ប្រជាកសិករ ឱ្យដឹងថា ស្រូវប្រាំងរាប់ពាន់ហិកតា នៅឃុំមួយចំនួន ក្នុងស្រុកមង្គលបូរី ខេត្តបន្ទាយមានជ័យ កំពុងប្រឈមការខូចខាតដោយសារគ្រោះរាំងស្ងួតជាងមួយខែមកនេះ។
កសិករនៅភូមិប៊ួរ ឃុំសឿ លោក តឿក ហួយ ប្រាប់វីអូឌីនៅថ្ងៃពុធនេះថា ស្រូវប្រាំងខ្ទង់ពាន់ហិកតា នៅឃុំសឿ ឃុំចំណោម ឃុំល្វា និងឃុំផ្សេងទៀត នៃស្រុកមង្គលបូរី កំពុងក្រៀមស្វិត ក្រោយពីគ្មានភ្លៀងធ្លាក់ និងគ្មានទឹកសម្រាប់ស្រោចស្រប់រយៈពេលជាង១ខែមកនេះ។ កសិកររូបនេះ បន្តថា គ្រួសារលោកបានចំណាយដើមទុនជិត ១ ០០០ដុល្លារ សម្រាប់ស្រែប្រាំង៦ហិកតា ប៉ុន្តែពេលនេះស្រូវប្រាំងរបស់លោក កំពុងប្រឈមការខូចខាតទាំងស្រុង ប្រសិនបើគ្មានភ្លៀងធ្លាក់ និងគ្មានទឹកបញ្ជូលរយៈពេល១០ថ្ងៃទៀតនោះ។
លោកបន្ថែមថា៖ «វារាំងជាង១ខែ ស្រូវវាងាប់អស់ហើយ បើរាប់ទៅចូលរាប់ពាន់ហិកតាហើយ។ ហើយអាជ្ញាធរភូមិឃុំគេមិនដែលចុះសួរនាំអីផង។ រាល់ថ្ងៃបើយើងមិនខិតខំរកដំណោះស្រាយខ្លួនឯង វាអត់ហ្នឹងហើយ»។
កសិករនៅភូមិប៊ួរម្នាក់ទៀត អ្នកស្រី ជិន ធី ឱ្យដឹងថា គ្រួសារអ្នកស្រីធ្វើស្រែប្រាំងតែជាង២ហិកតាប៉ុណ្ណោះ ខណៈពលរដ្ឋផ្សេងទៀតធ្វើចន្លោះពី១០ទៅ២០ហិកតា ហើយកំពុងប្រឈមខូចខាតដោយសារគ្រោះរាំងស្ងួត។ អ្នកស្រីបន្តថា ប្រជាកសិករនៅស្រុកមង្គលបូរីភាគច្រើន ធ្វើស្រែដោយពឹងផ្អែកលើទឹកភ្លៀង និងពឹងលើទឹកស្ទឹងដែលធ្លាក់ពីខេត្តបាត់ដំបង និងប៉ៃលិន ប៉ុន្តែទឹកស្ទឹងនេះត្រូវរីងស្ងួតផងដែរ។ អ្នកស្រីថា កសិករភាគច្រើនប្រឈមជំពាក់បំណុលធនាគារ ដោយពួកគេបានខ្ចីលុយពីស្ថាប័នមួយនេះ ដើម្បីធ្វើដើមទុនសម្រាប់បង្ករបង្កើនផល។
អ្នកស្រីបន្ថែមថា៖ «នៅខាងខ្ញុំនេះគេធ្វើស្រែច្រើនៗហិកតាណាស់ ធ្វើតិចតែខ្ញុំទេ។ តែសម្រាប់អ្នកខ្លះគេធ្វើ១០ទៅ២០ហិកតាម្នាក់ៗ អ្នកខ្លះខ្ចីលុយធនាគារជួលដីគេធ្វើដល់ឥលូវខូចស្រូវអស់។ អ្នកខ្លះបុកអណ្តូងនៅនឹងស្រែ ហើយនៅតែទប់អត់បានទៀត ដោយទឹកវាប៊ូមអត់ចេញ»។
អភិបាលស្រុកមង្គលបូរី លោក រ័ត្ន ដាស៊ីណង់ បានទទួលស្គាល់ថា ស្រូវប្រាំងរបស់កសិករនៅឃុំមួយចំនួន ក្នុងស្រុកនេះ ពិតជាក្រៀមស្វិតដោយសារគ្រោះរាំងស្ងួតមែន ប៉ុន្តែលោកមិនទាន់ទទួលបានរបាយការណ៍ពីចំនួនស្រូវដែលកំពុងប្រឈមការខូចខាតថាមានប៉ុន្មានហិកតានៅឡើយទេ។
អភិបាលស្រុករូបនេះបន្តថា អាជ្ញាធរពិបាកក្នុងការជួយដោះស្រាយបន្តិច ប្រសិនបើទឹកស្ទឹងនៅជិតតំបន់ស្រែប្រាំងរបស់ប្រជាកសិករ រងការរីងស្ងួតដែរនោះ។ យ៉ាងណាលោកថា នឹងឱ្យមន្ត្រីពាក់ព័ន្ឋចុះពិនិត្យ និងស្រង់ស្ថិតិ ដើម្បីរកវិធីដោះស្រាយ។
លោកបន្ថែមថា៖ «ស្ថានភាពដែលអត់មានទឹកនេះ ទី១ យើងធ្វើស្រែដោយពឹងលើទឹកស្ទឹងបវិលទាំងស្រុង ហើយមួយទៀតការដ្ឋានសំណង់របស់ក្រសួងធនធានកំពុងធ្វើហើយបិទទឹកស្ទឹង ប៉ុន្តែកាយវៀងដែរតែវាមិនទាន់ ដោយសារខាងលើក៏អត់មានទឹកដែរ អីចឹងរឿងនេះខ្ញុំនឹងឱ្យមន្ត្រីជំនាញកសិកម្មករពិនិត្យមើល»។
លោក រ័ត្ន ដាស៊ីណង់ ឱ្យដឹងថា តាមផែនដាំដុះរបស់មន្ទីរកសិកម្មខេត្ត គឺអនុញ្ញាតឱ្យកសិករធ្វើស្រែប្រាំងត្រឹមតែ ៦ ០០០ហិកតាប៉ុណ្ណោះ ក្នុងស្រុកមង្គលបូរី ប៉ុន្តែកសិករបានធ្វើរហូតទៅដល់ប្រមាណ ១ម៉ឺនហិកតា។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ធ្លាប់ផ្តល់ជាអនុសាសន៍ថា ដើម្បីដោះស្រាយបញ្ហានេះ រដ្ឋាភិបាលត្រូវត្រៀមគ្រាប់ពូជសម្រាប់ចែកជូនដល់ប្រជាកសិករដោយឥតគិតថ្លៃ ការផ្តល់លុយកម្ចីដល់កសិករក្នុងអត្រាការប្រាក់ទាប និងត្រៀមវិធានការសម្រាប់ដំណោះស្រាយរយៈពេលវែង ដោយត្រូវរៀបចំគោលនយោបាយទឹក ឬប្រព័ន្ធធារាសាស្រ្តគ្រប់តំបន់ដែលប្រជាកសិករធ្វើកសិកម្ម៕
