ប្រជាពលរដ្ឋជិត១ ០០០គ្រួសារ នៅស្រុកចំនួន៣ ក្នុងខេត្តកោះកុង រកកិច្ចអន្តរាគមន៍ពីអាជ្ញាធរថ្នាក់ជាតិឱ្យជួយដោះស្រាយវិវាទដីធ្លីរបស់ពួកគេជាមួយក្រុមហ៊ុនរបស់លោកឧកញ៉ា លី យ៉ុងផាត់។
ក្នុងញត្តិចុះថ្ងៃទី២៨ ខែកញ្ញា ឆ្នាំ២០២១ ប្រជាពលរដ្ឋ៨៤៣គ្រួសារ និងដីសរុប១ ៧២៧,៦ហិកតា ស្ថិតក្នុងស្រុកបទុមសាគរ ស្រុកស្រែអំបិល និងស្រុកថ្មបាំង ខេត្តកោះកុង បានរកកិច្ចអន្តរាគមន៍ពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឱ្យជួយដោះស្រាយវិវាទដីធ្លីជាមួយក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់លោកឧកញ៉ា លី យ៉ុងផាត់ សមាជិកព្រឹទ្ធសភា។
ក្នុងញត្តិនេះ ក្រុមពលរដ្ឋអះអាងថា ដីធ្លីនោះពួកគេបានកាន់កាប់និងចូលអាស្រ័យផល ដោយខ្លះធ្វើចម្ការ អ្នកខ្លះធ្វើស្រែចិញ្ចឹមជីវិតតាំងពីឆ្នាំ១៩៧៩ ហើយអ្នកខ្លះទៀតបានកាន់កាប់នៅឆ្នាំ២០០០ ប៉ុន្តែនៅឆ្នាំ២០០៦ ក្រុមហ៊ុនរបស់លោកឧកញ៉ា លី យ៉ុងផាត់ បានដាក់គ្រឿងចក្រឈូសឆាយផលដំណាំរបស់ពួកគាត់អស់ ដើម្បីយកដីដាំអំពៅ។
ក្នុងញត្តិបន្ថែមថា ក្រោយក្រុមហ៊ុនឈូសឆាយផលដំណាំរបស់ពួកគេអស់ ខាងតំណាងក្រុមហ៊ុនបានបង្ខំឱ្យប្រជាពលរដ្ឋយកសំណងបន្តិចបន្តួច ប៉ុន្តែមានពលរដ្ឋខ្លះទទួលយក និងខ្លះទៀតមិនទទួលយកទេ ទើបបង្កឱ្យមានជាវិវាទដល់បច្ចុប្បន្ន។
អ្នកស្រី ជឹម ថន ដែលអះអាងថាជាតំណាងពលរដ្ឋនៅស្រុកស្រែអំបិល ប្រាប់ វីអូឌី នៅថ្ងៃសុក្រនេះថា ជុំវិញជម្លោះដីធ្លីរវាងប្រជាពលរដ្ឋនិងក្រុមហ៊ុនស្ករអំពៅរបស់លោក លី យ៉ុងផាត់ នេះ គឺពួកគាត់បានដាក់ញត្តិសុំអន្តរាគមន៍ពីអាជ្ញាធរថ្នាក់ស្រុកនិងខេត្តជាច្រើនដងហើយ ប៉ុន្តែមិនទទួលបានការដោះស្រាយនោះទេ។ អ្នកស្រីបន្តថា ការពន្យារពេលមិនដោះស្រាយនេះ បានធ្វើឱ្យពួកគាត់ជួបការលំបាកគ្មានដីធ្លីបង្កបង្កើនផល និងសម្រេចរកកិច្ចអន្តរាគមន៍ពីអាជ្ញាធរថ្នាក់ជាតិបន្តទៀត។
អ្នកស្រីបន្ថែមថា៖ «បើនិយាយពីជីវភាពវិញ យើងពិបាកក្នុងការរស់នៅណាស់ ដោយសារយើងបានបាត់បង់ដីអាស្រ័យផលជាក់ស្តែង។ យើងអត់បានដាំដុះអាស្រ័យផល ហើយសេដ្ឋកិច្ចឥលូវពិបាករកស៊ីទៀត បើរឿងជំពាក់បំណុលធនាគារវិញសឹង៩៩ភាគរយហើយ។ និយាយពីកូនចៅវិញ គ្មានបានរៀនសូត្រអីទេ ជីវភាពគ្រួសារយ៉ាប់ពីមួយថ្ងៃទៅមួយថ្ងៃហើយ»។
ពលរដ្ឋម្នាក់នៅស្រុកបទុមសាគរ អ្នកស្រី រុន ភាព និយាយថា ដីធ្លីរបស់ពួកគាត់ដែលក្រុមហ៊ុនបានរំលោភយកកាលពី១៥ឆ្នាំមុននោះ ពេលនេះកំពុងត្រូវបានទុកចោល ដោយពុំមានការអភិវឌ្ឍដាំអ្វីនោះទេ។
ពលរដ្ឋរូបនេះបានអំពាវនាវដល់ប្រមុខរដ្ឋាភិបាលជួយដោះស្រាយ ដោយប្រគល់ដីនោះជូនពលរដ្ឋបានបង្កបង្កើនផលវិញ និងឱ្យក្រុមហ៊ុនផ្តល់សំណងដែលពួកគាត់បានខាតបង់ពេលវេលា មិនបានអាស្រ័យផល និងការខូចខាតផលដំណាំផងដែរ។
អ្នកស្រីបន្ថែមថា៖ «ខ្ញុំចង់ឱ្យរដ្ឋាភិបាលពន្លឿននូវការដោះស្រាយជូនពួកខ្ញុំឱ្យបានឆាប់ ពីព្រោះអាជ្ញាធរពាក់ព័ន្ធហ្នឹងគាត់បានបដិសេធពួកខ្ញុំជាច្រើនលើកច្រើនសារហើយ។ ពួកខ្ញុំជាកសិករកំពុងជួបការលំបាកច្រើន ដោយសារខ្វះដីធ្វើកសិកម្មសម្រាប់បង្កបង្កើនផល។ ខ្ញុំចង់បានដីពួកខ្ញុំមកវិញ និងបានសំណងខ្លះដែលយកទៅជាច្រើនឆ្នាំមកនេះ ពួកខ្ញុំបានខាតបង់ច្រើនដោយសារគ្មានដីធ្វើកសិកម្ម»។
ពលរដ្ឋម្នាក់ទៀត លោក ឈឹម សាផាន បានឱ្យដឹងថា ប្រសិនបើក្រសួងរៀបចំដែនដី និងអាជ្ញាធរពាក់ព័ន្ធនៅតែពន្យារពេលមិនដោះស្រាយជូនពលរដ្ឋទៀត នោះពួកគាត់នឹងនាំគ្នាចូលទៅរស់នៅលើទីតាំងដីរបស់ខ្លួនដែលធ្លាប់អាស្រ័យផលវិញហើយ។
ពលរដ្ឋរូបនេះបន្តថា កន្លងមក អាជ្ញាធរភូមិឃុំបានបញ្ជាក់រួចហើយថា ពួកគាត់ពិតជាបានបាត់បង់ដីធ្លី ដោយសារក្រុមហ៊ុនចម្ការអំពៅរបស់លោក លី យ៉ុងផាត រំលោភមែន ប៉ុន្តែការដោះស្រាយនៅតែមិនមានលទ្ធផល។
លោកបន្ថែមថា៖ «បើអត់ដោះស្រាយជូនប្រជាពលរដ្ឋខ្ញុំជាង៨០០គ្រួសារនេះទេ ក្នុងរយៈពេល១ខែទៀត ពួកខ្ញុំនឹងទៅរស់នៅលើដីរបស់ពួកខ្ញុំវិញ ដើម្បីឱ្យក្រសួងមកជជែកជាមួយពួកយើងនៅលើដីនេះ។ បើយើងមិនធ្វើអ៊ីចឹង ក្រសួងគេមិនមកជជែករកដំណោះស្រាយជាមួយពួកយើងទេ»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងរៀបចំដែនដី លោក សេង ឡូត បានទេ នៅថ្ងៃសុក្រនេះ។
ចំណែកអភិបាលរង និងជាអ្នកនាំពាក្យរដ្ឋបាលខេត្តកោះកុង លោក សុខ សុទ្ធី ប្រាប់ថា កំពុងជាប់រវល់ចុះដោះស្រាយវិវាទដីធ្លីនៅស្រុកបទុមសាគរ មិនអាចឆ្លើយតបបាន។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា កន្លងមក អាជ្ញាធរបានសម្របសម្រួលដោះស្រាយបញ្ចប់វិវាទដីធ្លីរវាងប្រជាពលរដ្ឋនិងក្រុមហ៊ុនរបស់លោក លី យ៉ុងផាត់ បានប្រហែល៥ក្រុមរួចមកហើយ។ ប៉ុន្តែលោកថា ក្រោយមកក៏មានមួយក្រុមផ្សេងទៀតបានអះអាងថា ពួកគេក៏បាត់បង់ដីធ្លីដោយសារក្រុមហ៊ុននេះរំលោភយក ហើយបានផ្ទុះការតវ៉ាដើម្បីទាមទារសំណងដែរ។
លោកបន្ថែមថា៖ «បើសិនជាពួកគាត់ពិតជាប្រជាពលរដ្ឋដែលបានរងផលប៉ះពាល់ដីស្រែដីចម្ការដោយសារក្រុមហ៊ុនរំលោភយកមែន អាជ្ញាធរមិនបាច់គិតថាពួកគាត់ជាអ្នកតវ៉ាមុនឬអ្នកតវ៉ាក្រោយទេ បើសិនជាពួកគាត់ជាជនរងគ្រោះពិតប្រាកដ គួរតែមានដំណោះស្រាយណាមួយសមរម្យជូនពួកគាត់ដែរ ដើម្បីឈានទៅរកការដោះស្រាយបញ្ចប់ជម្លោះដីធ្លីនៅក្នុងខេត្តកោះកុង»។
បើតាមមន្ត្រីសិទ្ធិមនុស្សរូបនេះ រយៈពេល២ឆ្នាំចុងក្រោយនេះ ជម្លោះដីធ្លីរវាងប្រជាពលរដ្ឋនិងក្រុមហ៊ុនដីសម្បទានសេដ្ឋកិច្ចនៅក្នុងខេត្តកោះកុង មិនមានការកើនឡើងនោះទេ ប៉ុន្តែលទ្ធផលនៃការដោះស្រាយហាក់មិនបានល្អច្រើននោះឡើយ។
យ៉ាងណា លោកថា មួយរយៈនេះ លោកសង្កេតឃើញថា អាជ្ញាធរពាក់ព័ន្ធបានចាប់ផ្តើមដំណើរការដោះស្រាយជាថ្មីទៀត ដូចជា ជម្លោះដីធ្លីរវាងប្រជាពលរដ្ឋនិងក្រុមហ៊ុនញូញៀន ដែលរំពឹងថា ការដោះស្រាយនេះនឹងអាចទទួលយកបានទាំងគ្នាសម្រាប់ភាគីដែលពាក់ព័ន្ធ៕
