អតីតប្រធានគណបក្សសង្រ្គោះជាតិ លោក កឹម សុខា បានលើកឡើងថា តាមរយៈសកម្មភាពលោក សម រង្ស៊ី និងសហការីរបស់ខ្លួនកន្លងមក ពិសេសសកម្មភាពថ្មីៗនេះ បានបញ្ជាក់ឲ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ត្បិតសកម្មភាពទាំងអស់នោះមិនមានការគាំទ្រ ឬ ជាជំហររបស់លោកឡើយ។
ទំព័រហ្វេសប៊ុករបស់លោក កឹម សុខា អតីតប្រធានគណបក្សសង្គ្រោះជាតិ បង្ហោះសារនៅថ្ងៃទី២៨ ខែវិច្ឆិកានេះថា មួយរយៈកាលចុងក្រោយនេះ លោក សម រង្ស៊ី និងសហការីនៅតែបន្តយកឈ្មោះ និងរូបថតរបស់លោកទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញាតិ ឬគាំទ្រពីរូបលោកនោះទេ ។
លើសនេះលោកបញ្ជាក់ថា លោក សម រង្ស៊ី និងសហការីបានដើរចេញពីគោលការណ៍ និងស្មារតីដើមនៃការរួបរួម ហើយទៅបង្កើតចលនានយោបាយផ្សេងៗ និងមុខតំណែងខ្លួនឯង ជាពិសេសថ្មីៗនេះ បានត្រឡប់ទៅគាំទ្រដោយចំហរ ឬពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន។
លោកកឹម សុខា បញ្ជាក់ថា៖ « ទង្វើរបស់ពួកគេសបញ្ជាក់ឲ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះ មិនមានការគាំទ្រ ឬ ជាជំហររបស់ខ្ញុំឡើយ»។
លោក កឹម សុខា បន្តថា ៖ «អាស្រ័យហេតុនេះ ខ្ញុំសូមអំពាវនាវឲ្យលោក សម រង្ស៊ី និង ក្រុមខាងលើ ឈប់បំពានមកលើរូបខ្ញុំដោយការយកឈ្មោះ និងរូបថតខ្ញុំ ទៅប្រើប្រាសភ្ជាប់ជាមួយសកម្មភាពមហិច្ឆិតានយោបាយរបស់ខ្លួន ដែលធ្វើឲ្យសាធារណមតិជាតិ និង អន្តរជាតិមានការភ័ន្តច្រឡំ។ ខ្ញុំសូមបញ្ជាក់ផងដែរថា ខ្ញុំមិនពាក់ព័ន្ធ និង មិនទទួលខុសត្រូវចំពោះសកម្មភាពរបស់លោក សម រង្ស៊ី និង ក្រុមនោះឡើយ»។
មនុស្សស្និទ្ធ និងជាអតីតនាយកខុទ្ទកាល័យលោក កឹម សុខា គឺ លោក មុត ចន្ថា បញ្ជាក់ថាលោកនៅចំការ មិនបានដឹងរឿងនេះទេ។ ដោយឡែកសហមេធាវីរបស់អតីតមេបក្សប្រឆាំងរូបនេះ រួមមាន អ្នកស្រី ម៉េង សុភាវី និងលោក ផែង ហេង ថាជាប់រវល់ ខណៈលោក ចាន់ ចេន មិនអាចទាក់ទងបានទេនៅថ្ងៃទី២៨ ខែវិច្ឆិកានេះ។
វីអូឌីបានព្យាយាមទាក់ទងទៅអតីតប្រធានគណបក្សសង្រ្គោះជាតិលោក សម រង្ស៊ី និងលោក អេង ឆៃអ៊ាង អតីតអនុប្រធានគណបក្សប្រឆាំងមួយនេះតាមបណ្តាញសង្គមហ្វេសប៊ុកឆាត ប៉ុន្តែមិនមានការឆ្លើយតបឡើយនៅថ្ងៃអាទិត្យនេះ។
យ៉ាងណាក្តី ក្នុងសេចក្តីថ្លែងការណ៍ចេញផ្សាយកាលពីថ្ងៃទី២៦ ខែវិច្ឆិកា ឆ្នាំ២០២១ បានឱ្យដឹងដែរថា ក្រុមអ្នកគាំទ្រអតីតគណបក្សសង្គ្រោះជាតិប្រចាំសហរដ្ឋអាមេរិក (CNRP-USA) ក៏បានអំពាវនាវដល់លោក សម រង្ស៊ី និងក្រុមអ្នកគាំទ្ររបស់លោក ឱ្យបញ្ឈប់ការយកឈ្មោះ និងរូបភាពរបស់លោក កឹម សុខា ទៅប្រើប្រាស់ដើម្បីបំភ័ន្ត និងបិទបាំងទង្វើទុច្ចរិត ដើម្បីកេងចំណេញប្រយោជន៍បុគ្គល និងបក្ខពួករបស់ខ្លួនជាបន្តបន្ទាប់ផងដែរ។
សេចក្តីថ្លែងការណ៍ដដែលក៏បានចោទប្រកាន់ លោក សម រង្ស៊ី និងក្រុមគាំទ្ររបស់លោកថាបានចាកចេញទៅបង្កើតចលនាខុសច្បាប់ លើកបន្តុបតួនាទីខ្លួនឯង បានប្រមាថព្រះមហាក្សត្រ និងពេលថ្មីៗនេះបានប្រកាសគាំទ្រគណបក្សនយោបាយផ្សេង ដែលបញ្ជាក់ឱ្យឃើញកាន់តែច្បាស់ នូវទង្វើប្រាសចាក និងដើរផ្ទុយពីស្មារតីដើម នៃការរួបរួមជាមួយលោក កឹម សុខា តទៅទៀតហើយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ក្រុមអតីតអ្នកគាំទ្រលោក សម រង្ស៊ី និងសហការី និងអ្នកវិភាគមួយចំនួន ដែលធ្លាប់តែនិយាយក្តែងៗថា លោក សម រង្ស៊ី និងលោកកឹម សុខា ជាមនុស្សតែមួយ មិនពិតទេ។
នៅពេលសួរថា នេះជាការជោគជ័យរបស់គណបក្សកាន់អំណាច ក្នុងការផ្តួលដៃគូប្រកួតរបស់ខ្លួនដែរឬទេ? លោកឆ្លើយយ៉ាងខ្លីថា ការបែកបាក់ផ្ទៃក្នុងរវាងលោក សម រង្ស៊ី និងលោក កឹម សុខា គ្រាន់តែជាផ្នែកតួចមួយរបស់គណបក្សកាន់អំណាចក្នុងការចំណេញផ្នែកនយោបាយ ដោយថាការជោគជ័យរបស់គណបក្សកាន់អំណាចផ្តើមចេញជាចម្បងធំៗនោះ ស្នាដៃរបស់ថ្នាក់ដឹកនាំកំពូលរបស់គណបក្សទៅវិញ។
លោកមានប្រសាសន៍ថា៖ «គណបក្សប្រជាជនអត់ចង់បានដៃគូប្រកួតដែលបែកបាក់គ្នា យកមកធ្វើជាការជោគជ័យរបស់ខ្លួនឯងទេ ជោគជ័យរបស់គណបក្សគឺកើតចេញពីស្នាដៃនិងគុណសម្បត្តិរបស់គណបក្សប្រជាជនដោយខ្លួនឯង មិនមែនដោយសារការបែកបាក់របស់ដៃគូប្រកួតទេ ក៏ប៉ុន្តែក៏វាចូលរួមចំណែកនៃការផ្តល់ការជោគជ័យឱ្យគណបក្សប្រជាជនកម្ពុជាដែរ»។
យ៉ាងណា អ្នកស្រាវជ្រាវសង្គម លោកបណ្ឌិត សេង សារី មានប្រសាសន៍ថា គាត់ហាក់នៅមានមន្ទិលសង្ស័យដែលហ្វេសប៊ុករបស់លោក កឹម សុខា បង្ហោះសារថា លោក សម រង្ស៊ី និងលោក កឹម សុខា មិនមែនជាមនុស្សតែមួយ ត្បិតលោកថាសារនេះអាចអ្នកកាន់ផេករបស់លោកជាអ្នកផុស ព្រោះគាត់ស្ថិតនៅក្រោមការត្រួតពិនិត្យរបស់តុលាការមិនអាចនិយាយបែបនេះនោះទេ ។
ប៉ុន្តែលោកថា បើសិនជាលោក កឹម សុខា សរសេរសារថា លោកនិងលោក សម រង្ស៊ី ពិតជាមិនមែនជាមនុស្សតែមួយមែន មិនសមហេតុផលនោះទេ ដោយថាលោក កឹម សុខា ជាប្រធានអតីតគណបក្សសង្គ្រោះជាតិ ហើយមិនបានប្រកាសលាលែងពីបក្សនោះទេ ។
ករណីនេះលោកថា ការបែបបាក់គ្នារវាងលោក សម រង្ស៊ី និងលោក កឹម សុខា នេះ ជាសញ្ញាល្អ ឬជាការជោគជ័យរបស់គណបក្សកាន់អំណាចទៅវិញ ។
លោកមានប្រសាសន៍ថា៖ «បើយើងមើលមុំល្បែងនយោបាយ សេចក្តីប្រកាសនេះជាការជោគជ័យរបស់គណបក្សកាន់អំណាច ក្នុងការបំបែកលោក សម រង្ស៊ី និងលោក កឹម សុខា ចេញពីគ្នា ប៉ុន្តែគ្រាន់តែលោក កឹម សុខា ដើរតួចេញមុខប្រកាសឱ្យគណបក្សកាន់អំណាចតែប៉ុណ្ណោះ»។
សម្ព័ន្ធភាពសម រង្ស៊ី និង កឹម សុខា ជាមនុស្សតែមួយ ត្រូវបានបង្កើតឡើងក្រោយពេលគណបក្សប្រឆាំងធំពីរនៅកម្ពុជា គឺ គណបក្ស សម រង្ស៊ី ដឹកនាំដោយលោក សម រង្ស៊ី និងគណបក្សសិទ្ធិមនុស្ស ដឹកនាំដោយលោក កឹម សុខា បានសម្រេចច្របាច់បញ្ចូលគ្នា បង្កើតជាគណបក្សសង្រ្គោះជាតិឡើង កាលពីឆ្នាំ២០១២នៅទីក្រុងម៉ានីល ប្រទេសម៉ាឡេស៊ី។ គណបក្សសង្រ្គោះជាតិពេលនោះ សម្រេចតែងតាំងលោក សម រង្ស៊ី ជាប្រធានបក្ស ហើយលោកកឹម សុខា ជាអនុប្រធាន ហើយរូបភាពចាប់ដៃគ្នារវាងថ្នាក់ដឹកនាំទាំងពីរដោយបញ្ជាក់ពីជំហរ សម រង្ស៊ី និងកឹម សុខា ជាមនុស្សតែមួយក៏ត្រូវបានប្រើរហូតមក។
ក្រោយពីការចាប់ដៃគ្នាបង្កើតទៅជាគណបក្សសង្រ្គោះជាតិពេលនោះ គណបក្សប្រឆាំងធំមួយនេះបានទទួលការគាំទ្ររហូតដល់៥៥អាសនៈនៃលទ្ធផលបោះឆ្នោតជាតិឆ្នាំ២០១៣ និងទទួលបានអាសនៈក្រុមប្រឹក្សាឃុំ សង្កាត់ជាង៥ពាន់អាសនៈ និងមេឃុំ ចៅសង្កាត់ជិត៥រយនាក់ ពោលគឺជាចំនួនស្មើជិតពាក់កណ្តាលនៃអាសនៈសរុបទូទាំងប្រទេស អំឡុងពេលលោកកឹម សុខា ធ្វើជាប្រធានគណបក្សសង្រ្គោះជាតិពេលនោះ។
៣ខែក្រោយការបោះឆ្នោតក្រុមប្រឹក្សាឃុំ សង្កាត់ នាពេលយប់រំលងអធ្រាត្រ ថ្ងៃទី៣ខែកញ្ញាឆ្នាំ២០១៧ លោក កឹម សុខា ត្រូវបានសមត្ថកិច្ចចូលចាប់ខ្លួន យកឃុំនៅពន្ធនាគារត្រពាំងផ្លុង ក្រោមបទចោទពីលោក ហ៊ុន សែន ថា ក្បត់ជាតិ។
ទោះបីជាមកដល់ពេលនេះ លោក កឹម សុខា មិនទាន់ត្រូវបានកាត់ទោសនៅឡើយ ប៉ុន្តែគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦វិច្ឆិកា ឆ្នាំ២០១៧។ អាសនៈមន្ត្រីបក្សប្រឆាំងតាំងពីថ្នាក់មូលដ្ឋាន រហូតដល់ថ្នាក់ព្រឹទ្ធសភា ត្រូវបានគេដកហូតយកទៅចែកគណបក្សផ្សេង ហើយលោក កឹម សុខា និងមន្រ្តីជាន់ខ្ពស់បក្សប្រឆាំងសរុប១១៧រូបផ្សេងទៀត ក៏ត្រូវបានតុលាការកំពូលហាមឃាត់ធ្វើនយោបាយរយៈពេល៥ឆ្នាំផងដែរ៕