មន្ត្រីពន្ធនាគារ បានដោះលែងសកម្មជនបរិស្ថាន សកម្មជនអតីតបក្សប្រឆាំង និងក្រុមស្ត្រីក្លាហាន សរុបចំនួន ១២រូបទៀត ចេញពីពន្ធនាគារ នៅល្ងាចថ្ងៃសុក្រនេះ។
សកម្មជនដែលត្រូវបានដោះលែងនោះ មានដូចជា យុវជនមាតាធម្មជាតិ លោក ថុន រដ្ឋា កញ្ញា ស៊ុន រដ្ឋា លោក យឹមលាងហ៊ី លោក លី ចាន់ដារ៉ាវុធ កញ្ញា ភួន កែវរស្មី និងកញ្ញា ឡុង គន្ធា, សកម្មជនស្ត្រីក្លាហាន ៥នាក់ និងសកម្មជនអតីតគណបក្សសង្គ្រោះជាតិ លោក តុន និមល។
កាលពីថ្ងៃទី៥ ខែឧសភា ឆ្នាំ២០២១ ចៅក្រមសាលាដំបូងរាជធានីភ្នំពេញ បានសម្រេចផ្ដន្ទាទោស ស្ថាបនិកចលនាមាតាធម្មជាតិ និងសកម្មជនមាតាធម្មជាតិ ៤នាក់ ដាក់ពន្ធនាគារចន្លោះពី១៨ទៅ២០ខែ ពាក់ព័ន្ធបទ «ញុះញង់ និងសមគំនិត»។ ក្រៅពីនេះ តុលាការក្រុងភ្នំពេញក៏បានកាត់ទោសសកម្មជនបរិស្ថាននៃចលនាមាតាធម្មជាតិ កញ្ញា ភួន កែវរស្មី និងកញ្ញា ឡុង គន្ធា ព្រមទាំងកញ្ញា ជា គន្ធីន ឱ្យជាប់ពន្ធនាគាររយៈពេល១៨ខែ និងពិន័យប្រាក់៤លានរៀលដូចគ្នា។
ចំណែកលោក ថុន រដ្ឋា ត្រូវផ្ដន្ទាទោសដាក់ពន្ធនាគារ២០ខែ និងពិន័យជាប្រាក់៤លានរៀល ឬប្រហែល១ ០០០ដុល្លារ ពីបទ «ញុះញង់រំខានដល់សន្តិសុខសង្គម» ខណៈស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន (Alejandro Gonzalez-Davidson) ត្រូវបានផ្ដន្ទាទោសដាក់ពន្ធនាគារ២០ខែ និងពិន័យជាប្រាក់៤លានរៀលពីបទ «សមគំនិតក្នុងរឿងញុះញង់»។
ដោយឡែក យុវជនបរិស្ថានមាតាធម្មជាតិ៣រូបផ្សេងទៀត ក្នុងនោះ មានកញ្ញា ស៊ុន រដ្ឋា លោក យឹម លាងហ៊ី និងលោក លី ចាន់ដារ៉ាវុធ បានរងនូវការចោទប្រកាន់ ពីបទ «រួមគំនិតក្បត់» និង «ប្រមាថអង្គព្រះមហាក្សត្រ»។
តែយ៉ាងណា សាលាឧទ្ធរណ៍ បានកាត់តម្រឹមទោសសកម្មជនបរិស្ថាន និងសកម្មជននយោបាយ ដោយឱ្យអនុវត្តទោសក្នុងពន្ធនាគារម្នាក់ៗជាង១ឆ្នាំ ខណៈទោសដែលនៅសល់ត្រូវព្យួរសាកល្បង៕