លោកនាយករដ្ឋមន្ត្រី ហ៊ុន សែន នឹងអំពាវនាវឱ្យមានការរួមគ្នាទប់ស្កាត់ជំងឺឆ្លងកូវីដ-១៩ ជាសកល ក្នុងស្មារតីមនុស្សធម៌ស្មោះត្រង់ និងគ្មានរបៀបវារៈនយោបាយនៅពីក្រោយ ដើម្បីអាចចាប់ផ្តើមដំណើរការសេដ្ឋកិច្ច សង្គមឡើងវិញប្រកបដោយសុវត្ថិភាព ។
ក្នុងសេចក្តីប្រកាសព័ត៌មានរបស់ក្រសួងការបរទេសកម្ពុជា បានឱ្យដឹងកាលពីថ្ងៃទី២១ ខែកញ្ញាម្សិលមិញនេះថាលោកនាយករដ្ឋមន្ត្រី ហ៊ុន សែន នឹងផ្ញើសុន្ទរកថា ជាលាយលក្ខណ៍អក្សរចូលរួមកិច្ចប្រជុំកំពូលកូវីដ-១៩ ជាសកល ក្រោមប្រធានបទ «ការបញ្ចប់ជំងឺរាតត្បាត និងការកសាងឱ្យប្រសើរឡើងវិញ» ដែលរៀបចំឡើងដោយប្រធានធិបតីសហរដ្ឋអាមេរិក លោក ចូ បៃដិន តាមប្រព័ន្ធវីដេអូ នៅថ្ងៃទី២២ ខែកញ្ញា ឆ្នាំ២០២១នេះ ។
សេចក្តីប្រកាសព័ត៌មានបញ្ជាក់ថា កិច្ចប្រជុំកំពូលនេះ នឹងផ្តោតលើការចាក់វ៉ាក់សាំងបង្ការដល់ពិភពលោក ការជួយសង្គ្រោះជីវិត ការកសាងសន្តិសុខសន្តិភាពឱ្យកាន់តែប្រសើរឡើង និងការធ្វើសកម្មភាព ដើម្បីវឌ្ឍភាព និងការឯកភាពលើសេចក្តីព្រាងគោលដៅ ។
ក្រសួងការបរទេសកម្ពុជា បន្តថា ក្នុងកិច្ចប្រជុំនោះ លោកនាយករដ្ឋមន្ត្រី ហ៊ុន សែន នឹងគូសបញ្ជាក់ពីភាពចាំបាច់បន្ទាន់ក្នុងការរួមគ្នាទប់ស្កាត់ជំងឺឆ្លងកូវីដ-១៩ ក្នុងស្មារតីមនុស្សធម៌ស្មោះត្រង់ និងគ្មានរបៀបវារៈនយោបាយនៅពីក្រោយ ដើម្បីអាចចាប់ផ្តើមដំណើរការសេដ្ឋកិច្ច សង្គមឡើងវិញប្រកបដោយសុវត្ថិភាព ។
អ្វីដែលគួរឱ្យកត់សម្គាល់ លោកនាយករដ្ឋមន្ត្រី ហ៊ុន សែន សង្កាត់ធ្ងន់លើសារៈសំខាន់នៃការរួមបញ្ចូលវ៉ាក់សាំងទាំងអស់ដែលអង្គការសុខភាពពិភពលោកទទួលស្គាល់ ដែលជាយុទ្ធសាស្ត្រសកលដ៏ល្អ ដោយគ្មានការរើសអើទៀតផង។
លោកនាយករដ្ឋមន្ត្រី ហ៊ុន សែន ក៏នឹងប្រាប់ទៅសម័យប្រជុំកំពូលពីវិធានការប្រកបដោយសុវត្ថិភាព និងយុទ្ធសាស្ត្រគ្រប់ជ្រុងជ្រោយរបស់កម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ និងពង្រឹងភាពធន់ និងការអភិវឌ្ឍប្រកបដោយចីរភាពនៅក្នុងដំណាក់កាលក្រោយវិបត្តិកូវីដ-១៩ផងដែរ ។
សេចក្តីប្រកាសព័ត៌មាននោះ បញ្ជាក់ដូចនេះថា ៖ «សុន្ទរកថារបស់សម្តេចតេជោនាយករដ្ឋមន្ត្រី បានឆ្លុះបញ្ចាំងពីសាមគ្គីភាព និងប្តេជ្ញាចិត្តដ៏រឹងមាំរបស់កម្ពុជា ជាមួយកិច្ចខិតខំប្រឹងប្រែងអន្តរជាតិ ក្នុងការប្រយុទ្ធប្រឆាំងនឹងជំងឺកូវីដ-១៩ នៅក្នុងស្មារតី «គ្មាននរណាម្នាក់មានសុវត្ថិភាពទេ ដរាបមនុស្សគ្រប់គ្នាមិនមានសុវត្ថិភាព»៕
