ក្រុមមន្ត្រីជាន់ខ្ពស់រដ្ឋាភិបាល បានទទួលស្គាល់ពីចំនុចខ្វះខាតនៃការគោរពសិទ្ធិនុស្សរបស់មន្ត្រីអនុវត្តច្បាប់ ក្រោយពីសង្គមស៊ីវិល និងអ្នកសារព័ត៌មានសេរី លើកឡើងថា ការចុះបំពេញការងាររបស់ពួកគេ រងការគំរាមកំហែង ដោយសារតែមន្ត្រីអនុវត្តច្បាប់ខ្លះធ្វើតាមការបញ្ជា។
ការលើកឡើងនេះ ធ្វើឡើងក្នុងវេទិកាពិភាក្សា ស្តីពី «វឌ្ឍនភាពនៃវិស័យសិទ្ធិមនុស្ស និងយុត្តិធម៌នៅកម្ពុជា» ដែលមានក្រុមអង្គការសង្គមស៊ីវិល អ្នកសារព័ត៌មាន ប្រធានក្រុមអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យក្រសួងយុត្តិធម៌ លោក ជិន ម៉ាលីន ចូលរួមពិភាក្សាដេញដោល នៅថ្ងៃពុធនេះ។
ប្រធានគ្រប់គ្រងទូទៅអង្គការលីកាដូលោក អំ សំអាត លើកឡើងថា សកម្មភាពរបស់ក្រុមអង្គការសង្គមស៊ីវិលជាការបំពេញភាពខ្វះចន្លោះឱ្យរដ្ឋាភិបាល ពាក់ព័ន្ធទៅនឹងការអភិវឌ្ឍសង្គម និងសិទ្ធិមនុស្ស។ ក៏ប៉ុន្តែលោកថា ពេលចុះបំពេញការងារជាក់ស្តែង ពួកគេរងការរំខានពីអាជ្ញាធរមូលដ្ឋានមួយចំនួន បើទោះបីក្រសួងមហាផ្ទៃ បានចេញសេចក្តីណែនាំពីការមិនតម្រូវឱ្យសុំច្បាប់ពីអាជ្ញាធរក្តី។
លោកថា៖ «អីចឹងមាន័យថាគាត់អត់ទាន់យល់អំពីការងាររបស់ក្រុមអង្គការសង្គមស៊ីវិល ជាមួយអាជ្ញាធរមូលដ្ឋានហ្នឹង អីចឹងពេលនេះហើយមិនគួរ ប្រើពាក្យគោរពតែមេទេ»។
បញ្ហានេះ លោកស្នើរដ្ឋាភិបាលទប់ស្កាត់ និងលុបបំបាត់វប្បធម៌លាបពណ៌ទៅលើក្រុមអង្គការសង្គមស៊ីវិល ដើម្បីឱ្យពួកគេអាចបំពេញការងារតបតាមច្បាប់ ដោយគ្មានការគំរាមកំហែងពីមន្ត្រីដែលមិនទាន់យល់ពីការអនុវត្តច្បាប់។
មន្ត្រីជាន់ខ្ពស់សមាគមការពារសិទ្ធិនុស្សអាដហុកលោក ភិន សាវៃ បានលើកឡើងថា ការប្រឈមមុខដាក់គ្នា រវាងពលរដ្ឋ ក្រុមអង្គការសង្គមស៊ីវិល និងអាជ្ញាធរមូលដ្ឋាន នឹងជំរុញឱ្យមានការចោទប្រកាន់ ដែលពេលខ្លះមានការប្តឹងផ្តល់គ្នាទៅដល់តុលាការ ដែលការនេះលោកថា ដើម្បីបង្កើនកិច្ចសហការងារ រវាងរដ្ឋាភិបាល និងអង្គការជាដៃគូ ភ្នាក់ងារពាក់ព័ន្ធរបស់រដ្ឋ គួរចុះសិក្សាបញ្ហានេះដល់មូលដ្ឋាន។
ក្រុមអ្នកសារព័ត៌មានសេរី ពីសារព័ត៌មានVOD បានលើកឡើងដែរថា ពួកគេនៅតែត្រូវបានអាជ្ញាធរគំរាមឱ្យលុបរូបភាពដែលថតបានពីសកម្មតវ៉ា និងសកម្មភាពរបស់អាជ្ញាធរនៅទីនោះ បើទោះបីពួកគេបានថយឆ្ងាយពីកន្លែងតវ៉ា តាមការណែនាំរបស់អាជ្ញាធរ និងមានកាតព័ត៌មាន ដែលបញ្ជាក់ពីក្រសួងព័ត៌មានក្តី។
ជំនួយការផ្នែកព័ត៌មាននៅអង្គការឃ្លាំមើលការបោះឆ្នោតខុមហ្វ្រែល លោកស្រី សុខ ឡេន បានលើកឡើងប្រហាក់ប្រហែលគ្នានេះដែរ ដោយលោកស្រីស្នើទៅរដ្ឋាភិបាល គួរមានវិធានការលុបបំបាត់វប្បធម៌លាភពណ៌នេះ ដើម្បីធានាសិទ្ធិអង្គការសង្គមស៊ីវិល និងសារព័ត៌មានសេរី។
លោកស្រីថា៖«នៅពេលខែនាងខ្ញុំចុះទៅមូលដ្ឋាន មានការលាភពណ៌ថាខុមហ្វ្រែលធ្វើការឱ្យគណបក្សប្រឆាំង អីចឹងខ្ញុំសូមស្នើសុំឱ្យបញ្ឈប់ធ្វើការលាបពណ៌ ការញុះញង់ប្រជាពលរដ្ឋឱ្យស្អប់អង្គការសង្គមស៊ីវិល»។
ជុំវិញបញ្ហានេះ អ្នកនាំពាក្យក្រសួងយុត្តិធម៌លោក ជិន ម៉ាលីន លើកឡើងថា ភាពមិនយល់គ្នានេះ អាចបណ្តាលមកពីកម្រិតយល់ដឹងរបស់មន្ត្រីអនុវត្តច្បាប់មួយចំនួន តែលោកក៏បានក្រើនរំឭកដល់អ្នកសារព័ត៌មានឱ្យពង្រឹងវិជ្ជាជីវៈផងដែរ ទើបអាចរួមចំណែកកសាងសង្គមមួយដែលមិនលាបពណ៌គ្នា។
លោកថា៖ «សមត្ថកិច្ចរបស់យើងពេលខ្លះការយល់ដឹងរបស់គាត់ក៏មានកម្រិតដែរ បង្កបញ្ហានៅថ្នាក់មូលដ្ឋាន ក៏ប៉ុន្តែវាជារឿងបុគ្គល យើងនឹងធ្វើការអប់រំ និងផ្សព្វផ្សាយអប់រំដល់ថ្នាក់ក្រោមជាតិ ដូចអាដហុកគេលើកឡើងថាឱ្យធ្វើការដល់មូលដ្ឋាន យើងធ្វើការទាំងអស់ហ្នឹង ដើម្បីធានាថាច្បាប់ដែលដាក់មកពីលើ ត្រូវអនុវត្តឱ្យបានត្រឹមត្រូវ នេះជាបញ្ហាប្រឈមរបស់យើង យើងត្រូវធ្វើជាប់»។
បន្ថែមពីនេះ ប្រធានក្រុមអ្នកនាំពាក្យរដ្ឋាភិបាលលោក ផៃ ស៊ីផាន លើកឡើងថា បញ្ហាប្រឈមដែលបានកើតឡើង អាចមកពីមន្ត្រីខ្លះជាប់ដិតដាមពីសម័យសង្គ្រាម ដោយសារតែកម្ពុជា ឆ្លងកាត់សង្គ្រាមច្រើនទសវត្ស។ តែលោកថាពេលនេះ រដ្ឋាភិបាលបានខំប្រឹងប្រែងបង្កើតស្ថាប័នអ្នកនាំពាក្យពីថ្នាក់ជាតិ រហូតដល់មូលដ្ឋាន រួមទាំងបង្កើតច្បាប់មួយចំនួនទៀត ដើម្បីទប់ស្កាត់អំពើពុករលួយ និងមន្ត្រីខិលខូច ព្រមទាំងលើកកម្ពស់សិទ្ធិអ្នកសារព័ត៌មានសេរី។
លោកថា៖ «នៅពេលដែលយើងមានអ្នកព័ត៌មានសេរី យើងមានបរិយាកាសល្អ ពួកខូច និងពួកពុករលួយវានឹងស្លាប់ហើយពេលហ្នឹង»។
យ៉ាងនេះក្តី នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ណុប វី សាទរការលើកឡើងរបស់មន្ត្រីរដ្ឋាភិបាលនេះ ប៉ុន្តែលោកយល់ថា អ្នកសារព័ត៌មាន និងក្រុមអង្គការសង្គមស៊ីវិល នៅតែរងការគំរាមដដែល បើមន្ត្រីខិលខូចមិនត្រូវបានចាត់វិធានការច្បាប់នោះ។
អង្គការអ្នកកាសែតគ្មានព្រំដែន (Reporters Without Borders) កាលពីដើមខែឧសភា ឆ្នាំ២០២២នេះបានចេញរបាយការណ៍ថ្មីមួយ ដោយចាត់ចំណាត់ថ្នាក់សេរីភាពសារព័ត៌មានកម្ពុជាឆ្នាំ២០២២ នៅតែអាក្រក់ដដែល ពោលគឺស្ថិតនៅលេខរៀងទី១៤២ លើ១៨០ប្រទេសនៅលើពិភពលោក។ ចំណែក សង្គមស៊ីវិលវិញ បានលើកឡើងថា សិទ្ធិមនុស្ស និងលទ្ធិប្រជាធិបតេយ្យ បានធ្លាក់ចុះចាប់តាំងពីឆ្នាំ២០១៧មក តែជាញឹកញាប់មន្ត្រីរដ្ឋាភិបាលតែងតែច្រានចោល។ តែយ៉ាងណា នៅក្នុងវេទិកាពិភាក្សានៅព្រឹកមិញនេះ តំណាងរដ្ឋាភិបាលទទួលយកការលើកឡើងរបស់សង្គមស៊ីវិលនេះ ទៅពិចារណា ដើម្បីកែលម្អទាំងវិស័យសិទ្ធិមនុស្ស និងវិស័យយុត្តិធម៌៕