គណបក្សនយោបាយចំនួន៦បានដាក់ញត្តិជាថ្មីទៀត ដើម្បីទាមទារឱ្យស្ថាប័នជាតិរៀបចំការបោះឆ្នោតរក្សាទុកទម្រង់១១០២ ខណៈ គ.ជ.ប នៅតែបន្តរក្សាគោលជំហររបស់ខ្លួនដែលបដិសេធមិនទទួលយកសំណើពីគណបក្សទាំងនោះ។
គណបក្សទាំង៦នោះ រួមមាន គណបក្សកែទម្រង់កម្ពុជា គណបក្សប្រជាធិបតេយ្យមូលដ្ឋាន គណបក្សកម្ពុជានិយម គណបក្សភ្លើងទៀន គណបក្សកម្លាំងប្រជាធិបតេយ្យ និងគណបក្សបំណងពលរដ្ឋ។
ញត្តិរួមរបស់គណបក្សទាំង៦ ផ្ញើទៅស្ថាប័នជាតិរៀបចំការបោះឆ្នោត (គ.ជ.ប) នៅថ្ងៃចន្ទនេះ លើកឡើងថា ពួកគេមិនអាចទទួលយកបានឡើយនូវការបំភ្លឺនិងការបកស្រាយរបស់ គ.ជ.ប កាលពីពាក់កណ្ដាលខែមករានោះទេ ហើយពួកគេនៅតែរក្សាជំហរទាមទារ និងជំរុញឱ្យ គ.ជ.ប រក្សាទុកទម្រង់កំណត់ហេតុនៃការរាប់សន្លឹកឆ្នោត ឬហៅកាត់ថា «ទម្រង់១១០២» ដូចមុនដដែល។
បន្ថែមលើញត្តិនេះ ប្រធានគណបក្សកម្ពុជានិយម លោក យ៉ែម បុញ្ញឫទ្ធិ មានប្រសាសន៍ថា ការទាមទារឱ្យ គ.ជ.ប រក្សាទុកទម្រង់១១០២ នៅក្នុងប្រព័ន្ធបោះឆ្នោតនេះ ដោយសារវាជាទម្រង់មួយដែលមានភាពចាំបាច់ និងជួយឱ្យការបោះឆ្នោតប្រព្រឹត្តទៅមានតម្លាភាព។
លោកបន្តថា៖ «យើងនៅតែទាមទាររឿងទម្រង់១១០២ ពីព្រោះយើងគិតថា ដើម្បីឱ្យ គ.ជ.ប មួយដែលអាចរក្សាជំហរតម្លាភាពនិងអព្យាក្រឹត្យភាពដែលអាចទទួលយកបានពីគ្រប់ភាគីពាក់ព័ន្ធនោះ គឺត្រូវតែចែកជូនដល់អ្នកសង្កេតការណ៍របស់គណបក្សដែលមានវត្តមាន សម្រាប់ទម្រង់១១០២»។
ក្រៅពីការដាក់ញត្តិបន្តទៅស្ថាប័ន គ.ជ.ប ហើយ លោក យ៉ែម បុញ្ញឫទ្ធិ ឱ្យដឹងបន្ថែមថា ញត្តិនេះក៏នឹងត្រូវបញ្ជូនក្នុងពេលជាមួយគ្នាដែរទៅបណ្ដាស្ថានទូតមួយចំនួន រួមមាន ស្ថានទូតជប៉ុន ស្ថានទូតអូស្រ្តាលី និងសហភាពអឺរ៉ុប រួមទាំងស្ថានទូតបណ្ដាប្រទេសប្រកាន់របបប្រជាធិបតេយ្យផងដែរ។
ទម្រង់១១០២ គឺជាប្រភេទទម្រង់សម្រាប់ធ្វើកំណត់ហេតុនៃការរាប់សន្លឹកឆ្នោត ហើយទម្រង់នេះទុកចែកជូនភ្លាមៗឱ្យភ្នាក់ងារអ្នកសង្កេតការណ៍ ឬភ្នាក់ងារគណបក្សនយោបាយ នៅតាមមណ្ឌលបោះឆ្នោត ដើម្បីទុកផ្ទៀងផ្ទាត់អំពីលទ្ធផលឆ្នោត។
សេចក្ដីប្រកាសព័ត៌មានរបស់ គ.ជ.ប កាលពីថ្ងៃទី១៥ ខែមីនា ឆ្នាំ២០២១ ឱ្យដឹងថា កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់អាណត្តិទី៥ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បញ្ជាក់ជំហរជាថ្មីទៀតនៅពេលនេះថា គ.ជ.ប នឹងនៅតែរក្សាការសម្រេចរបស់ខ្លួនដដែលអំពីទម្រង់១១០២នេះ។ លោកបន្តថា ការទាមទាររបស់គណបក្សនយោបាយម្ដងហើយម្ដងទៀត ដើម្បីជំរុញឱ្យ គ.ជ.ប រក្សាទុកទម្រង់១១០២នេះ គឺយឺតពេលហើយ។
លោកបន្តថា នៅក្នុងដំណាក់កាលដំបូង គ.ជ.ប បានផ្ញើសេចក្ដីព្រាងបទប្បញ្ញត្តិនិងនីតិវិធីនេះឱ្យទៅគណបក្សនយោបាយជិត១០០រួចហើយ ប៉ុន្តែរហូតមកដល់ពេលនេះ គណបក្សទាំងនោះមិនមានប្រតិកម្មអ្វីទេ ដូច្នេះការតវ៉ារបស់គណបក្សទាំង៦ដែលធ្វើឡើងនៅពេលនេះ មិនមានទម្ងន់អ្វីដែលជំរុញឱ្យ គ.ជ.ប ត្រូវលុបចោលសេចក្ដីសម្រេចចិត្តរបស់ខ្លួនឡើយ។
លោកបន្តថា៖ «ចង់ជម្រាបថា គ.ជ.ប មិនមានអីប្រែប្រួលទេ។ នីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ នឹងប្រព្រឹត្តទៅតាមអ្វីដែលសម្រេចកន្លងមក ដោយហេតុថា ការចូលរួមដែលគណៈកម្មាធិការជាតិរៀបចំការបោះឆ្នោតផ្ញើសេចក្ដីព្រាងទៅ គឺជិត៩០ស្ថាប័នអង្គភាព។ ដូច្នេះ ស្ថាប័នច្រើនលើសលុប លោកមិនមានបញ្ហាទៅលើចំណុចហ្នឹងទេ»។
កាលពីថ្ងៃទី១៤ ខែមករា ឆ្នាំ២០២២ ប្រធាន គ.ជ.ប លោក ប្រាជ្ញ ចន្ទ បានចេញសេចក្ដីសម្រេច ដោយមិនដាក់ឱ្យអនុវត្តទម្រង់១១០២នេះ ដូចការបោះឆ្នោតលើកមុនៗទៀតឡើយ។ ជាបន្តបន្ទាប់មក គ.ជ.ប នៅតែបន្តរក្សាជំហរនេះដោយមិនកែប្រែ បើទោះជាមានការជំទាស់ម្ដងហើយម្ដងទៀតពីគណបក្សប្រជាធិបតេយ្យមូលដ្ឋាន គណបក្សកម្ពុជានិយម និងគណបក្សកែទម្រង់កម្ពុជា យ៉ាងណាក្ដី។
លោក សំ គន្ធាមី នាយកប្រតិបត្តិអង្គការនិកហ្វិច យល់ឃើញថា គ.ជ.ប មិនគួរយកលេសនៅពេលនេះថា ការទាមទាររបស់គណបក្សនយោបាយសំឡេងភាគតិចមិនមានទម្ងន់ បើធៀបនឹងគណបក្សនយោបាយដែល គ.ជ.ប បានផ្ញើសេចក្ដីព្រាងជាលើកដំបូងនោះទេ។ លោកបន្តថា ទោះសំឡេងនៃការតវ៉ាតិចក្ដី ប៉ុន្តែដើម្បីឱ្យមានភាពស្មើគ្នា គ.ជ.ប គួរទទួលយកកង្វល់ទាំងនោះទៅពិចារណាហើយដោះស្រាយ។
លោកថា៖ «ដូច្នេះអានេះមានអី មានតែខ្វះតម្លាភាព! ធ្វើម៉េចបើគេសុំឱ្យមាន យើងធ្វើទៅ បើទោះបីជាមានគណបក្សច្រើនក៏ដោយដែលគេអត់ស្នើសុំរក្សាទុក ជារឿងផ្សេងតើ! ប៉ុន្តែរឿងគណបក្សនយោបាយ ត្រូវតែយកចិត្តទុកដាក់ មិនថាភាគតិចឬភាគច្រើនទេ»៕