រដ្ឋាភិបាលបានឱ្យដឹងថា ជំងឺកូវីដ-១៩ បានបំផ្លាញសេដ្ឋកិច្ចកម្ពុជា ហើយធ្វើឱ្យខាតបង់ថវិកាជិត៣ពាន់លានដុល្លារអាមេរិក ខណៈប្រជាជនកម្ពុជាស្លាប់ជិត៣ពាន់នាក់ និងជាង២សែននាក់ឆ្លងមេរោគកូវីដ-១៩។
ក្នុងឱកាសវេទិកានិពន្ធនាយកសារព័ត៌មានកម្ពុជា ស្តីពី «កូវីដ-១៩ ៖ បញ្ហាប្រឈម និងឱកាសសម្រាប់អ្នកសារព័ត៌មាន រដ្ឋាភិបាលបានចេញសារលិខិត កាលពីថ្ងៃទី១១ ខែធ្នូ ឆ្នាំ២០២១ម្សិលមិញនេះថា ជំងឺកូវីដ- ១៩ បានបង្កគ្រោះមហន្តរាយយ៉ាងធ្ងន់ធ្ងរដល់សេដ្ឋកិច្ចសកល សុខភាពសាធារណៈ និងបានឆក់ជីវិតមនុស្សនៅទូទាំងសកលលោកអស់ជាង៥លាននាក់ ហើយមនុស្សជិត៣០០លាននាក់បានឆ្លងជំងឺកាចសាហាវនេះផងដែរ ។
សារលិខិតដដែលបានបញ្ជាក់ថា ជំងឺកូវីដ-១៩ ក៏បានបំផ្លាញសេដ្ឋកិច្ចកម្ពុជា ដែលធ្វើឱ្យខាតបង់ថវិកាជិត៣០០០ លានដុល្លារអាមេរិក ឆក់ជីវិតមនុស្សអស់ជិត៣០០០នាក់ និងធ្វើឱ្យប្រជាជនជាងពីរសែននាក់បានឆ្លងជំងឺនេះថែមទៀតផង ។
ទោះជាបែបនេះក្តី រដ្ឋាភិបាលអះអាងថា បច្ចុប្បន្ននេះ កម្ពុជាបានទប់ស្កាត់ និងកាត់ផ្តាច់ការឆ្លងរាលដាលជំងឺកូវីដ-១៩ ចូលសហគមន៍ទ្រង់ទ្រាយធំ ដែលធ្វើឱ្យចំនួនអ្នកឆ្លង និងអ្នកស្លាប់មានការថយចុះជាលំដាប់ពីមួយថ្ងៃទៅមួយថ្ងៃ ដោយសាររដ្ឋាភិបាលបានអនុវត្តគោលនយោបាយចាក់វ៉ាក់សាំងជូនប្រជាពលរដ្ឋចំនួនជិត១៥លាននាក់ ក្នុងចំណោមជាង១៦លាននាក់ បានជោគជ័យ។
បន្ថែមពីនេះ រដ្ឋាភិបាលអំពាវនាវទៅប្រជាពលរដ្ឋគ្រប់រូបបន្តប្រុងប្រយ័ត្ន និងចូលរួមអនុវត្តវិធានការរបស់រដ្ឋាភិបាល «៣កុំ ៣ការពារ» រួមទាំងវិធានការសុវត្ថិភាពរបស់ក្រសួងសុខាភិបាល ដើម្បីឈានទៅកាត់ផ្តាច់ទាំងស្រុងនៃការឆ្លងរីករាលដាលនៃជំងឺកូវីដ-១៩ ចូលសហគមន៍ ដែលកម្ពូជាបានធ្វើជោគជ័យក្នុងព្រឹត្តិការណ៍២៩កុម្ភៈ ឆ្នាំ២០២០ នាពេលកន្លងមក ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ជំងឺកូវីដ-១៩ បានបំផ្លាញសេដ្ឋកិច្ចសកល និងធ្វើឱ្យប៉ះពាល់ដល់សេដ្ឋកិច្ចកម្ពុជាដែលជាប្រទេសកំពុងអភិវឌ្ឍន៍ផងដែរ ។
ករណីនេះ លោកអំពាវនាវទៅរដ្ឋាភិបាលជំរុញទៅក្រសួងសុខាភិបាល និងស្ថាប័នពាក់ព័ន្ធ រួមទាំងប្រជាពលរដ្ឋគ្រប់រូបសហការគ្នា ពង្រឹងការអនុវត្តវិធានការសុខាភិបាលឱ្យបានខ្ជាប់ខ្ជួន ហើយរដ្ឋាភិបាលត្រូវត្រៀមថវិកាបម្រុងជួយដល់អ្នកដែលរងគ្រោះ និងអ្នកដែលងាយរងគ្រោះ ទើបកាត់ផ្តាច់ការឆ្លងរាលដាលជំងឺកូវីដ-១៩ ចូលក្នុងសហគមន៍បានប្រសិទ្ធិភាពខ្ពស់ ។
លោកមានប្រសាសន៍ថា ៖ «យើងដឹងហើយថា បញ្ហាជំងឺកូវីដ-១៩ នេះ យើងមិនអាចភ្លេចខ្លួនបានទេ ទាល់តែមានការចូលរួមពីពលរដ្ឋ និងអាជ្ញាធរពាក់ព័ន្ធ ក្នុងការទប់ស្កាត់ទាំងអស់គ្នា ។ បញ្ហានេះ មិនទាន់បញ្ចប់ទេ រដ្ឋាភិបាលគួរតែពិចារណាក្នុងការលៃលកថវិកាបម្រុង សម្រាប់បង្ការទប់ស្កាត់ជំងឺកូវីដ-១៩នេះបន្តទៀត »។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១២ ខែធ្នូ ឆ្នាំ២០២១ បានឱ្យដឹងថា អ្នកស្លាប់ដោយជំងឺកូវីដ-១៩ កាលពីថ្ងៃម្សិលមិញ មានចំនួន ៣នាក់បន្ថែមទៀត និងករណីឆ្លងថ្មីមានចំនួន ១២នាក់ ស្របពេលអ្នកជាសះស្បើយថ្មីមានចំនួន ១៣នាក់។
បើតាមក្រសួងសុខាភិបាល គិតត្រឹមព្រឹកថ្ងៃអាទិត្យនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៣៥៥នាក់ ក្នុងនោះអ្នកជំងឺព្យាបាលជាសះស្បើយសរុបមានចំនួន ១១៦ ៧០៨នាក់ និងអ្នកស្លាប់សរុប ២ ៩៨៥នាក់ និងករណីនាំចូលពីក្រៅប្រទេសសរុប ១៩ ៨៥២នាក់៕