នាយករដ្ឋមន្ត្រីកម្ពុជា លោក ហ៊ុន សែន បានផ្ញើសារថា កិច្ចព្រមព្រៀងពាណិជ្ជកម្មសេរីកម្ពុជា-ចិនដែលនឹងចូលជាធរមាននៅពេលឆាប់ៗខាងមុខនេះ នឹងដោះស្រាយវិបត្តិទីផ្សារកសិផលដែលកំពុងជួបប្រទះបាន។
ការលើកឡើងរបស់មេដឹកនាំកម្ពុជា លោក ហ៊ុន សែន នេះ ធ្វើឡើងក្នុងពិធីចុះហត្ថលេខាទទួលជំនួយ និងកិច្ចសហការទ្វេភាគីផ្សេងទៀតជាមួយរដ្ឋមន្ត្រីការបរទេសចិន កាលពីម្សិលមិញ នៅរាជធានីភ្នំពេញ។
ក្នុងពិធីនោះ នាយករដ្ឋមន្ត្រីកម្ពុជាបានថ្លែងថា កិច្ចព្រមព្រៀងពាណិជ្ជកម្មសេរីកម្ពុជា-ចិនដែលបានធ្វើកន្លងទៅ នឹងត្រូវចូលជាធរមានឆាប់ៗនាពេលខាងមុខ។ លោកបញ្ជាក់ថា ក្រោយកិច្ចព្រមព្រៀងនេះចូលជាធរមានហើយ កម្ពុជានឹងអាចប្រើប្រាស់ទីផ្សាររបស់ចិនជាផលប្រយោជន៍សម្រាប់ជាទីផ្សារនាំចូលផលិតផលកសិកម្មរបស់កម្ពុជា។
ចំណុចនេះ លោកនាយករដ្ឋមន្ត្រី ហ៊ុន សែន ផ្ញើសារទៅកាន់កសិករកម្ពុជាថា រដ្ឋាភិបាលនឹងប្រឹងប្រែងឱ្យអស់លទ្ធភាព ជាមួយការប្តេជ្ញាចិត្តរបស់មិត្តចិនដែលចង់ជួយដល់កសិករកម្ពុជា ដែលថា ក្នុងនោះមានទាំងបញ្ហាទីផ្សារផ្លែមៀនដែលកំពុងមានវិបត្តិផងដែរ។
លោកថា៖ «ខ្ញុំសូមជម្រាប ដូចជាផ្លែមៀន ៣មុខ ដែលយើងកំពុងមានវិបត្តិ»។
ជាការឆ្លើយតបរដ្ឋមន្ត្រីការបរទេសចិន លោក វ៉ាង យី បានថ្លែងក្នុងពិធីនោះថា ចិននឹងជំរុញការនាំចូលផលិតផលកសិកម្មឱ្យកាន់តែច្រើននិងមានប្រសិទ្ធភាពខ្ពស់ពីកម្ពុជា។
លោកថា៖ «យើងនឹងជំរុញបញ្ហានេះ ដើម្បីផ្តល់ប្រយោជន៍កាន់តែច្រើនដល់កសិករកម្ពុជា»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន យល់ថា ការរំពឹងទីផ្សារចិនដើម្បីដោះស្រាយវិបត្តិទីផ្សារកសិផលរបស់កម្ពុជាទៅថ្ងៃអនាគត ជារឿងល្អមួយ។ តែលោកថា វានឹងមិនអាចដោះស្រាយបញ្ហាកសិករបានទេ បើក្រសួងពាក់ព័ន្ធរបស់រដ្ឋមិនអាចដោះស្រាយបញ្ហាបច្ចុប្បន្ន ដែលវិស័យកសិកម្មកំពុងជួបប្រទះ ដូចជា បញ្ហាបច្ចេកទេស ទុនបម្រុង ឃ្លាំងស្តុប ជាដើម ដើម្បីធានាគុណភាពតាមស្តង់ដារអន្តរជាតិដូចប្រទេសជិតខាងនោះ។
លោកថា៖ «បើសិនជាមានថវិកាជាតិ គួរបញ្ចេញដើម្បីជួយដល់កសិករ ជាប្រាក់កម្ចី ឬជួយស្វះស្វែងរកដៃគូក្នុងការកែច្នៃផលិតផល ឬក៏ទាក់ទាញឱ្យមានសហគ្រាសវិនិយោគក្នុងការសម្អាតអនាម័យ ដែលភាគច្រើនយើងពឹងផ្អែកតែលើប្រទេសថៃ ដោយថៃមានរោងចក្រសម្អាត។ អ៊ីចឹងយើងក៏គួរតែមានបែបនេះដែរ ដើម្បីអាចដោះស្រាយបញ្ហាចំពោះមុខបាន»។
កសិករដាំបន្លែម្នាក់នៅស្រុងស្អាង ខេត្តកណ្តាល លោក តៃ សុង និយាយថា លោកហាក់គ្មានជំនឿលើសារនយោបាយនេះទេ ដោយថា កន្លងទៅ អាជ្ញាធរពាក់ព័ន្ធរបស់រដ្ឋមួយចំនួនក៏បានមកសន្យាបែបនេះជាមួយលោកដែរ ដោយធានាពីការរកទីផ្សារលក់កសិផល។ ប៉ុន្តែលោកថា ទីបំផុត បន្លែដែលលោកដាំបាននៅតែជួបវិបត្តិទីផ្សារ រហូតពេលខ្លះធ្វើឱ្យលោកសម្រេចចិត្តឈូសសាលាដអស់ជាច្រើនហិកតាចោល ដើម្បីយកដីដាំបន្លែផ្សេងទៀត។
លោកថា៖ «២០ឆ្នាំហើយ ឮតែអ៊ីចឹងរហូត […] ដូចអត់បានផលអីសម្រាប់ខ្ញុំមួយទេ [មន្ត្រីរដ្ឋាភិបាល]កុហកខ្ញុំរហូតអ៊ីចឹង ហើយខ្ញុំអត់មានជំនឿអីទៀតទេ។ ឥលូវគិតតែទីពឹងខ្លួនឯងរហូត រឿងក្រសួងគាត់ចាត់ចែងម៉េចចាត់ចែងទៅ អត់មានសង្ឃឹមលើគាត់ទេ រកវិធីដោះស្រាយខ្លួនឯងរហូត ខ្លួនទីពឹងខ្លួនហើយ»។
តែយ៉ាងណា កន្លងទៅ រដ្ឋាភិបាលធ្លាប់បញ្ជាឱ្យមន្ត្រីចុះទិញផ្លែមៀនពីកសិករនៅខេត្តប៉ៃលិន ក្រោយពួកគេអះអាងថា ថៃបិទព្រំដែនបង្កឱ្យមានវិបត្តិទីផ្សារក្នុងការនាំចេញ។
តែយ៉ាងណា កសិករម្នាក់ត្រូវបានតុលាការបង្គាប់ឱ្យឃុំខ្លួនតាមការចោទប្រកាន់របស់អាជ្ញាធរ ខណៈបុរសនោះប្រើប្រាស់បណ្តាញសង្គម និយាយថា អាជ្ញាធរបានបញ្ជាទិញហើយតែមិនយកវិញ។
ក្រៅពីនេះ ក្នុងជំនួបជាមួយមេដឹកនាំចិនកាលពីម្សិលមិញនេះដែរ ភាគីចិនក៏បានផ្តល់ហិរញ្ញប្បទានឬជំនួយឥតសំណងប្រមាណ២៧០លានដុល្លារ ជួយដល់ការងារបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជាចំនួន២,៥លានដុល្លារ និងកិច្ចព្រមព្រៀងស្ដីពីគម្រោងកិច្ចសហប្រតិបត្តិការរបស់មូលនិធិពិសេសមេគង្គ-ឡានឆាង និងសន្យាជួយវ៉ាក់សាំងប្រឆាំងកូវីដ-១៩ ចំនួន៣លានដូសបន្ថែមទៀត៕
