បេក្ខភាពជាមេឃុំមកពីគណបក្សភ្លើងទៀនម្នាក់នៅឃុំកណ្ដុរជ្រំ ស្រុកពញាក្រែក ខេត្តត្បូងឃ្មុំ បានដាក់ពាក្យបណ្ដឹងទៅប៉ុស្តិ៍នគរបាលនៅថ្ងៃទី៤ ខែមិថុនានេះ ក្រោយពីមានអ្នកលួចដុតម៉ូតូរបស់លោកកាលពីយប់ថ្ងៃទី៣ ឈានចូលថ្ងៃទី៤ ខែមិថុនា ឆ្នាំ២០២២ បន្ទាប់ពីបញ្ចប់ពេលឃោសនាបោះឆ្នោត។
បេក្ខភាពជាមេឃុំមកពីគណបក្សភ្លើងទៀន លោក ណែម សឿន ប្រាប់វីអូឌីនៅថ្ងៃនេះថា ម៉ូតូដែលត្រូវក្មេងស្ទាវជិត ១០នាក់ដុតកាលពីយប់ថ្ងៃទី៣ ខែមិថុនានោះ ជាម៉ូតូដឹកសម្ភារៈ អំឡុងពេលឃោសនាបោះឆ្នោតរយៈពេលជាង ១០ ថ្ងៃកន្លងមកនេះ។
លោកបន្តថា ករណីនេះ អាចមានជាប់ពាក់ព័ន្ធនឹងរឿងនយោបាយ ដោយសារ ម៉ូតូផ្សេងទៀតដែលនៅជិតនោះ ពួកគេមិនបានដុតទេ ដោយដុតតែម៉ូតូដែលរូបលោកយកទៅឃោសនាឱ្យគណបក្សតែប៉ុណ្ណោះ។
លោកថា៖ «ម៉ូតូនៅនោះ២ម៉ូតូហើយទាំងម៉ូតូខ្ញុំ ហើយអាម៉ូតូ នោះ វាអត់ដុតទេ វាមកដុតម៉ូតូខ្ញុំ នៅម៉ោងជាង ១១យប់ ម៉ូតូខ្ញុំតម្លៃ២០០ ដុល្លារ ។ ម៉ូតូនេះ ខ្ញុំយកមកឃោសនា ជាង១០ថ្ងៃ ដល់ថ្ងៃទីបញ្ចប់[គេ]លួចដុតចោល។ បើតាមកាំមេរ៉ាឃើញក្មេងស្ទាវ ៩ នាក់ ស្រី ២ នាក់ ហើយអ្នកចូលដុតតែម្នាក់។ មើលអត់ស្គាល់ទេ សុទ្ធតែពាក់មួកសុវត្ថិភាពទាំងអស់ ហើយដាវសាំងម៉ូរ៉ៃ»។
ករណីនេះ លោក ណែម សឿន ថា គាត់បានដាក់បណ្ដឹងទៅកាន់ប៉ុស្តិ៍នគរបាលឃុំកណ្ដុរ ជ្រំរួចហើយ កាល ពីព្រឹកថ្ងៃទី ៤ ខែមិថុនា ឆ្នាំ២០២២។ លោកបង្ហាញក្ដីសង្ឃឹមថា សមត្ថកិច្ចនឹងចាប់ខ្លួនជនរូបនោះ មកដាក់ទោសតាមច្បាប់ ដោយថា គ្រួសារលោកមិនដែល មានទំនាស់ជាមួយអ្នកណាទេ ប៉ុន្តែចាប់តាំងពីគាត់ឈរឈ្មោះជាបេក្ខភាព មេឃុំគណបក្ស ភ្លើងទៀន មកគ្រួសារមកក៏មាន រឿងរហូត។ វីអូឌីមិនអាចសុំការបញ្ជាក់បន្ថែមពីមេប៉ុស្តិ៍ឃុំកណ្ដុរជ្រំលោក ទី សា បានទេ នៅល្ងាចថ្ងៃសៅរ៍ទី៤ ខែមិថុនានេះ៕