អតីតសកម្មជនគណបក្សប្រឆាំងម្នាក់ទៀត ត្រូវសមត្ថកិច្ចថៃចាប់បញ្ជូនខ្លួនមកឱ្យអាជ្ញាធរកម្ពុជានៅថ្ងៃទី២០ ខែវិច្ឆិកានេះ បន្ទាប់ពីអតីតសកម្មជនបក្សប្រឆាំងរូបនេះ បានភៀសខ្លួនទៅរស់នៅប្រទេសថៃ ក្រោយពីគណបក្សសង្គ្រោះជាតិត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧។
ប្រភពពីប្រធានប្រតិបត្តិខេត្តស្វាយរៀងមកពីអតីតគណបក្សសង្គ្រោះជាតិដែលកំពុងភៀសខ្លួននៅប្រទេសថៃ លោក ម៉ៅ វិបុល ប្រាប់វីអូឌីនៅថ្ងៃសៅរ៍នេះថា អាជ្ញាធរកម្ពុជាបានសហការជាមួយអាជ្ញាធរថៃចាប់ខ្លួនអ្នកស្រី ឡាញ់ ថាវរី កាលពីថ្ងៃទី១៩ ខែវិច្ឆិកា ឆ្នាំ២០២១។ លោកបន្តថា ក្រោយពីឃុំខ្លួនអ្នកស្រី ឡាញ់ ថាវរី មួយយប់ អ្នកស្រីត្រូវបានអាជ្ញាធរថៃបញ្ជូនមកឱ្យកម្ពុជាវិញនៅថ្ងៃទី២០ ខែវិច្ឆិកា ឆ្នាំ២០២១នេះ។
លោក ម៉ៅ វិបុល ចាត់ទុកការចាប់ខ្លួនអតីតសកម្មជនបក្សប្រឆាំងដែលកំពុងភៀសខ្លួននៅប្រទេសថៃនាពេលនេះថា ជាការបំបាក់ស្មារតីពួកគាត់ដែលនៅតែបន្តរិះគន់ការដឹកនាំរបស់លោកនាយករដ្ឋមន្ត្រីហ៊ុន សែន។
លោកថា៖ «ទោះបីយ៉ាងណាក៏ដោយ ក៏សកម្មជននៅតែតស៊ូ មិនបាក់ទឹកចិត្តនឹងក្រុមលោក ហ៊ុន សែន ធ្វើរបៀបទាំងកម្រោលហើយសហការជាមួយម្ចាស់ហត្ថលេខីពាក់ព័ន្ធនឹងសិទ្ធិមនុស្ស ពាក់ព័ន្ធនឹងជនភៀសខ្លួន UNHCR ប៉ុន្តែមិនបានការពារអ៊ីចឹង យើងព្រួយបារម្ភ។ រឿងទាំងនេះ យើងមើលទៅរបបលោក ហ៊ុន សែន ទោះបីបំបាក់ប៉ុណ្ណាក៏ដោយ ក៏សកម្មជនគណបក្សសង្គ្រោះជាតិ ហើយហ្នឹងថ្នាក់ដឹកនាំជាពិសេសមេឃុំចៅសង្កាត់ក៏គាត់មិនមានការតក់ស្លុតនៅតែខំប្រឹងប្រែង ទោះបីយ៉ាងណា យើងនៅតែខំការពារសិទ្ធិសេរីភាពរបស់យើង»។
ចំណែកសមាជិកក្រុមប្រឹក្សានៅខេត្តកំពង់ចាមមកពីអតីតគណបក្សសង្គ្រោះជាតិដែលកំពុងភៀសខ្លួននៅប្រទេសថៃ អ្នកស្រី គិន ស្រីអូន បានឱ្យដឹងដែរថា ការចាប់ខ្លួនអ្នកស្រី ឡាញ់ ថាវរី ធ្វើឡើងពីរថ្ងៃ បន្ទាប់ពីអ្នកស្រីបានដើរប្រមូលស្នាមមេដៃពលករនៅម្ដុំផ្ទះជួលរបស់គាត់ ដើម្បីប្រឆាំងនឹងការលក់ឡៃឡុងទីស្នាក់ការគណបក្សសង្គ្រោះជាតិ។ អ្នកស្រីបន្តថា អាជ្ញាធរថៃបានទៅចាប់ខ្លួនអ្នកស្រី ឡាញ់ ថាវរី នៅម៉ោង ២ រសៀល កាលពីថ្ងៃទី១៩ ខែវិច្ឆិកា ជាមួយពលរកម្នាក់ទៀត ប៉ុន្តែពលករម្នាក់ដែលត្រូវចាប់ជាមួយនោះ សមត្ថកិច្ចបានដោះលែងវិញ លើកលែងអ្នកស្រី ឡាញ់ ថាវរី ត្រូវបានបញ្ជូនមកកម្ពុជាវិញនៅថ្ងៃទី២០ ខែវិច្ឆិកា ឆ្នាំ២០២១។
អ្នកស្រី៖ «រយៈពេលកន្លងមក គាត់ធ្លាប់ឡាយវីដេ អូ (Live) និយាយរឿងនយោបាយ ហើយ ២ទៅ៣ថ្ងៃនេះ គាត់ធ្វើសកម្មភាពនៅបន្ទប់ផ្ទះជួលដូចថា បងប្អូនខ្មែរគាត់មករកស៊ី និងធ្វើការនៅថៃ ក្នុងខេត្តស្រះកែវ ស្រុកអារ៉ាញ់ អ៊ីចឹងឱ្យខ្មែរៗយើងហ្នឹង គាត់ជួយផ្ដិតមេដៃដាក់ឈ្មោះ ដាក់អី ជួយគាំទ្រការពារទីស្នាក់ការគណបក្សសង្គ្រោះជាតិ កុំឱ្យគេលក់ឡៃឡុងហ្នឹង។ គាត់ធ្វើសកម្មភាពគឺចាប់ពីថ្ងៃទី១៧ ដល់ថ្ងៃទៅទី១៩ គេទៅចាប់គាត់តែម្ដង»។
វីអូឌីនៅមិនអាចសុំការបញ្ជាក់ពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បាននៅឡើយទេនៅថ្ងៃសៅរ៍នេះ។
អ្នកស្រី ឡាញ់ ថាវរី ជាមេឃុំជាប់ឆ្នោតមកពីអតីតគណបក្សសង្រ្គោះជាតិ ឃុំឬស្សីក្រោក ស្រុកមង្គលបុរី ខេត្តបន្ទាយមានជ័យ និងជាជនភៀសខ្លួននយោបាយនៅប្រទេសថៃ បន្ទាប់ពីតុលាការកំពូលរំលាយគណបក្សសង្គ្រោះជាតិកាលពីឆ្នាំ២០១៧។ នេះជាលើកទី២ហើយ ដែលអាជ្ញាធរចាប់ខ្លួនអតីតសកម្មជនគណបក្សសង្គ្រោះជាតិកំពុងភៀសខ្លួននៅក្នុងប្រទេសថៃ បញ្ជូនមកកម្ពុជាវិញ បន្ទាប់ពីការចាប់ខ្លួនអតីតសកម្មជនគណបក្សសង្គ្រោះជាតិពីរនាក់ គឺលោក វឿន វាសនា និងលោក វឿង សំណាង កាលពីថ្ងៃទី៨ ខែវិច្ឆិកា ឆ្នាំ២០២១៕
