ក្រសួងសុខាភិបាលបានបន្តរកឃើញអ្នកឆ្លងជំងឺកូវីដ-១៩ថ្មី ចំនួន ៦០នាក់បន្ថែមទៀត ខណៈអ្នកជំងឺចំនួន ៥នាក់ បានស្លាប់កាលពីម្សិលមិញ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១២ ខែវិច្ឆិកា ឆ្នាំ២០២១ បានឱ្យដឹងថា យោងតាមលទ្ធផលបញ្ជាក់ដោយ PCR test កាលពីម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ ចំនួន ៦០ នាក់បន្ថែមទៀត ក្នុងនោះ ករណីនាំចូលពីក្រៅប្រទេសចំនួន ៧ នាក់ ខណៈអ្នកជំងឺដែលស្លាប់ ៥ នាក់ ដែលក្នុងនោះមានអ្នកមិនបានចាក់វ៉ាក់សាំងការពារ ៣ នាក់។
ក្រៅពីរកឃើញអ្នកឆ្លង និងអ្នកស្លាប់ កាលពីម្សិលមិញ ក្រសួងថា ក៏មានអ្នកជំងឺកូវីដ-១៩ ចំនួន ៦៥ នាក់បានជាសះស្បើយផងដែរ។
បើតាមក្រសួងសុខាភិបាល គិតត្រឹមថ្ងៃទី១៣ ខែវិច្ឆិកា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ-១៩ សរុប ១១៩ ៤៨១ នាក់ ក្នុងនោះ ករណីនាំចូលពីក្រៅប្រទេសចំនួន ១៩ ៧២៩ នាក់ អ្នកជំងឺព្យាបាលជាសះស្បើយចំនួន ១១៥ ៨៦២ នាក់ និង អ្នកស្លាប់កើនដល់ចំនួន២ ៨៦១ នាក់៕