លោកនាយករដ្ឋមន្ត្រី ហ៊ុន សែន នៅថ្ងៃសៅរ៍នេះ បានទទួលស្គាល់ថា លោកមានការធ្វេសប្រហែសតាំងពីដើមទី ដែលបណ្តែតបណ្តោយឱ្យរៀបចំការប្រារព្ធពិធីបុណ្យកាន់បិណ្ឌ ខណៈដែលលោកមានការភ្ញាក់ផ្អើលថា ត្រឹមរយៈពេល៣ថ្ងៃ វត្តពាក់កណ្ដាលនៅរាជធានីភ្នំពេញ បានឆ្លងជំងឺកូវីដ-១៩។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារសំឡេងពិសេសមួយនៅថ្ងៃសៅរ៍នេះថា អំឡុងពេលដែលជំងឺកូវីដ-១៩ កំពុងឆ្លងរីករាលដាល លោកបែរជាឱ្យបា្ររព្ធពិធីបុណ្យកាន់បិណ្ឌ និងបុណ្យភ្ជុំបិណ្ឌទៅវិញ។ លោកបន្តថា ការអនុញ្ញាតឱ្យបា្ររព្ធពិធីបុណ្យនេះ ធ្វើឱ្យចំនួនអ្នកឆ្លងជំងឺកូវីដ-១៩ បានកើនឡើង។
លោកថា៖ «នៅក្នុងជំងឺរាលត្បាតកើតឡើង ខ្ញុំព្រះករុណាខ្ញុំបែរជាមានការធ្វេសប្រហែលដោយយល់យោគទៅលើសភាពការណ៍ដែលមានការស្រុតចុះបន្តិចនូវជំងឺកូវីដនេះ យើងក៏បានចាប់ផ្ដើមឱ្យមានការធ្វើបុណ្យធ្វើទានតាមទំនៀមទម្លាប់ឡើងវិញ ក៏ប៉ុន្តែត្រឹមតែរយៈពេល៣ថ្ងៃប៉ុណ្ណោះ ចំនួនឆ្លងតាមទីអារាមមួយចំនួនបានកើនឡើង ធ្វើឱ្យចំនួនអ្នកឆ្លងដែលមានត្រឹម៤០០ ទៅ៥០០ នាក់ បានកើនលើស៨០០នាក់ និងចំនួនស្លាប់ឡើងជាង២០នាក់ ក្នុងដំណាក់ចុងក្រោយនេះ»។
លោកបន្តថា ការកើនឡើងចំនួនអ្នកឆ្លង និងស្លាប់នេះ បានធ្វើឱ្យប្រជាពលរដ្ឋចោទសួរ ពាក់ព័ន្ធនឹងប្រសិទ្ធភាពនៃការចាក់វ៉ាក់សាំងរួចហើយ ហេតុអ្វីនៅតែឆ្លង។ លោកបញ្ជាក់ថា ការចាក់វ៉ាក់សាំងតែមួយមុខ មិនអាចកាត់បន្ថយការឆ្លងជំងឺកូវីដ-១៩ បានទេ បើសិនជាប្រជាពលរដ្ឋនៅតែជួបជុំគ្នា ដោយមិនអនុវត្តតាមវិធានសុខាភិបាលនោះ។
លោក ហ៊ុន សែន ថា ការធ្វេសប្រហែលរបស់លោកឱ្យបា្ររព្ធពិធីកាន់បិណ្ឌនិងបុណ្យភ្ជុំបិណ្ឌនេះ បានធ្វើឱ្យវត្តអារាមពាក់កណ្ដាលនៅក្នុងរាជធានីភ្នំពេញឆ្លងជំងឺកូវីដ-១៩។ ករណីនេះលោកថា វាជាហានិភ័យខ្ពស់ណាស់ ប្រសិនបើបន្តមានការជួបជុំប្រារព្ធពិធីបុណ្យកាន់បិណ្ឌ និងបុណ្យភ្ជុំបិណ្ឌបន្តទៅទៀត។
លោកបន្តថា៖ «ប្រសិនបើខ្ញុំព្រះករុណាខ្ញុំបណ្ដោយឱ្យមានការកាន់បិណ្ឌបន្តទៀត វត្តដែលយើងមិនបានឃើញមុននេះ យើងបានឃើញតែវត្តចំពុះក្អែក និងវត្តនាគវ័ន្តទេ ក៏ប៉ុន្តែសូម្បីវត្តឧណ្ណាឡោម ដែលសម្ដេចព្រះសង្ឃរាជគង់នៅ ក៏មានអ្នកកើតកូវីដ-១៩ ក្នុងនោះ និងវត្តមួយចំនួនផ្សេងទៀត ពាក់កណ្ដាលនៃចំនួនវត្តសុទ្ធតែមានអ្នកឆ្លងកូវីដ។ ដូច្នេះបើសិនជាចាប់ពីបិណ្ឌ៤ រហូតទៅដល់បុណ្យភ្ជុំ សភាពការណ៍នេះ មហន្តរាយធំប៉ុណ្ណា ពិតជាធ្ងន់ធ្ងរមែនទែន ហើយពិតជាមហន្តរាយមួយសម្រាប់សុខភាពសាធារណៈ និងជីវិតប្រជាជន ជាពិសេសកូវីដ-១៩ វាយលុកមនុស្សចាស់លោកយាយលោកតា អាយុ៦០ ឡើងទៅ ច្រើនទៅវត្ត»។
កាលពីថ្ងៃទី២៣ ខែកញ្ញា រដ្ឋាភិបាលកម្ពុជាបានចេញសេចក្តីសម្រេចបន្ទាន់មួយ ដោយផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញានេះតទៅ ក្រោយរកឃើញព្រះសង្ឃនិងអ្នកស្នាក់នៅវត្តមួយចំនួនដូចជា វត្តចំពុះក្អែក និងវត្តនាគវ័ន្តឆ្លងជំងឺកូវីដ-១៩តែក្នុងរយៈពេល២ថ្ងៃ។
ក្រោយរកឃើញមានព្រះសង្ឃនិងអ្នកស្នាក់នៅវត្តអារាមឆ្លងកូវីដ-១៩នោះ អាជ្ញាធរនិងមន្ត្រីសុខាភិបាលសហការជាមួយមន្ទីរធម្មការរាជធានីភ្នំពេញ បានចុះយកសំណាក ព្រះសង្ឃនិងអ្នកស្នាក់នៅវត្តអារាមចំនួន១៥១វត្ត ដែលមានព្រះសង្ឃ និងអ្នកស្នាក់នៅក្នុងវត្តប្រមាណជាង២ម៉ឺនអង្គ/នាក់ ក្នុងរាជធានីភ្នំពេញ ដើម្បីធ្វើតេស្តរកវីរុសកូវីដ-១៩។
បើតាមលោកនាយករដ្ឋមន្ត្រី ហ៊ុន សែន បើទោះបីជាពិធីបុណ្យកាន់បិណ្ឌ និងភ្ជុំបិណ្ឌផ្អាកមែន ក៏ប៉ុន្តែការឈប់សម្រាកក្នុងពិធីបុណ្យភ្ជុំបិណ្ឌនៅរក្សាទុកដដែល៕