ប្រជាពលរដ្ឋមួយចំនួន រស់នៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ចោទក្រុមហ៊ុនមួយថាបានបូមខ្សាច់លុបបឹង ធ្វើឱ្យទឹកហៀរចេញជន់លិចភូមិឋាន និងផ្ទះសម្បែងរបស់ពួកគេ។
កាលពីថ្ងៃទី១៦ ខែវិច្ឆិកានេះ អ្នកភូមិប្រមាណ ៤០នាក់ នាំគ្នាផ្តិតមេដៃ និងដាក់ពាក្យបណ្តឹងទៅសាលាសង្កាត់ព្រែកប្រា ដើម្បីសុំឱ្យចៅសង្កាត់ លោក ងិន ធីរ៉ូ ជួយដោះស្រាយករណីក្រុមហ៊ុនមួយ ដែលពួកគេមិនស្គាល់ឈ្មោះ បានបូមខ្សាច់ធ្វើឱ្យលិចភូមិ និងផ្ទះសម្បែងរបស់ពួកគេ។
អ្នកស្រី សុខ ឆេងលីម រស់នៅភូមិអូរអណ្តូង១ សង្កាត់ព្រែកប្រា ប្រាប់វីអូឌីនៅព្រហស្បតិ៍នេះថា ក្រុមហ៊ុនមួយបានបូមខ្សាច់លុបបឹងក្បែរភូមិ ដោយបានបង្កឱ្យទឹកហៀរចេញពីបឹងលិចផ្ទះពលរដ្ឋជាង ៤០គ្រួសារ រយៈពេលជាង៤ខែហើយ ដោយពុំមានការដោះស្រាយពីអាជ្ញាធរពាក់ព័ន្ធឡើយ។
ពលរដ្ឋរូបនេះ ឱ្យដឹងថា មកដល់បច្ចុប្បន្ន ផ្ទះអ្នកភូមិខ្លះ បានលិចត្រឹមជង្គង់ និងខ្លះទៀតលិចរហូតមិនអាចរស់នៅបានឡើយ ក្នុងនោះគ្រួសារអ្នកស្រីផ្ទាល់បានសម្រេចចាកចេញពីផ្ទះ ទៅរស់នៅជាមួយម្តាយទីទួលសុវត្ថិភាព។ អ្នកស្រីបន្តថា ករណីនេះ បានធ្វើប្រជាពលរដ្ឋជួបបញ្ហាលំបាកជាច្រើន ដូចជាពិបាករកទទួលទាន ធ្វើដំណើរ និងការរស់នៅជាដើម។
អ្នកស្រីបន្ថែមថា៖ «ជាក់ស្តែងគ្រួសារខ្ញុំតែម្តង ពេលនេះខ្ញុំអត់បាននៅហ្នឹងទៀតទេ។ ខ្ញុំបានមកនៅជាមួយម្តាយខ្ញុំនៅភ្នំពេញបណ្តោះអាសន្ន ដោយសារផ្ទះខ្ញុំហ្នឹងនៅលែងកើតហើយ វាលិចខ្លាំងតែម្តង។ ហើយអ្នកខ្លះកូនៗអត់បានទៅរៀនទេ ដោយសារទឹកលិចខ្លាំងធ្វើដំណើរអត់កើត។ បើអ្នកណាអត់មានផ្ទះបងប្អូននៅកន្លែងគោក គឺទ្រាំរស់នៅក្នុងទឹកហ្នឹងតែម្តង»។
អ្នកស្រី ម៉ម ចាន់ធារី រស់នៅភូមិអូរអណ្តូង១ម្នាក់ទៀត មានប្រសាសន៍ថា ករណីក្រុមហ៊ុនបូមខ្សាច់ធ្វើឱ្យជន់លិចផ្ទះពលរដ្ឋនេះ គឺពលរដ្ឋបានរាយការណ៍ទៅអាជ្ញាធរសង្កាត់ជាច្រើនដងហើយ ប៉ុន្តែរហូតពេលនេះ នៅតែពុំមានដំណោះស្រាយដដែល។
ពលរដ្ឋរូបនេះ បារម្ភខ្លាចកើតមានគ្រោះថ្នាក់ផ្សេងៗ ដូចជា បញ្ហាសុខភាព ការឆក់ខ្សែភ្លើង និងក្មេងៗលង់ទឹកជាដើម។ អ្នកស្រីបានស្នើដល់អាជ្ញាធរពាក់ព័ន្ធចុះពិនិត្យ និងដោះស្រាយជូនពលរដ្ឋឱ្យបានឆាប់។
អ្នកស្រីបន្ថែមថា៖ «យើងបារម្ភខ្លាចក្មេងៗតូចៗ វាលង់ទឹក និងអ្នកភៀសខ្លួនទៅនៅផ្ទះបងប្អូនអស់ហើយខ្លាចឆក់ខ្សែភ្លើង អ្នកខ្លះខាតពេលរកស៊ី លក់អីក៏មិនកើតដែរ»។
ចៅសង្កាត់ព្រែកប្រា លោក ងិន ធីរ៉ូ មានប្រសាសន៍ថា លោកបានចុះទៅពិនិត្យមើលរួចហើយ និងកំពុងធ្វើការដោះស្រាយបណ្តើរៗ តាមរយៈការកាយបង្ហូរទឹកចេញពីភូមិវិញ។
វីអូឌី បានសួររកឈ្មោះក្រុមហ៊ុន និងគោលបំណងនៃការបូមខ្សាច់លុបបឹងនោះ ប៉ុន្តែចៅសង្កាត់រូបនេះ មិនប្រាប់ឡើយ។
លោកថា៖ «យើងកំពុងរកវិធីសាស្ត្រដើម្បីបង្ហូរទឹកចេញឱ្យអស់។ ព្រឹកមិញនេះ យើងធ្វើបានមួយចំនួនហើយ ហើយយើងកំពុងរកវិធីថា នឹងត្រូវធ្វើយ៉ាងម៉េចទៀត ដើម្បីរំដោះទឹកនោះឱ្យអស់»។
ក្រុមអង្គការសិទ្ធិមនុស្សនិងសិទ្ធិដីធ្លីចំនួន៤ រួមមាន អង្គការលីកាដូ បណ្ដាញយុវជនកម្ពុជា អង្គការសមធម៌កម្ពុជា និងអង្គការសមាគមធាងត្នោត អំឡុងខែកក្កដា ឆ្នាំ២០២០ បានចេញរបាយការណ៍រួមមួយ ដោយបង្ហាញថា ជាង៩០ភាគរយនៃបឹងក្នុងខណ្ឌមានជ័យ រាជធានីភ្នំពេញ នឹងត្រូវបានលុប បើសិនជាការអភិវឌ្ឍនៅតែបន្តកើតមានឡើង។
របាយការណ៍ដដែល បន្តថា គុណភាពជីវិតរបស់ពលរដ្ឋប្រមាណពី១លានទៅ២លាននាក់ដែលរស់នៅក្នុងរាជធានីភ្នំពេញ ក្រុងតាខ្មៅ ខេត្តកណ្ដាល និងតាមបណ្ដោយច្រាំងទន្លេមេគង្គ និងទន្លេបាសាក់ អាចនឹងមានផលប៉ះពាល់ធ្ងន់ធ្ងរពីការលុបបឹងទាំងនេះ។
ចំណែករបាយការណ៍របស់អង្គការសមាគមធាងត្នោត ចេញផ្សាយកាលពីចុងឆ្នាំ២០១៩ បានបង្ហាញថា ចាប់តាំងពីឆ្នាំ១៩៩០មក រដ្ឋាភិបាលបានលុបបឹងធម្មជាតិនៅក្នុងរាជធានីភ្នំពេញ អស់ចំនួន ១៦បឹងហើយ។ ចំណែកបឹងនៅសល់ចំនួន១០ទៀត កំពុងប្រឈមការចាក់លុបដោយផ្នែកៗជាបណ្ដើរៗ។
របាយការណ៍នេះ លើកឡើងថា ការលុបបឹងទាំងនោះ អាចធ្វើឱ្យក្រុងភ្នំពេញរងការគម្រាមកំហែង ដោយគ្រោះទឹកជំនន់ទាំងជំនន់ទឹកភ្លៀង និងទឹកជំនន់ពីប្រព័ន្ធទន្លេមេគង្គ៕