជីវភាពក៏យ៉ាប់ដែរ។ បើសិនជាគាត់ [អាជ្ញាធរ] ជួយដោះស្រាយបញ្ហាហ្នឹងជូនបងប្អូនយើងឱ្យបានលឿន ពួកគាត់ក៏ងាយស្រួលដែរ។ ដូចក្នុងលិខិត យើងសុំទៅនៅក្រោយវត្តទួលអស់លោក បើសិនជាបាននៅទីនោះ ពួកយើងងាយស្រួល ត្រូវធ្វើផ្ទះ ប្រកបមុខរបរស្រួល»។
ចំណែកអ្នកស្រី មាស ស្រីភាព ជាពលរដ្ឋម្នាក់ទៀតដែលរងផលប៉ះពាល់លើគម្រោងនោះដែរ បានព្រមានថា បើរដ្ឋបាលរាជធានីភ្នំពេញមិនព្រមដោះស្រាយសងសំណងសមរម្យដល់ពលរដ្ឋទេ ពួកគេនឹងបន្តតវ៉ារហូតដល់មានដំណោះស្រាយ។
អ្នកស្រីព្រមានថា៖ «ខ្ញុំនៅតែបន្តសុំជួបចរចាជាមួយលោកពូ ឃួង ស្រេង ឱ្យគាត់ជួយដោះស្រាយជូនពួកខ្ញុំ ឱ្យមានដំណោះស្រាយឱ្យសមរម្យសម្រាប់ពួកខ្ញុំ ព្រោះឥលូវហ្នឹងពួកខ្ញុំរស់នៅទាំងភ័យខ្លាច មិនដឹងពេលណាគេឱ្យរើចេញពេលណាអាចគេបណ្តេញពួកខ្ញុំចេញ។ ខ្ញុំនឹងតវ៉ារហូតមានដំណោះស្រាយ ឱ្យមានសំណងសមរម្យដល់ពួកខ្ញុំ។ បើមិនអ៊ីចឹងទេ ឱ្យពួកគាត់អភិវឌ្ឍនៅនឹងកន្លែងឱ្យពួកខ្ញុំ»។
នាយករដ្ឋបាលរាជធានីភ្នំពេញ លោក សេង វណ្ណៈ សុំមិនបកស្រាយជុំវិញករណីនេះ ខណៈអ្នកនាំពាក្យ លោក ម៉េត មាសភក្តី ប្រាប់ថាជាប់រវល់។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា អាជ្ញាធរត្រូវរកវិធីដោះស្រាយសំណងសមរម្យដល់ពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែក ជាជាងដល់ថ្ងៃអភិវឌ្ឍហើយបែរដាក់ថ្ងៃឱសានវាទរុះរើ ធ្វើឱ្យប៉ះពាល់ដល់ពលរដ្ឋដែលរងផលប៉ះពាល់។
លោកថា៖ «ផលវិបាកជាបទពិសោធន៍កន្លងមក បើមិនមានដំណោះស្រាយ ពួកគាត់នៅតែបន្តទាមទារដាក់ញត្តិ ឬក៏គាត់អាចធ្វើការតវ៉ា ឬក៏ចុងក្រោយ នៅពេលដែលតម្រូវការចាំបាច់ អាជ្ញាធរជូនដំណឹងក្នុងការរុះរើចេញ។ បើមិនអ៊ីចឹងទេ ការប្រើប្រាស់កម្លាំងក្នុងការរុះរើ ឬការបណ្តេញចេញ។ អាហ្នឹងផលវិបាកប៉ះពាល់វាច្រើន ប៉ះពាល់ទីមួយដល់ជីវភាពរស់នៅប្រជាពលរដ្ឋ ទីពីរវាអាចធ្វើឱ្យមានការរិះគន់ទាក់ទងនឹងការរំលោភលើសិទ្ធិលំនៅឋាន ឬសិទ្ធិមនុស្សជាដើម»។
បើតាមញត្តិរបស់ពលរដ្ឋដាក់ទៅរដ្ឋបាលរាជធានីភ្នំពេញ នៅថ្ងៃទី១៣ ខែកញ្ញានេះ ពលរដ្ឋដែលរងផលប៉ះពាល់ពីគម្រោងផ្លូវដែកទាំងស្រុងមានចំនួន២៥គ្រួសារ និងចំនួន៥គ្រួសារទៀតប៉ះពាល់មួយផ្នែកតែប៉ុណ្ណោះ៕
