សមត្ថកិច្ចមូលដ្ឋាននៅខណ្ឌជ្រោយចង្វារអះអាងថា មន្ត្រីជំនាញកំពុងស្រាវជ្រាវរកឃាតករដែលបានកាប់យុវជនជាសកម្មជនអតីតគណបក្សសង្គ្រោះជាតិម្នាក់ជាច្រើនកាំបិតបណ្តាលឱ្យស្លាប់ភ្លាមៗ នៅម្តុំវត្តចាស់ សង្កាត់ជ្រោយចង្វារ រាជធានីភ្នំពេញ។
នាយនគរបាលប៉ុស្តិ៍សង្កាត់ជ្រោយចង្វារ លោក ចាន់ ប៊ុនធឿន មានប្រសាសន៍នៅថ្ងៃអាទិត្យនេះថា តាមការស៊ើបអង្កេតបឋមសមត្ថកិច្ចរកឃើញថា សកម្មជនអតីតគណបក្សសង្គ្រោះ ឈ្មោះ ស៊ិន ខុន ត្រូវជនល្មើសយកកាំបិតផ្គាក់កាប់ប្រហែល៧កាំបិត ត្រូវកញ្ចឹងក ខ្នង និងជើង បណ្តាលឱ្យស្លាប់នៅកន្លែងកើតហេតុ។ លោកថា អំពើឃាតកម្មនេះកើតឡើង ស្ថិតនៅមុំវត្តចាស់ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ កាលពីវេលាម៉ោងប្រហែល១យប់ ថ្ងៃទី២១ ខែវិច្ឆិកា ឆ្នាំ២០២១ ទំនងជាផ្តើមចេញពីរឿងគំនុំ។
លោក ចាន់ ប៊ុនធឿន បញ្ជាក់ថា សពត្រូវបានរក្សាទុកនៅក្នុងវត្តចាស់ ហើយនៅព្រឹកថ្ងៃអាទិត្យនេះ សមត្ថកិច្ចចម្រុះបានចុះធ្វើកោសល្យវិច័យសព និងប្រមូលភស្តុតាង សាក្សី ដែលឃើញហេតុការណ៍ផ្ទាល់ ដើម្បីស្រាវជ្រាវចាប់ជនល្មើសមកផ្តន្ទាទោសតាមច្បាប់ ។
លោកមានប្រសាសន៍ថា៖ « យើងអត់ដឹងពីអត្តសញ្ញាណអ្វីនៅឡើយ ខាងជំនាញព្រហ្មទណ្ឌកំពុងចុះមកស្រាវជ្រាវរកជនល្មើស ឥឡូវយើងអត់អាចសន្និដ្ឋានភ្លាមៗបានទេ ទុកឱ្យខាងជំនាញធ្វើការងារហ្នឹងសិន»។
ព្រះតេជគុណ ណុប វណ្នី គង់នៅ«វត្តពោធិយារាម» ហៅ«វត្តចាស់» មានថេរដីកាថា ជនរងគ្រោះស្នាក់នៅក្នុងវត្តជាមួយព្រះអង្គ និងធ្វើការនៅហាងលក់សម្ភារសំណង់មួយកន្លែង។ ព្រះអង្គមានសង្ឃដីកាថា មុនពេលកើតហេតុឈ្មោះ ស៊ិន ខុន និងមិត្តភក្តិដែលជាកូនសិស្សព្រះសង្ឃនៅវត្តចាស់២ទៅ៣នាក់ នាំគ្នាអង្គុយផឹកស្រានៅមាត់ទន្លេទប់មុខវត្ត រហូតដល់ម៉ោងជិត១យប់ ។
ក្រោយពីផឹកស្រារួច ស៊ិន ខុន និងមិត្តភ័ត្ត នាំគ្នាចូលវត្តវិញ ប៉ុន្តែនៅពេលមកដល់មុខវត្ត ត្រូវក្រុមជនល្មើសមានគ្នាប្រហែលជា៣នាក់ ក្នុងនោះមានមួយនាក់យកកាំបិតផ្គាក់កាប់លើ ស៊ិន ខុន បណ្តាលឱ្យស្លាប់នៅកន្លែងកើតហេតុ រួចរត់គេចខ្លួនតែម្តង។
ព្រះអង្គមានថេរដីកាបន្តថា ស៊ិន ខុន ជាមនុស្សស្លូតបូត រួសរាយ មិនដែលមានជម្លោះជាមួយអ្នកណាទេ ។ ប៉ុន្តែព្រះអង្គសង្ស័យថា ការកាប់សម្លាប់ ស៊ិន ខុន ទំនងកើតចេញពីរឿងនយោបាយច្រើនជាងរឿងគំនុំផ្ទាល់ខ្លួន ត្បិតលោក ស៊ិន ខុន ធ្លាប់ត្រូវបានជនមិនស្គាល់មុខលួចវាយត្រូវក្បាលបណ្តាលឱ្យរបួសធ្ងន់ម្តងហើយ ដោយសារសរសេរសាររិះគន់ថ្នាក់ដឹកនាំបក្សកាន់អំណាចនៅលើបណ្តាញសង្គមកាលពីពេលកន្លងមក។
ទោះជាយ៉ាងណា ព្រះអង្គបិណ្ឌបាតដល់សមត្ថកិច្ច និងស្ថាប័នពាក់ព័ន្ធត្រូវស្រាវជ្រាវរកឃាតករ ដើម្បីផ្តល់យុត្តិធម៌ដល់ជនរងគ្រោះ ។
ព្រះអង្គបិណ្ឌបាតដូចនេះថា៖ «សូមឱ្យសមត្ថកិច្ចស្រាវជ្រាវចាប់ជនដៃដល់ ព្រោះវាយគ្នាពីរដងហើយ។ លើកមុននោះស្ងាត់បាត់ឈឹងទៅ លើកនេះវាយគ្នាឱ្យស្លាប់ យុត្តិធម៌មិនមានដល់ ស៊ិន ខុនទេ ។ ត្មានសង្ឃឹមថា ប៉ូលិសនឹងដោះស្រាយ ស៊ើបអង្កេតរកឃាតករ ដើម្បីយកមកផ្តន្ទាទោស»។
បន្ថែមពីនេះ ព្រះអង្គមានថេរដីកាថា សពរបស់ ស៊ិន ខុន ត្រូវតម្កល់ទុកនៅវត្តចាស់ ដើម្បីទុកឱ្យសមត្ថកិច្ចធ្វើកោសល្យវិច័យ និងទុកឱ្យឪពុកម្តាយ និងសាច់ញាតិយកទៅធ្វើបុណ្យតាមប្រពៃណី ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ដែលតាមដានរឿងនេះ អះអាងថា កន្លងមកជនរងគ្រោះធ្លាប់ដាក់ពាក្យប្តឹងទៅសមត្ថកិច្ចម្តងរួចមកហើយ ពាក់ព័ន្ធនឹងជនល្មើសប្រើហិង្សាលើលោក ស៊ិន ខុន បណ្តាលឱ្យរងរបួសធ្ងន់ធ្ងរ។ ប៉ុន្តែសមត្ថកិច្ចមិនទាន់ចាប់ជនល្មើសមកផ្តន្ទាទោសនៅឡើយ។ លោកថា ករណីនេះជាការធ្វេសប្រហែសរបស់សមត្ថកិច្ច ដែលបណ្តែតបណ្តោយឱ្យជនល្មើសតាមសម្លាប់ជនរងគ្រោះរហូតដល់ស្លាប់។
មន្ត្រីសង្គមស៊ីវិលរូបនោះយល់ថា បើអាជ្ញាធរពាក់ព័ន្ធមិនស្រាវជ្រាវចាប់ជនល្មើសមកផ្តន្ទាទោសតាមច្បាប់ ទេ នឹងធ្វើឱ្យសេរីភាពបញ្ចេញមតិធ្លាក់ចុះ ហើយធ្វើឱ្យមានវប្បធម៌និទណ្ឌភាពបន្តកើតឡើងនៅកម្ពុជា។
លោកយល់ដូចនេះថា៖ «ជាការគំរាមកំហែងធ្ងន់ធ្ងរមួយដែលសម្រាប់អ្នកបញ្ចេញមតិតាមបណ្តាញសង្គមជាពិសេសអ្នកដែលរិះគន់ចំពោះទង្វើផ្សេងៗរបស់មន្ត្រី ឬថ្នាក់ដឹកនាំបក្សកាន់អំណាច។ បើសិនជាករណីនេះសមត្ថកិច្ចមិនស្វែងរកជនដែលប្រព្រឹត្តមិនឃើញ វានឹងធ្វើឱ្យអ្នកប្រព្រឹត្តបន្តប្រព្រឹត្តរឿងបែបនេះទៀត ដោយសារពួកគេមិនខ្លាចច្បាប់»។
កាលពីថ្ងៃទី១២ ខែឧសភា ឆ្នាំ២០២១ ស៊ិន ខុន អាយុ៣១ឆ្នាំ អតីតសកម្មជនគណបក្សសង្គ្រោះជាតិ ត្រូវបានជនមិនស្គាល់មុខចំនួន៤នាក់ព្រួតគ្នាវាយដោយដំបងដែក បណ្តាលឱ្យរងរបួសត្រង់ក្បាល លើចិញ្ចើមខាងឆ្វេង និងដៃខាងឆ្វេង ហូរឈាមស្រោចខ្លួន ស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ខណៈសំណុំរឿងហិង្សាទៅលើអតីតសកម្មជនរូបនេះនិងមន្ត្រីបក្សប្រឆាំងមុនៗ មិនទាន់ត្រូវបានសមត្ថកិច្ចរាយការណ៍ថាបានរកឃើញជនល្មើសមកផ្តន្ទាទោសតាមច្បាប់នៅឡើយ។
ក្រោយប្រើហិង្សា អតីតយុវជនបក្សប្រឆាំង លោក ស៊ិន ខុន ធ្លាប់អះអាងថា ករណីហិង្សាទៅលើរូបលោកនេះ គឺពាក់ព័ន្ធនឹងការគំរាមកំហែងផ្នែកនយោបាយ ដោយសារលោកគ្មានជម្លោះឬជំពាក់បំណុលជាមួយអ្នកណាទេពីមុនមក ប៉ុន្តែលោកឧស្សាហ៍បង្ហោះរឿងនយោបាយលើបណ្តាញសង្គម និងបានចុះចែកអំណោយដល់ពលរដ្ឋខ្វះខាតដោយសារវិធានបិទខ្ទប់ជាដើម ។
កាលពីថ្ងៃទី២៧ ខែមេសា កុមារាម្នាក់ឈ្មោះ កាក់ សុវណ្ណច្ឆ័យ វ័យ១៥ឆ្នាំ ដែលជាកូនប្រុសបង្កើតរបស់អតីតមន្ត្រីគណបក្សសង្រ្គោះជាតិ លោក កាក់ កុម្ភារៈ ត្រូវបានជនមិនស្គាល់មុខជិះម៉ូតូយកដុំឥដ្ឋគប់លើបណ្តាលឱ្យរងរបួសក្បាលធ្ងន់ធ្ងរ ពេលកំពុងជិះម៉ូតូដឹកម្តាយត្រឡប់ពីទិញដំឡូងក្បែរផ្ទះ ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ ហើយករណីនេះ សមត្ថកិច្ចនៅមិនទាន់ចាប់ខ្លួនជនល្មើសយកមកផ្តន្ទាទោសតាមច្បាប់បាននៅឡើយ៕