អភិបាលរាជធានីភ្នំពេញ អះអាងថា ខ្លួនបានឱ្យមន្ត្រីក្រោមឱវាទចុះទៅពិនិត្យមើល និងដោះស្រាយករណីក្រុមហ៊ុនបូមខ្សាច់មួយ បានចាក់ដីលុបបឹង ធ្វើឱ្យទឹកហៀរចេញជន់លិចភូមិ និងផ្ទះសម្បែងរបស់ប្រជាពលរដ្ឋនៅសង្កាត់ព្រែកប្រា ខណ្ឌច្បារអំពៅ។
កាលពីថ្ងៃទី១៦ ខែវិច្ឆិកានេះ អ្នកភូមិប្រមាណ ៤០នាក់ នាំគ្នាផ្តិតមេដៃ និងដាក់ពាក្យបណ្តឹងទៅសាលាសង្កាត់ព្រែកប្រា ដើម្បីសុំឱ្យចៅសង្កាត់ លោក ងិន ធីរ៉ូ ជួយដោះស្រាយករណីក្រុមហ៊ុនបូមខ្សាច់ធ្វើឱ្យលិចភូមិ និងផ្ទះសម្បែងរបស់ពួកគេ។
អភិបាលរាជធានីភ្នំពេញ លោក ឃួង ស្រេង ប្រាប់វីអូឌីនៅថ្ងៃសុក្រនេះថា ក្រោយទទួលបានព័ត៌មាននេះលោកបានឱ្យអភិបាលខណ្ឌច្បារអំពៅ និងអាជ្ញាធរពាក់ព័ន្ធចុះទៅពិនិត្យ និងរកដំណោះស្រាយជូនពលរដ្ឋហើយ។
លោកបន្ថែមថា៖ «យើងកំពុងធ្វើការដោះស្រាយបញ្ហានេះ ជូនពលរដ្ឋហើយ អាជ្ញាធរខណ្ឌគាត់បានចុះពិនិត្យនឹងធ្វើការងារនេះជាបណ្តើរហើយដែរ»។
អ្នកស្រី ម៉ម ចាន់ធារី រស់នៅភូមិអូរអណ្តូង១ សង្កាត់ព្រែកប្រា ឱ្យដឹងថា រហូតមកដល់ម៉ោង ៣រសៀលថ្ងៃសុក្រនេះ គឺពុំទាន់ឃើញអាជ្ញាធរណាចុះទៅដោះស្រាយ ឬបូមចេញពីភូមិនៅឡើយទេ ហើយទឹកបន្តជន់លិចកាន់តែខ្លាំងថែមទៀត។
ពលរដ្ឋរូបនេះ លើកឡើងថា ករណីទឹកជន់លិចភូមិ និងផ្ទះសម្បែងប្រជាពលរដ្ឋនេះ មានរយៈពេលជាង ៤ខែហើយ ហើយបានបង្កផលប៉ះពាល់ដល់ការរកទទួលទាន និងការរស់នៅរបស់ប្រជាពលរដ្ឋជាខ្លាំង។
អ្នកស្រីបន្ថែមថា៖ «មានបងប្អូនខ្លះ រត់ចោលផ្ទះហើយ អត់អាចនៅបានទេ ពីព្រោះអត់មានឡៅតឿដាំបាយអត់កើត កូនតូចៗទៀត ទឹកស្អុយទៀត ហើយលូបង្គន់ស្ទះឡើងមក បទជើងបទដៃអត់កើត អីចឹងនៅម៉េចកើត។ មួយទៀតខ្លាចឆក់ខ្សែភ្លើង ព្រោះហ្វ្រីភ្លើងខ្លះនៅទាប ទឹកលិចវាអាចមានគ្រោះថ្នាក់»។
ពលរដ្ឋរស់នៅភូមិអូរអណ្តូង១ម្នាក់ទៀត លោក សេង យ៉ុម និយាយថា គ្រួសារលោកបានចាកចេញពីផ្ទះទៅនៅជាមួយបងប្អូនកន្លែងទីទួលសុវត្ថិភាពហើយ ដោយសារផ្ទះរបស់លោកលិចជ្រៅពេក មិនអាចរស់នៅបាន។ លោកថា មានផ្ទះពលរដ្ឋប្រមាណ៤០គ្រួសារ ដែលបានជន់លិចដោយសារក្រុមហ៊ុនបូមខ្សាច់លប់បឹងនេះ។ លោកថា ករណីទឹកជន់លិចភូមិនេះ បានធ្វើឱ្យប្រជាពលរដ្ឋខូចខាតទ្រព្យសម្បត្តិមួយចំនួនផងដែរ។
លោកបន្ថែមថា៖ «ខ្ញុំបានរត់មកនៅផ្ទះម៉ាក់ក្មេកខ្ញុំ៣ថ្ងៃហើយ ដោយសារទឹកលិចផ្ទះនៅអត់កើត។ បង្គន់អនាម័យអីលិចអស់ ប្រើអត់កើតទេ»។
វីអូឌី មិនអាចសុំឆ្លើយតបពីអភិបាលខណ្ឌច្បារអំពៅ លោក ចេង មុនីរ៉ា និងចៅសង្កាត់ព្រែកប្រា លោក ងិន ធីរ៉ូ បានទេនៅថ្ងៃសុក្រនេះ។
ប៉ុន្តែ លោក ងិន ធីរ៉ូ ប្រាប់វីអូឌីកាលពីម្សិលមិញថា លោកបានចុះដោះស្រាយករណីនេះតាំងពីថ្ងៃម្សិលមិញ ដោយបានកាយបង្ហូរទឹកចេញពីភូមិជាបណ្តើរៗ។
ប្រធានកម្មវិធីនៃសមាគមធាងត្នោត លោក ឯម ខេមរ៉ា មានប្រសាសន៍ថា អាជ្ញាធរត្រូវពិនិត្យមើលអាជ្ញាប័ណ្ណ នៃការបូមខ្សាច់របស់ក្រុមហ៊ុន ថាតើការបូមខ្សាច់របស់ក្រុមហ៊ុននេះ មានច្បាប់អនុញ្ញាតដែរឬទេ និងត្រូវដោះស្រាយផលប៉ះពាល់ជូនពលរដ្ឋឱ្យបានឆាប់ ដើម្បីកុំឱ្យពលរដ្ឋបន្តរងទុក្ខលំបាកទៀត។
មន្ត្រីសង្គមស៊ីវិលរូបនេះ លើកឡើងថា ការលប់បឹងនាពេលកន្លងមក បានធ្វើឱ្យបាត់បង់កន្លែងស្តុកទឹក និងមានការជន់លិចទីក្រុងកាន់តែខ្លាំង រួមទាំងធ្វើឱ្យបាត់បង់ប្រភពចំណូលរបស់ប្រជាពលរដ្ឋ ដែលរស់នៅជុំវិញបឹងផងដែរ។
លោកបន្ថែមថា៖ «អាជ្ញាធរពាក់ព័ន្ធគួរតែឆ្លើយតប ឬរកវិធីសាស្ត្រក្នុងការដោះស្រាយជូនពលរដ្ឋទៅតាមច្បាប់ ដើម្បីឆ្លើយតបទៅហ្នឹងផលប៉ះពាល់នានារបស់ប្រជាពលរដ្ឋ ដែលបណ្តាលមកពីការបូមខ្សាច់នេះ។ ហើយអាជ្ញាធរ និងក្រុមហ៊ុន គួរតែពិនិត្យមើលលើលទ្ធភាព នៃការផ្តល់ជាសំណងផ្នែកសង្គមជូនពលរដ្ឋដែលប៉ះពាល់ ដោយសារការលិចទឹកហ្នឹង»។
របាយការណ៍របស់អង្គការសមាគមធាងត្នោត ចេញផ្សាយកាលពីចុងឆ្នាំ២០១៩ បានបង្ហាញថា ចាប់តាំងពីឆ្នាំ១៩៩០មក រដ្ឋាភិបាលបានលុបបឹងធម្មជាតិនៅក្នុងរាជធានីភ្នំពេញ អស់ចំនួន ១៦បឹងហើយ។ ចំណែក បឹងនៅសល់ចំនួន ១០ទៀត កំពុងប្រឈមការចាក់លុបដោយផ្នែកៗជាបណ្ដើរៗ។ របាយការណ៍នេះ លើកឡើងថា ការលុបបឹងទាំងនោះ អាចធ្វើឱ្យរាជធានីភ្នំពេញ រងការគំរាមកំហែង ដោយគ្រោះទឹកជំនន់ទាំងជំនន់ទឹកភ្លៀង និងទឹកជំនន់ពីទន្លេមេគង្គ៕