មន្រ្តីនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ឱ្យដឹងថា ចំនួនអ្នកចុះឈ្មោះ និងអ្នកមកពិនិត្យបញ្ជីឈ្មោះ សម្រាប់ការបោះឆ្នោតឆ្នាំ២០២២ គឺមានសន្ទុះជាងឆ្នាំចាស់ ដែលនាំឱ្យដំណើរការរៀបចំបញ្ជីឈ្មោះបោះឆ្នោតថ្មីនេះ លើសពីផែនការដែលបានគ្រោងទុក។
យោងតាមប្រតិទិនដែលចេញដោយ គ.ជ.ប បញ្ជាក់ថា ការចុះឈ្មោះ និងការពិនិត្យបញ្ជីឈ្មោះបោះឆ្នោតឆ្នាំ២០២១នេះ នឹងត្រូវបិទបញ្ចប់នៅទូទាំងប្រទេស នាថ្ងៃទី៣០ ខែវិច្ឆិកា ខាងមុខនេះ។
មន្រ្តីនាំពាក្យ គ.ជ.ប លោក ហង្ស ពុទ្ធា ថ្លែងនៅថ្ងៃសុក្រនេះថា ថ្វីត្បិតស្ថាប័នជាតិ ដែលរៀបចំការបោះឆ្នោតមួយនេះ មិនទាន់បានបិទការិយាល័យរបស់ខ្លួនក្តី សម្រាប់តួលេខបណ្តោះអាសន្ន ដែល គ.ជ.ប ទទួលបាន គឺមានចំនួនជិតទ្វេដង គិតត្រឹមថ្ងៃទី១៨ ខែវិច្ឆិកានេះ បើធៀបនឹងឆ្នាំមុន។
លោកបន្ថែមទៀតថា លទ្ធផលដែលសម្រេចបានលើសពីផែនការ ដែលបានគ្រោងទុកនេះ មានន័យថា អង្គបោះឆ្នោតមានទំនុកចិត្តខ្ពស់ ចំពោះស្ថាប័ន គ.ជ.ប។
លោកបន្តថា៖ «ខ្ញុំសូមជម្រាបថា លទ្ធផលបណ្តោះអាសន្ននៅក្នុងបញ្ជីបោះឆ្នោតនៅឆ្នាំ២០២១នេះ បានកើនដល់ ៩លាន១៣ម៉ឺន៤ពាន់៩៩២នាក់ (៩ ១៣៤ ៩៩២នាក់) ហើយបើគិតជាភាគរយស្មើនិង ៨៧,៣១% នៃចំនួនប្រជាពលរដ្ឋដែលមានអាយុចាប់ពី១៨ឆ្នាំឡើង ដូច្នេះបញ្ជីបោះឆ្នោតឆ្នាំ២០២១នេះ នឹងកើនលើសឆ្នាំ២០២០ហ្នឹង ចំនួន២,២៥%»។
លោក ហង្ស ពុទ្ធា បញ្ជាក់ថា ទន្ទឹមនឹងភាពជោគជ័យនេះ គ.ជ.ប ក៏ជួបឧបសគ្គច្រើនណាស់ដែរ ក្នុងពេលដាក់ឱ្យអនុវត្តផែនការ សម្រាប់ចុះឈ្មោះ និងពិនិត្យបញ្ជីឈ្មោះបោះឆ្នោតថ្មីនេះ។ បើតាមអ្នកនាំពាក្យរូបនេះ អ្វីដែលជាឧបសគ្គនោះ គឺក្រៅពីត្រូវប្រឈមនឹងវិបត្តិជំងឺកូវីដ-១៩ ហើយកត្តាអាកាសធាតុ និងបញ្ហាបច្ចេកទេស ក៏ជាមូលហេតុដែលនាំឱ្យរាំងស្ទះដល់ដំណើរការនេះដែរ។
សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់លើកនេះ គណៈកម្មាធិការជាតិរៀបចំការបោះឆ្នោត សម្រេចប្រើពេលយូរ រហូតដល់៥០ថ្ងៃ ក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត។
តែយ៉ាងណា លោក ហង្ស ពុទ្ធា ចាត់ទុកករណីនេះថា ជាការដាក់ឱ្យអនុវត្តច្រើនថ្ងៃ ដែលពុំធ្លាប់មាន ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពី៤អាណត្តិកន្លងទៅនេះ គ.ជ.ប ដាក់ឱ្យអនុវត្តត្រឹមតែ ២០ថ្ងៃប៉ុណ្ណោះ។
នាយកប្រតិបត្តិការអង្គការនិចហ្វិក ដែលឃ្លាំមើលដំណើការបោះឆ្នោតនៅកម្ពុជា លោក សំ គន្ធាមី សាទរចំពោះលទ្ធផលបណ្តោះអាសន្ន ដែលគ.ជ.ប ទទួលបាននៅពេលនេះ។ ប៉ុន្តែ លោកថា គេនៅមិនទាន់អាចប៉ាន់ប្រមាណបាននៅឡើយទេ អំពីលទ្ធផលធំ គឺត្រូវរង់ចាំរហូតដល់លទ្ធផលនៅក្រោយការបោះឆ្នោតសិន ទើបអាចវាយតម្លៃបានថា ការប្រព្រឹត្តទៅនៃដំណើរការរៀបចំការបោះឆ្នោតនេះ មានផលវិជ្ជមានបែបណាខ្លះ។
លោកបន្តថា៖ «សម្រាប់ការបោះឆ្នោតឆ្នាំក្រោយនេះ ក៏យើងមិនទាន់ថាវាយតម្លៃនៅឡើយទេ។ នេះគ្រាន់តែជាការចុះឈ្មោះបោះឆ្នោតទេ។ ចំណែក ការបោះឆ្នោតជារឿងផ្សេងមួយទៀត»។
បើតាមអ្នកនាំពាក្យ គ.ជ.ប គិតត្រឹមថ្ងៃទី១៨ ខែវិច្ឆិកានេះ មានអ្នកសង្កេតការណ៍ជាតិជាង ៤ ០០០នាក់ ដែលមកពីអង្គការសមាគមចំនួន ១៥ស្ថាប័ន និងភ្នាក់ងារសង្កេតការណ៍ពីខាងគណបក្សនយោបាយចំនួនជាង ៥ ៥០០នាក់ មកពីគណបក្សចំនួន៨ បានចុះឈ្មោះសង្កេតការណ៍ការបោះឆ្នោតក្រុមប្រឹក្សាឃុំសង្កាត់ឆ្នាំ២០២២ ខាងមុខនេះ។
ឆ្លើយតបនឹងការរិះគន់កន្លងមក ដែលថា ស្ថាប័ន គ.ជ.ប មិនអាចជឿទុកចិត្តបាន និងមិនមានភាពឯករាជ្យ បើធៀបនឹង គ.ជ.ប កាលពីមុនឆ្នាំ២០១៧ នោះ លោក ហង្ស ពុទ្ធា អះអាងថា ក្តីកង្វល់នោះវាស្ថិតនៅខាងក្រៅនៃបញ្ហា ហើយផ្ទុយទៅវិញ គ.ជ.ប បានអនុវត្តអព្យាក្រឹត្យភាពរបស់ខ្លួនដោយផ្អែកលើច្បាប់ដែលមានជាធរមាន៕