មន្ត្រីជាន់ខ្ពស់អង្គភាពប្រឆាំងអំពើពុករលួយACU អះអាងថា ស្ថាប័នខ្លួនកំពុងធ្វើការស៊ើបអង្កេតលើរបាយការណ៍ដែលមន្ត្រី និងអ្នកពាក់ព័ន្ធផ្សេងទៀតបានកាប់ទន្ទ្រានយកដីព្រៃលិចទឹកក្នុងខេត្តកំពង់ឆ្នាំង និងកំពង់ធំនាពេលកន្លងមក។
កាលពីថ្ងៃទី៣ ខែធ្នូ ឆ្នាំ២០២១ទីស្ដីការគណៈរដ្ឋមន្ត្រី បានចេញលិខិតមួយដោយឱ្យក្រសួងរៀបចំដែន នគរូបនីយកម្ម និងសំណង , ក្រសួងកសិកម្មរុក្ខាប្រមាញ់ និងនេសាទ និង អង្គភាពប្រឆាំងអំពើពុករលួយ រួមទាំងក្រសួងពាក់ព័ន្ធផ្សេងទៀត ធ្វើការស៊ើបអង្កេតលើការកាប់ទន្ទ្រានដីព្រៃលិចទឹកនៅបឹងទន្លេសាប។
លិខិតដដែលក៏បានប្រគល់ភារកិច្ចឱ្យអង្គភាពប្រឆាំងអំពើពុករលួយ ស៊ើបអង្កេត និងចាត់វិធានការចំពោះលោក ឈួរ ច័ន្ធឌឿន អតីតអភិបាលខេត្តកំពង់ឆ្នាំង និងដកហូតដីព្រៃលិចទឹកជាង២១០០ ហិកតា ដែលបានកាប់ទន្ទ្រានយកដោយខុសច្បាប់មកវិញ។
ក្រៅពីអង្គភាពប្រឆាំងអំពើពុករលួយស៊ើបអង្កេតនោះ ក្រសួងកសិកម្ម និងក្រសួងធនធានទឹក ត្រូវចាត់វិធានការពារដីរដ្ឋក្នុងដែនព្រៃលិចទឹក ដើម្បីធានានិរន្តរភាពផងដែរ។
អនុប្រធានអង្គភាពប្រឆាំងអំពើពុករលួយ លោក ឃាង សេង ប្រាប់វីអូឌីកាលពីម្សិលមិញថា អង្គភាពនេះ បាននឹងកំពុងស៊ើបអង្កេតលើរបាយការណ៍ទន្ទ្រានដីព្រៃលិចទឹក ប៉ុន្តែចំពោះការរកឃើញមន្ត្រី និងអ្នកពាក់ព័ន្ធប៉ុន្មាននាក់នោះ លោកសុំមិនធ្វើអត្ថាធិប្បាយឡើយ។
លោកថា៖«ខ្ញុំមិនអាចប្រាប់ចំនួនប៉ុន្មាននាក់បានទេ ដោយសារ ការស៊ើបអង្កេតទាំងអស់ ត្រូវរក្សាការសម្ងាត់ទៅតាមនីតិវិធីទាំងអស់»។
នៅពេលសួរថា តើមកដល់ថ្ងៃពេលនេះ អង្គភាពប្រឆាំងអំពើពុករលួយបានប្រមូលដីព្រៃលិចទឹកដែលកាប់ទន្ទា្រនមកវិញមានប៉ុន្មានហិកតាដែរ? លោក ឃាង សេង ក៏សុំមិនធ្វើអត្ថាធិប្បាយចំពោះរឿងនេះដែរ។
កាលពីថ្ងៃទី២៩ ខែសីហា ឆ្នាំ២០១១ រដ្ឋាភិបាលបានចេញអនុក្រឹត្យមួយស្ដីពីការកំណត់ដែនព្រៃលិចទឹកប្រមាណ៦៥ម៉ឺនហិកតា ស្ថិតក្នុងខេត្តចំនួន៦ជុំវិញបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ។
វីអូឌីមិនអាចសុំការបញ្ជាក់បន្ថែមពីរដ្ឋមន្ត្រី ក្រសួងកសិកម្មរុក្ខាប្រមាញ់ និងនេសាទ លោក វេង សាខុន និងរដ្ឋមន្ត្រីក្រសួងរៀបចំដែន នគរូបនីយកម្ម និងសំណង លោក ជា សុផារ៉ាបានទេ នៅថ្ងៃនេះ។
មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ មានប្រសាសន៍ថា ប្រជាពលរដ្ឋនឹងធ្វើការតាមដានចំពោះចំណាត់ការរបស់អង្គភាពប្រឆាំងអំពើពុករលួយ និងស្ថាប័នពាក់ព័ន្ធដែលកំពុងធ្វើការងារនេះ។
លោកជំរុញឱ្យស្ថាប័នទាំងនោះ បំពេញការងារនេះ ដោយតម្លាភាព និងត្រូវចាប់ខ្លួនអ្នក ពាក់ព័ន្ធរួមទាំងមន្ត្រី ដែលបានគប់គិតគ្នាប្រព្រឹត្តអំពើពុករលួយមកដាក់ទោសតាមច្បាប់ ដើម្បីជាគំរូល្អសម្រាប់អ្នកជំនាន់ក្រោយ និងបញ្ចៀសការចោទប្រកាន់ថា ការអនុវត្តមានស្ដង់ដារពីរជាដើម។
លោកថា៖«អ៊ីចឹងច្បាប់មិនអាចយកទៅកាត់ ២ ទៅ ៣ នាក់ទេ ដែលប្រព្រឹត្តបទល្មើសពុករលួយទេ ត្រូវកាត់ទាំងអស់។ បើកាត់ទាំងអស់ វាត្រូវប៉ះពាល់ទាំងអស់ហ្នឹង ពីព្រោះយើងឃើញថា បទល្មើសឧក្រិដ្ឋ មជ្ឈឹមកើតឡើង សម្រេចបាន គឺអាស្រ័យអំពើពុករលួយស៊ីសំណូកសូប៉ាន់ហ្នឹង។ បើសិនជាអាជ្ញាធរមន្ត្រីជំនាញ លោកបំពេញកាតព្វកិច្ចបានម្លេះ សមការកាប់រាន ដីព្រៃលិចទឹកនៅបឹងទន្លេសាប មិនអាចកើតឡើងនៅទូទាំងប្រទេសទេ។ យើងគិតថា វាមានអំពើពុករលួយជាប្រព័ន្ធហ្នឹង»។
លោក ប៉ែន ប៊ុណ្ណារ៍ បង្ហាញការសោកស្ដាយនៅពេលដែលប្រមុខរដ្ឋាភិបាល ប្រកាសបន្ធូរបន្ថយទោស ចំពោះអ្នកចេញសារភាព បើទោះបីជាមន្ត្រី និងអ្នកទាំងនោះ បានកាប់រានទន្ទ្រានដីព្រៃលិចទឹករបស់រដ្ឋដោយខុសច្បាប់ក៏ដោយ។
ការកាប់រានដីព្រៃ មិនមែនធ្វើឡើងតែនៅបឹងទន្លេសាបនោះទេ លោកថា នៅ ខេត្តភាគឦសានក៏បានកើតមានការកាប់បំផ្លាញដីព្រៃជាច្រើនផងដែរ ដោយមិនមានអាជ្ញាធរណាទប់ស្កាត់ ខណៈពលរដ្ឋដែលសកម្មចេញមុខការពារដីព្រៃ ដើម្បីផលប្រយោជនជាតិ បែរជាត្រូវបានអាជ្ញាធរចោទប្រកាន់ និងចាប់ខ្លួនទៅវិញ។
កាលពីថ្ងៃទី២៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានព្រមានចាត់វិធានការច្បាប់លើមន្ត្រីទាំងឡាយណាដែលពាក់ព័ន្ធការរំលោភដីព្រៃលិចទឹកនៅជុំវិញតំបន់បឹងទន្លេសាប និងព្រមានដកហូតទ្រព្យសម្បត្តិរបស់ពួកគេដាក់ជាសម្បត្តិរដ្ឋ។ លោកបានលើកឡើងចំឈ្មោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ដោយថា បានទន្ទ្រានដីព្រៃលិចទឹកនៅតំបន់បឹងទន្លេសាបក្នុងខេត្តកំពង់ឆ្នាំង ជាង២ ០០០ ហិកតា ដើម្បីយកមកធ្វើជាកម្មសិទ្ធិផ្ទាល់ខ្លួន។
ក្រោយការព្រមានរបស់លោក ហ៊ុន សែន នៅថ្ងៃទី២៩ ខែវិច្ឆិកា ឆ្នាំ២០២១ ក៏មានអ្នកកាន់កាប់អាស្រ័យផលដីព្រៃលិចទឹក១៣នាក់ បានសារភាពនិងប្រគល់ដីនោះជូនរដ្ឋវិញ។
អ្នកទាំង ១៣ នាក់នោះរួមមានស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ មានដី៦៧៥ហិកតា, នាយការិយាល័យ លោក កែវ ណារុន មានដី៣២ហិកតា, មេបញ្ជាការសឹករងស្រុកកំពង់លែង លោក យឹម សារ៉ាត់ មានដី៦០ហិកតា និងពលរដ្ឋផ្សេងទៀត ដែលមានផ្ទៃដីសរុបជាង២ ០៥៨ហិកតា។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បង្ហើបថា អ្នកដែលពាក់ព័ន្ធបទល្មើសទន្ទ្រានយកដីព្រៃលិចទឹកជុំវិញបឹងទន្លេសាបនេះ នឹងត្រូវបន្ធូរបន្ថយទោស ប្រសិនបើពួកគេចេញមកសារភាព៕
