លោកនាយករដ្ឋមន្ត្រី ហ៊ុន សែន បញ្ជាទៅក្រសួងសុខាភិបាលឱ្យពង្រឹងសមត្ថភាពព្យាបាលជំងឺកូវីដ-១៩ ឡើងវិញ ក្រោយរកឃើញថា អត្រាភាគរយនៃអ្នកស្លាប់នៅកម្ពុជា ដោយសារជំងឺរលាកផ្លូវដង្ហើមធ្ងន់ធ្ងរនេះ ខ្ពស់ជាងប្រទេសមួយចំនួន រួមទាំងប្រទេសថៃ និងវៀតណាម។
ការថ្លែងរបស់នាយករដ្ឋមន្ត្រីនេះ ធ្វើឡើងក្នុងពិធីប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ សម្រាប់មនុស្សចាប់ពី ៦ឆ្នាំឡើង ក្នុងក្របខណ្ឌទូទាំងប្រទេស ដែលធ្វើឡើងនាថ្ងៃចន្ទនេះ នៅរាជធានីភ្នំពេញ។
ក្នុងពិធីនោះ លោកនាយករដ្ឋមន្ត្រី ហ៊ុន សែន ថ្លែងថា ក្រសួងសុខាភិបាលត្រូវពង្រឹងសមត្ថភាពប្រកបដោយការទទួលខុសត្រូវឡើងវិញ ពីការព្យាបាលអ្នកជំងឺកូវីដ-១៩ ។
លោកគូសបញ្ជាក់ថា បើគិតពីអត្រាអ្នកឆ្លងជាចំនួនមនុស្ស កម្ពុជាមានអត្រាទាបជាងបណ្តាប្រទេសមួយចំនួន ដូចជា ថៃ វៀតណាម ម៉ាឡេស៊ី បារាំង រុស្ស៊ី អាមេរិក និងចិនជាដើម។ ប៉ុន្តែលោកថា បើគិតជាភាគរយនៃចំនួនអ្នកស្លាប់វិញ កម្ពុជាមានអត្រាខ្ពស់ជាងគេ គឺមានទៅដល់ ២,៣៥ភាគរយ ដែលការណ៍នេះលោកថា ជាតួលេខមួយស្ថិតក្នុងការព្រួយបាម្ភ ដែលត្រូវពង្រឹងសមត្ថភាពព្យាបាលឡើងវិញ។
លោកាថា៖ «ភាគរយឆ្លង មិនមែនជាភាគរយដែលគួរឱ្យព្រួយបារម្ភពេកទេ តែភាគរយស្លាប់គឺជាភាគរយដែលត្រូវព្រួយបាម្ភ»។
កម្ពុជាបានចាប់ផ្តើមផ្ទុះករណីឆ្លងជំងឺកូវីដ-១៩ ដំបូងចាប់ពីដើមឆ្នាំ២០២០ រហូតមកដល់បច្ចុប្បន្ន។
បើតាមក្រសួងសុខាភិបាល គិតត្រឹមព្រឹកថ្ងៃទី១ ខែវិច្ឆិកា ឆ្នាំ២០២១នេះ កម្ពុជាមានអ្នកឆ្លងជំងឺកូវីដ-១៩ ចំនួន ១១៨ ៦១៣នាក់ ក្នុងនោះអត្រាអ្នកស្លាប់ឡើងដល់ ២ ៧៩៤នាក់៕
