សមត្ថកិច្ចបានចុះបង្ក្រាបទីតាំងលក់បារីអេឡិចត្រូនិក (E-Cigarette) ចំនួន៩ទីតាំង ស្ថិតនៅក្នុងភូមិសាស្ត្ររាជធានីភ្នំពេញ ជាបន្តបន្ទាប់ និងបានហៅអ្នកលក់ និងអ្នកប្រើប្រាស់បារីអេឡិចត្រូនិកសរុបចំនួន ២០នាក់ ទៅធ្វើការអប់រំ និងធ្វើកិច្ចសន្យា ឱ្យបញ្ឈប់ការធ្វើអាជីវកម្ម និងការប្រើប្រាស់។
ក្នុងរបាយការណ៍របស់អគ្គស្នងការដ្ឋាននគរបាលជាតិ បានឱ្យដឹងកាលពីថ្ងៃម្សិលមិញថា ចាប់ពីថ្ងៃទី២៣ ដល់ថ្ងៃទី២៥ ខែមិថុនានេះ សមត្ថកិច្ចជំនាញនៃមន្ទីរប្រឆាំងគ្រឿងញៀន បានចុះបង្ក្រាបទីតាំងលក់បារីអេឡិចត្រូនិក (E-Cigarette) ចំនួន៩ទីតាំង ក្នុងនោះបានឃាត់ខ្លួនអ្នកលក់បារីអេឡិចត្រូនិកចំនួន ១២នាក់ (ស្រី៣នាក់) និងអ្នកប្រើប្រាស់បារីអេឡិចត្រូនិក ចំនួន ៨នាក់ (ស្រី១នាក់) នាំទៅកាន់មន្ទីរប្រឆាំងគ្រឿងញៀនធ្វើការអប់រំ និងធ្វើកិច្ចសន្យា ឱ្យបញ្ឈប់ការធ្វើអាជីវកម្ម និងការប្រើប្រាស់បារីអេឡិចត្រូនិក រួចបានអនុញ្ញាតឱ្យពួកគេត្រឡប់ទៅផ្ទះវិញ។
ប្រភពដដែល បន្តថា អំឡុងពេលចុះបង្រ្កាបនោះ សមត្ថកិច្ចបានចាប់យកវត្ថុតាងមួយចំនួន រួមមាន ឧបករណ៍សម្រាប់ជក់បារីអេឡិចត្រូនិក Vape ចំនួន ១៩ឈុត ឧបករណ៍សម្រាប់ជក់បារីអេឡិចត្រូនិក Yooz ចំនួន ២១៥ ឈុត, ទឹកថ្នាំបារីអេឡិចត្រូនិក Vape ចំនួន ១ ៤១៧ដប និងទឹកថ្នាំបារីអេឡិចត្រូនិក Yooz ចំនួន ៩៨៥ដប និង ៩២២ប្រអប់ថែមទៀតផង។
របាយការណ៍ដដែល បញ្ជាក់ថា ដោយឡែក កាលពីថ្ងៃទី២៤ ខែមិថុនា ឆ្នាំ២០២២ កម្លាំងជំនាញការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ បានបង្ក្រាបទីតាំងលក់បារីអាឡិចត្រូនិក (E-Cigarette) ចំនួន៦ទីតាំងផ្សេងគ្នា ដោយបាននាំខ្លួនអ្នកលក់បារីអេឡិចត្រូនិកចំនួន ៨នាក់ (ស្រី១នាក់) ទៅកាន់ស្នងការដ្ឋាននគរបាលរាជធានីភ្នំពេញ ដើម្បីធ្វើការអប់រំ និងធ្វើកិច្ចសន្យាផងដែរ ។
ក្នុងប្រតិបត្តិការបង្ក្រាបនោះ សមត្ថកិច្ចបានចាប់យកវត្ថុតាង បារីអេឡិចត្រូនិចប្រភេទ Yooz និង Vape ចំនួន ៣៤០៩ ដើម, បារីអេឡិចត្រូនិកប្រភេទ Sisa ចំនួន ៣ដើម, ទឹកថ្នាំបារីអេឡិចត្រូនិកប្រភេទ Vape ចំនួន ៣៨៣ដប, ក្បាលបារីអេឡិចត្រូនិកប្រភេទ Yooz និង Vape ចំនួន ១ ០៣៣ឈុត និងខ្សែសាកបារីអេឡិចត្រូនិកចំនួន ៦ប្រអប់។
កាលពីថ្ងៃទី២៤ ខែមិថុនា ថ្មីៗនេះ ក្រសួងសុខាភិបាល និងក្រសួងអប់រំ យុវជន និងកីឡា ក៏អំពាវនាវដល់យុវជននិងប្រជាពលរដ្ឋ ជៀសវាងប្រើប្រាស់បារីអេឡិចត្រូនិចនេះផងដែរ។
សេចក្តីជូនព័ត៌មានរបស់ក្រសួងសុខាភិបាល បានលើកឡើងថា មានភស្តុតាងជាច្រើន បង្ហាញថា ការប្រើប្រាស់បារីអេឡិចត្រូនិច(e-cigarette) បង្កផលប៉ះពាល់ដល់សុខភាព បណ្តាលឱ្យញៀន បង្កផលប៉ះពាល់ធ្ងន់ធ្ងរដល់បេះដូង និងសួត រហូតដល់បាត់បង់ជីវិត ដោយសារនៅពេលប្រើប្រាស់បារីអេឡិចត្រូនិច សារធាតុគីមី និងជាតិនីកូទីនត្រូវបានស្រូបចូលទៅក្នុងរាង្គកាយ ហើយចូលទៅក្នុងខួរក្បាលរបស់អ្នកជក់។
ក្រសួងបន្តថា ការប្រើប្រាស់បារីអេឡិចត្រូនិច ក្នុងចំណោមកុមារ និងមនុស្សវ័យជំទង់ មានផលប៉ះពាល់ធ្ងន់ធ្ងរដល់ការអភិវឌ្ឍខួរក្បាល ដែលនាំឱ្យកើតផលវិបាករយៈពេលវែង និងអាចប៉ះពាល់ដល់ការចងចាំ ការសិក្សា និងបង្កជាជំងឺថប់អារម្មណ៍ជាដើម៕