អាជ្ញាធរខេត្តតាកែវ សម្រេចបិទខ្ទប់ភូមិជិត ១០ ដែលស្ថិតនៅក្នុងស្រុកអង្គរបូរី ក្រោយរកឃើញមានការឆ្លងរាលដាលនៃមេរោគកូវីដ-១៩ បំប្លែងថ្មី ប្រភេទដែលតា(Delta) ចាប់ពីថ្ងៃទី២១ ខែកញ្ញា រហូតដល់មានការជូនដំណឹងជាថ្មី។
យោងតាមសេចក្តីសម្រេចរបស់រដ្ឋបាលខេត្តតាកែវ ចុះថ្ងៃទី២១ ខែកញ្ញា បានសម្រចបិទខ្ទប់ភូមិមួយចំនួន រួមមាន ភូមិសាមគ្គី ភូមិស្ទឹងកំបុត ភូមិព្រៃសំបួរ ភូមិទួលសាំង(ក) ភូមិទួលសាំង(ខ) ឃុំអង្គរបូរី និងបិទខ្ទប់ផ្នែកខ្លះនៃភូមិសាស្ត្រភូមិធ្លកយុល ភូមិអំពិល ឃុំពន្លៃ និងភូមិព្រែកតាផ ឃុំគោកធ្លក ក្នុងស្រុកអង្គរបូរី ក្នុងគោលបំណងដើម្បីកាត់ផ្តាច់ការឆ្លងរាលដាល និងទប់ស្កាត់ការឆ្លងជំងឺកូវីដ-១៩ ទៅកាន់តំបន់ផ្សេងទៀត។
សេចក្តីសម្រេចរបស់រដ្ឋបាលខេត្ត បន្តថា ក្នុងកំឡុងពេលនៃការអនុវត្តវិធានការបិទខ្ទប់នេះ អាជ្ញាធរមិនអនុញ្ញាតឱ្យមានការធ្វើដំណើរចេញចូលលំនៅដ្ឋាន ឬទីសំណាក់បច្ចុប្បន្ន និងការជួបជុំក្នុងកម្មវិធីផ្សេងៗ លើកលែងតែក្នុងករណីចាំបាច់មួយចំនួន ដូចជា ការទៅទទួលសេវាព្យាបាលសុខភាពបន្ទាន់ ការទៅយកសំណាកកូវីដ-១៩ ការរៀបចំបុណ្យសពដែលត្រូវគោរពតាមការកំណត់របស់អាជ្ញាធរ ការជួបជុំមន្ត្រីសុខាភិបាលក្នុងការយកសំណាកប្រជាជន ការទៅបំពេញការងារ ឬធ្វើអាជីវកម្មក្នុងភូមិសាស្រ្តបិទខ្ទប់ និងទីកន្លែងមិនមានការហាមឃាត់ ត្រូវភ្ជាប់មកនូវលិខិតបញ្ជាក់ពីការងារ និងអាជីវកម្មជាដើម។
អាជ្ញាធរខេត្តតាកែវ បញ្ជាក់ផងដែរថា ចំពោះបុគ្គលណាដែលមិនអនុវត្តន៍តាមវិធានការ នឹងត្រូវទទួលទោស ដូចមានកំណត់ក្នុងច្បាប់ស្តីពី វិធានការទប់ស្កាត់ការឆ្លងរាលដាលនៃមេរោគបំប្លែងថ្មីដែលតា(delta) និងជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងៗទៀត និងលិខិតបទដ្ឋានគតិយុត្តពាក់ព័ន្ធជាធរមាន៕