ព្រះប្រធានគណបក្សហ្វ៊ុនស៊ិនប៉ិច ព្រះអង្គម្ចាស់ នរោត្ដម ចក្រាវុធ នៅថ្ងៃទី៥ ខែមិថុនានេះ មិនបានយាងទៅចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់នោះទេ ដោយសារតែព្រះអង្គមិនបានចុះព្រះនាមសម្រាប់ការបោះឆ្នោតនៅពេលនេះ។
ព្រះអង្គម្ចាស់ ចក្រាវុធ គឺជាបុត្រាច្បងរបស់សម្ដេចក្រុមព្រះនរោត្ដម រណឫទ្ធិ អតីតព្រះប្រធានគណបក្សហ៊្វុនស៊ិនប៉ិច ដែលបានចូលទិវង្គតកាលពីខែវិច្ឆិកា ឆ្នាំ២០២១ ដោយរោគាពាធ ក្រោយព្រះអង្គបានជួបឧបទ្ទវហេតុគ្រោះថ្នាក់ចរាចរណ៍នៅក្នុងខេត្តព្រះសីហនុ។
អ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន បានថ្លែងប្រាប់ វីអូឌី នៅមុខការិយាល័យបោះឆ្នោត នៅក្នុងសង្កាត់ព្រៃស នៅព្រឹកថ្ងៃទី៥ មិថុនានេះថា មូលហេតុដែលព្រះអង្គម្ចាស់ ចក្រាវុធ ព្រះប្រធានគណបក្សហ៊្វុនស៊ិនប៉ិច គ្មានព្រះនាមនៅក្នុងបញ្ជីបោះឆ្នោត ដោយសារតែនៅពេល គ.ជ.ប រៀបចំចុះឈ្មោះបោះឆ្នោត ព្រះអង្គម្ចាស់ ចក្រាវុធ ជាប់រវល់មើលថែទាំព្រះសុខភាពព្រះបិតារបស់ព្រះអង្គ។
លោក ញឿន រ៉ាដែន បញ្ជាក់បន្ថែមថា៖ «បន្ទាប់ពីសម្ដេចក្រុមព្រះ លោកទទួលឧបទ្ទវហេតុក្នុងគ្រោះថ្នាក់ចរាចរណ៍មួយនៅខេត្តកំពង់សោម [ខេត្តព្រះសីហនុ] ព្រះបុត្រាលោកមានភារកិច្ចក្នុងការទទួលមើលការខុសត្រូវក្នុងការព្យាបាលមើលថែទាំ។ ហើយក្នុងនោះដែរ ទាក់ទងនឹងបច្ចេកទេសក្នុងការចូលរួមចុះឈ្មោះនេះ នៅក្នុងកាលៈទេសៈនោះ គឺព្រះអង្គកំពុងតែមមាញឹកក្នុងការមើលថែសុខភាព ដូច្នេះហើយបច្ចេកទេសទាំងនេះដែលជាកង្វះខាតមួយដែរ»។
ទោះជាយ៉ាងណា លោក ញឿន រ៉ាដែន មិនបានយល់ថាអវត្តមានរបស់ព្រះអង្គម្ចាស់ ចក្រាវុធ ដែលជាព្រះប្រធានបក្ស នៅក្នុងការបោះឆ្នោតនៅថ្ងៃនេះជាឧបសគ្គសម្រាប់ការបោះឆ្នោតជ្រើសក្រុមប្រឹក្សាឃុំសង្កាត់ សម្រាប់គណបក្សរាជានិយមមួយនេះនោះទេ។ ប៉ុន្តែលោកថា ព្រះអង្គម្ចាស់ ចក្រាវុធ តែងបានអំពាវនាវឱ្យពលរដ្ឋទៅចូលរួមបោះឆ្នោតឱ្យបានគ្រប់ៗគ្នា។
ការបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥នេះ មានគណបក្សនយោបាយចំនួន១៧ បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ/សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់)។
ដោយឡែក ឃុំ/សង្កាត់ ក្នុងអាណត្តិទី៥នេះ មានចំនួន១ ៦៥២ ហើយចំនួនក្រុមប្រឹក្សាឃុំ/សង្កាត់ដែលនឹងត្រូវជ្រើសរើសមកបម្រើការងារក្នុងឃុំ/សង្កាត់ទាំងអស់នេះ មានចំនួន១១ ៦២២រូប។ យោងតាមគណៈកម្មាធិការជាតិរៀបចំការបោះឆ្នោត បានឱ្យដឹងថា ដំណើរការបោះឆ្នោតក្រុមប្រឹក្សាឃុំ/សង្កាត់ អាណត្តិទី៥នេះ មានការិយាល័យបោះឆ្នោតសរុបចំនួន២៣ ៦០២ការិយាល័យ។ ប្រជាពលរដ្ឋមានឈ្មោះក្នុងបញ្ជីបោះឆ្នោតសរុបចំនួន៩ ២០៥ ៦៨១នាក់ ស្មើនឹង៨៧,៩៤ភាគរយនៃប្រជាជនកម្ពុជាទាំងអស់ ក្នុងនោះមានស្រីចំនួន៤ ៩០៤ ៨៣២នាក់។
សម្រាប់ការបោះឆ្នោតនៅថ្ងៃនេះ គ.ជ.ប ត្រៀមប្រើទឹកថ្នាំជ្រលក់ជិត៥ម៉ឺនដប សន្លឹកឆ្នោតជិត១២លានសន្លឹក មានការក្រុមការងារ ឬមន្រ្តីបម្រើការបោះឆ្នោតជាង១៤ម៉ឺននាក់។ បើតាម គ.ជ.ប គណបក្សដែលមានបេក្ខជនឈរឈ្មោះនៅគ្រប់២៥ខេត្តក្រុង មានចំនួន៤គណបក្ស គឺគណបក្សប្រជាជនកម្ពុជា គណបក្សភ្លើងទៀន គណបក្សរាជានិយមហ៊្វុនស៊ិនប៉ិច និងគណបក្សខ្មែររួបរួមជាតិរបស់លោក ញឹក ប៊ុនឆៃ៕
