ក្រសួងរៀបចំដែនដី នគរូបនីយកម្ម និងសំណង់ ប្រាប់អាជ្ញាធរខេត្តពោធិ៍សាត់ ត្រូវចេញលិខិតបដិសេធលើឯកសារទិញលក់ដីនៅក្នុងតំបន់បឹងទន្លេសាបទាំងអស់ ដោយដកហូតដីខុសច្បាប់ទាំងនោះជូនរដ្ឋវិញ និងកសាងសំណុំរឿងបញ្ជូនជនល្មើសទៅតុលាការចាត់វិធានការច្បាប់។
ក្នុងសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងនៅថ្ងៃអាទិត្យនេះថា រដ្ឋមន្ត្រីក្រសួងដែនដី លោក ជា សុផារ៉ា សហការជាមួយអភិបាលខេត្តពោធិ៍សាត់ និងមន្ត្រីពាក់ព័ន្ធផ្សេងទៀត បានចុះពិនិត្យទីតាំងដីដែលត្រូវបានជនខិលខូចទន្ទ្រានយកធ្វើជាកម្មសិទ្ធិ ក្នុងដែនព្រៃលិចទឹក នៃតំបន់បឹងទន្លេសាប ស្ថិតនៅភូមិសាស្ត្រខេត្តពោធិ៍សាត់ នៅថ្ងៃទី៥ខែធ្នូនេះ។
ក្រោយពីចុះពិនិត្យស្រាវជ្រាវ លោក ជា សុផារ៉ា និងមន្ត្រីពាក់ព័ន្ធមកពីអន្តរក្រសួងផ្សេងទៀតបានដាក់ចេញនូវវិធានការជូនទៅអភិបាលខេត្តពោធិ៍សាត់ លោក ជាវ តាយ ណែនាំទៅអាជ្ញាធរស្រុក ឃុំ បញ្ឈប់ការពិនិត្យបញ្ជាក់លើលិខិតសុំកាន់កាប់ដី និងលិខិតផ្ទេរសិទ្ធិកាន់កាប់ដីក្នុងដែនព្រៃលិចទឹក ព្រមទាំងចេញលិខិតបដិសេធលើលិខិតដែលចេញពីមុន កំណត់អត្តសញ្ញាណអ្នកទន្ទ្រាន កសាងសំណុំរឿងបញ្ជូនទៅតុលាការចាត់វិធានការតាមច្បាប់។
ទន្ទឹមនឹងចាត់វិធានការច្បាប់ អាជ្ញាធរត្រូវឱ្យជនល្មើសដាំដើមឈើឡើងវិញលើដីដែលបានទន្ទ្រានយកកន្លងមក ហើយដើមឈើដែលជាអាទិភាពត្រូវដាំនោះ គឺដាំដើមឬស្សី។
បន្ថែមពីនេះរដ្ឋមន្ត្រីក្រសួងរៀបចំដែនដីរូបនោះ លើកទឹកចិត្តដល់កងរាជអាវុធហត្ថលើផ្ទៃប្រទេសដែលដាក់កម្លាំងចុះល្បាតតាមគោលដៅ ដើម្បីទប់ស្កាត់ការទន្ទ្រានដីព្រៃលិចទឹក និងអនុវត្តវិធានការច្បាប់ ហើយក្រសួងធនធានទឹក និងឧតុនិយម ទទួលបន្ទុកដាំបង្គោលព្រំដែនព្រៃលិចទឹកដែលខ្វះ និងដួលរលំ រួមទាំងដាក់ពាក្យសុំចុះបញ្ជីដីរដ្ឋនូវដីព្រៃលិចទឹកតំបន់ទន្លេសាប ។ ចំណែក ពលរដ្ឋដែលដំាដំណាំស្រូវ ទុកឱ្យពួកគាត់ប្រមូលផល រួចស្នើឱ្យធ្វើលិខិតទទួលកំហុស និងប្រគល់ដីព្រៃលិចទឹកជូនរដ្ឋវិញ ។
វីអូឌី មិនអាចសុំការបំភ្លឺបន្ថែមពីរដ្ឋមន្ត្រីក្រសួងរៀបចំដែនដីនគររូបនីយកម្ម និងសំណង់ លោក ជា សុផារ៉ា និងអ្នកនាំពាក្យក្រសួងរៀបចំដែនដី លោក សេង ឡូត បានទេនៅរសៀលថ្ងៃអាទិត្យនេះ ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា មិនមានអ្វីចំឡែកទេ ពេលរដ្ឋមន្ត្រីក្រសួងរៀបចំដែនដីប្រាប់ឱ្យអភិបាលខេត្តពោធិ៍សាត់ដូច្នេះ ត្បិតរឿងនេះកើតឡើងជាច្រើនឆ្នាំមកហើយ ជាពិសេសមន្ត្រីជាន់ខ្ពស់រដ្ឋាភិបាលតែងតែទន្ទ្រានយកដីព្រៃលិចទឹក និងដីសាធារណៈរបស់រដ្ឋនៅក្នុងខេត្តមណ្ឌលគិរី និងខេត្តរតនគិរីជាដើម ។
មន្ត្រីសិទ្ធិមនុស្សរូបនោះជំរុញទៅរដ្ឋាភិបាលពង្រឹងអនុវត្តច្បាប់លើជនល្មើសឱ្យបានតឹងរឹង និងមានតម្លាភាពរវាងអ្នកមាន និងអ្នកក្រ ទើបកាត់បន្ថយមិនឱ្យអំពើល្មើសច្បាប់បែបនេះកើតឡើងបន្តទៀត ។
លោកជំរុញដូចនេះថា៖ «ត្រូវអនុវត្តច្បាប់អត់លើកលែងទេ វាចូលបទល្មើសព្រហ្មទណ្ឌ តាមពិតការប្រកាសថា ជនល្មើសារភាពប្រគល់ដីមកវិញ ហើយអត់ដាក់ទោសជាការអនុវត្តខុសច្បាប់ តាមច្បាប់អត់មានការលើកលែងទេ មិនថាមន្ត្រីជាន់ណា ថ្នាក់ខ្ពស់ណាទេ ឬប្រជាពលរដ្ឋអីទេ គឺត្រូវអនុវត្តស្មើគ្នាចំពោះមុខច្បាប់»។
ក្នុងពិធីសម្ពោធហេដ្ឋារចនាសម្ព័ន្ធផ្លូវ ស្ថានីយប្រព្រឹត្តកម្មទឹកកខ្វក់ និងសមិទ្ធផលនានា ក្នុងខេត្តព្រះសីហនុ នៅថ្ងៃទី២ ខែធ្នូនេះ លោកនាយករដ្ឋមន្ត្រី ហ៊ុន សែន បានថ្លែងថា ប្រសិនបើបុគ្គលណាប្រគល់ដីដែលខ្លួនបានឈូសឆាយរំលោភពីព្រៃលិចទឹកនៅតាមបណ្ដាខេត្តក្នុងតំបន់បឹងទន្លេសាបមកឱ្យរដ្ឋ គឺពួកគេរួចខ្លួន ហើយថា ប្រសិនបើបុគ្គលណានៅរឹងទទឹង ត្រូវវាយខ្នោះឱ្យខាងតែបាន។
លោកបន្ថែមថា៖ «បើរឹងទទឹង វាយខ្មោះភ្លាមៗ អត់ឱ្យមានរញ៉រញ៉ៃ។ ឥលូវឮថា ចុះហត្ថលេខាប្រគល់ដី ប្រគល់រួចខ្លួន ដកខ្លួន អ្នកណាមិនសារភាព តាមវាយខ្នោះ»។
មាត្រា៩៨ នៃច្បាប់ស្ដីពីជលផល បានចែងថា ការកាប់ឆ្ការ គាស់រាន ឈូសឆាយព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង ត្រូវផ្ដន្ទាទោសពី៣ឆ្នាំទៅ៥ឆ្នាំ ហើយវត្ថុតាងទាំងអស់ត្រូវរឹបអូសជាសម្បត្តិរដ្ឋឬបំផ្លាញចោល។
ចំណែកមាត្រា១០២ នៃច្បាប់ដដែលនេះបានបញ្ជាក់ថា បើបទល្មើសនោះប្រព្រឹត្តឡើងដោយអាជ្ញាធរដែនដី មន្ត្រីនគរបាល មន្ត្រីយោធា និងមន្ត្រីពាក់ព័ន្ធផ្សេងទៀត ត្រូវផ្ដន្ទាទោសពី១ឆ្នាំទៅ៣ឆ្នាំ និងពិន័យជាប្រាក់ពី៥លានរៀល ទៅ៥០លានរៀល។
កាលពីថ្ងៃទី២៩ ខែសីហា ឆ្នាំ២០១១ រដ្ឋាភិបាលបានចេញអនុក្រឹត្យមួយស្ដីពីការកំណត់ដែនព្រៃលិចទឹកប្រមាណ៦៥ម៉ឺនហិកតា ស្ថិតក្នុងខេត្តចំនួន៦ជុំវិញបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ ។
ក្នុងមាត្រា៣ នៃអនុក្រឹត្យនេះបានចែងថា អាជ្ញាធរខេត្តមានភារកិច្ច កាតព្វកិច្ច និងការទទួលខុសត្រូវលើការគ្រប់គ្រងការការពារនិងថែរក្សាដែនព្រៃលិចទឹក ហើយចំពោះការបាត់បង់ដែនព្រៃលិចទឹកនិងព្រៃលិចទឹកដែលស្ថិតក្នុងដែនសមត្ថកិច្ចនៃខេត្តណា គណៈអភិបាលនៃខេត្តនោះត្រូវទទួលខុសត្រូវទាំងស្រុងចំពោះមុខរដ្ឋាភិបាល៕