គណៈកម្មការខេត្តរៀបចំការបោះឆ្នោតនៅខេត្តបាត់ដំបង បានសម្រេចបដិសេធបណ្ដឹងគណបក្សភ្លើងទៀនចំនួន ១៩ ដែលបានប្ដឹងពីភាពមិនប្រក្រតីនៅតាមការិយាល័យបោះឆ្នោត និងរាប់សន្លឹកឆ្នោត នៅខេត្តមួយនេះ។
ក្នុងសេចក្ដីជូនដំណឹងរបស់គណៈកម្មការខេត្តរៀបចំការបោះឆ្នោតខេត្តបាត់ដំបងចុះថ្ងៃទី១០ ខែមិថុនា ឆ្នាំ២០២២ ឱ្យដឹងថា ការបដិសេធទទួលបណ្ដឹងគណបក្សភ្លើងទៀនទាំង ១៩ បណ្ដឹង ក្រោយពីគណៈកម្មការខេត្ត បានពិនិត្យបណ្ដឹងនិងកំណត់ហេតុសាកសួរព័ត៌មានបន្ថែមទាំងសិក្សាយ៉ាងយកចិត្តទុក លក្ខខណ្ឌច្បាប់ បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់។
លិខិតដដែលអះអាងថា គណៈកម្មការខេត្តរៀបចំការបោះឆ្នោត មិនអាចទទួលពាក្យបណ្ដឹងទាំងអស់ មកពិនិត្យដោះស្រាយឡើយដោយថា បណ្ដឹងចំនួន ១៩ នោះ បានប្រាសចាកប្រការ ១៤.២នៃ ប.ន.ឃ.ស បណ្ដឹងរំលងសមត្ថកិច្ចថ្នាក់ គឃ.សប។
វីអូឌីមិនអាចសុំការបញ្ជាក់ពីអ្នកនាំពាក្យគណបក្សភ្លើងទៀន លោក ថាច់ សេដ្ឋា បានទេ ដោយទូរសព្ទចូលគ្មានអ្នកទទួលនៅថ្ងៃសៅរ៍នេះ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា គិតដល់ថ្ងៃទី១១ ខែមិថុនានេះ គ.ជ.ប ទទួលបានពាក្យបណ្ដឹងពីគណបក្សនយោបាយជិត ១០០បណ្ដឹងហើយ។ លោកថា បណ្ដឹងទាំងនោះ ស្នើឱ្យផ្ដន្ទាទោសចំពោះមន្ត្រីបោះឆ្នោត មេភូមិ មេឃុំ ដែលបានទៅឈរក្បែរការិយាល័យបោះឆ្នោត និងឈរកត់ត្រាឈ្មោះប្រជាពលរដ្ឋជាដើម។
លោកបញ្ជាក់ថា បណ្ដឹងភាគច្រើន ប្ដឹងដោយគណបក្សភ្លើងទៀន ខណៈបក្សប្រជាជនកម្ពុជា ក៏បានប្ដឹងគណបក្សភ្លើងទៀនដែរ ពាក់ព័ន្ធការរំខានរបស់គណបក្សភ្លើងទៀន ។
លោកថា៖«ប៉ុណ្ណឹងអាចឆ្លុះបញ្ចាំងពីភាពត្រឹមត្រូវនៃការបោះឆ្នោតត្រង់ថា មានបណ្ដឹង គឺមានមូលដ្ឋានជាក់លាក់ក្នុងការស្រាវជ្រាវ បើស្រាវជ្រាវរកឃើញបញ្ហាជាក់លាក់ថា តើជាបញ្ហារបស់អ្នកណាជា កំហុសរបស់អ្នកណា នោះយើងធ្វើឱ្យការបោះឆ្នោតលើកក្រោយដកពិសោធន៍ក្នុងរឿងនេះធ្វើឱ្យកាន់តែល្អប្រសើរ»។
កាលពីថ្ងៃទី៧ ខែមិថុនា ឆ្នាំ២០២២ ក្រុមអង្គការសង្គមស៊ីវិលចំនួន៥ ស្ថាប័ន បានស្នើទៅគណៈកម្មាធិការជាតិរៀបចំការបោះឆ្នោត និងភាគីពាក់ព័ន្ធ ត្រូវពង្រឹងការអនុវត្តឱ្យបានត្រឹមត្រូវតាមច្បាប់ បទបញ្ជា និងនីតិវិធីសម្រាប់ការបោះឆ្នោត ព្រមទាំងពង្រឹងអព្យាក្រឹត្យភាពរបស់មន្ត្រីរាជការ និងកងកម្លាំងប្រដាប់វុធ ។ ការស្នើក្រុមអង្គការសង្គមស៊ីវិលនេះ ក្រោយពីពួកគេរកឃើញនូវភាពមិនប្រក្រតីមួយចំនួន នៅក្នុងដំណើរការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ និងការរាប់សន្លឹកឆ្នោត កាលពីថ្ងៃទី៥ ខែមិថុនា ឆ្នាំ២០២២។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ-សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់) ខណៈក្រុមប្រឹក្សាឃុំ-សង្កាត់ដែលនឹងត្រូវជ្រើសរើសមកបម្រើការងារក្នុងឃុំ-សង្កាត់ទាំង១ ៦៥២ គឺមានចំនួន១១ ៦២២រូប។
បើតាមប្រធាន គ.ជ.ប លោក ប្រាជ្ញ ចន្ទ ស្ថាប័នមួយនេះគ្រោងនឹងប្រកាសលទ្ធផលបោះឆ្នោតផ្លូវការ នៅថ្ងៃទី២៦ ខែមិថុនា ឆ្នាំ២០២២នេះ៕
