ក្រសួងពាណិជ្ជកម្មបានឱ្យដឹងថា រយៈពេល៤ខែ ដើមឆ្នាំ២០២២នេះ កម្ពុជាបាននាំទំនិញចេញទៅសហរដ្ឋអាមេរិកសម្រេចបានជិត ៣ ០០០លានដុល្លារ ដោយចំនួននេះមានការកើនឡើង ៥៣,៦% បើធៀបទៅនឹងរយៈពេលដូចគ្នាកាលពីឆ្នាំមុន។
ស្ថិតិក្រសួងពាណិជ្ជកម្មបានឱ្យដឹងថា កម្ពុជាសម្រេចទំហំពាណិជ្ជកម្ម ជាមួយសហរដ្ឋអាមេរិក បានប្រមាណ ៣ ០២៨លានដុល្លារ ដែលក្នុងនោះកម្ពុជានាំទំនិញទៅកាន់អាមេរិក រយៈពេល៤ខែ ឆ្នាំ២០២២នេះ សម្រេចបានជាទំហំទឹកប្រាក់ចំនួន ២ ៩៣២លានដុល្លារ។ ចំនួននេះបង្ហាញថា មានការកើនឡើង ៥៣,៦% បើធៀបនឹងរយៈដូចគ្នាកាលពីឆ្នាំ២០២១។
ចំណែក ទំនិញដែលកម្ពុជានាំពីអាមេរិក ចូលមកកម្ពុជាវិញក្នុងរយៈពេល៤ខែ ឆ្នាំ២០២២ ដូចគ្នា គឺមានទំហំទឹកប្រាក់ចំនួន ១០៤លានដុល្លារតែប៉ុណ្ណោះ។
ទំហំទំនិញនាំចេញរបស់កម្ពុជាទៅអាមេរិកនេះ បង្ហាញថា សហរដ្ឋអាមេរិកជាទីផ្សារលំដាប់ទី១ របស់កម្ពុជា ហើយទំនិញភាគច្រើនដែលកម្ពុជានាំចេញទៅកាន់ទីផ្សារសហរដ្ឋអាមេរិក ដូចជា សម្លៀកបំពាក់ ស្បែកជើង ផលិតផលធ្វើដំណើរ កាបូប ព្រមទាំងទំនិញកសិកម្មមួយចំនួនដែរ។
បើតាមទិន្នន័យពីការិល័យជំរឿនអាមេរិកឱ្យដឹងថា ទំហំពាណិជ្ជកម្មទ្វេភាគីកម្ពុជា-អាមេរិក កាលពីឆ្នាំ២០២១ មានទំហំជិត១ម៉ឺនលានដុល្លារ(៩.១៥ពាន់លានដុល្លារ) ដោយកើនឡើងប្រមាណ ៣២,៦១% ធៀបនឹងរយៈពេលដូចគ្នាកាលពីឆ្នាំ២០២០ ដែលមានទំហំជាង ៦.៩ ពាន់លានដុល្លារ៕