គណបក្សប្រជាធិបតេយ្យមូលដ្ឋានបានបង្ហាញការជឿជាក់ថា ប្រសិនបើគណបក្សក្រៅរដ្ឋាភិបាលរួបរួមគ្នា ដើម្បីប្រកួតប្រជែងការបោះឆ្នោតថ្នាក់ជាតិជាមួយបក្សកាន់អំណាចខាងមុខ នោះបក្សក្រៅរដ្ឋាភិបាលអាចនឹងទទួលបានជាង៤០អាសនៈ ដែលគ្រប់គ្រាន់សម្រាប់ទប់ទល់ការដឹកនាំបែបឯកបក្ស។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន លោកបណ្ឌិត យ៉ង សាំងកុមារ បានបង្ហោះសារនៅលើទំព័រហ្វេសប៊ុករបស់លោកនៅថ្ងៃសៅរិ៍នេះថា កន្លងមក តាមលទ្ធផលបោះឆ្នោតឃុំ-សង្កាត់ ២០២២ គណបក្សភ្លើងទៀន(គភទ) អាចទទួលបាន ២១អាសន:។ ដោយឡែកគណបក្សលោក មិនទទួលបានអាសន:ដោយសារ គបម ប្រកួតតែ ៣២ ឃុំ-សង្កាត់។ ប៉ុន្តែតែនៅឆ្នាំ ២០២៣ ពេលដែល គបម និងគណបក្សផ្សេងទៀត ប្រកួតទូទាំងប្រទេសដោយគ្មានការចងសម្ព័ន្ធភាពជាមួយគ្នា នោះបក្សភ្លើងទៀនអាចទទួលបានប្រមាណ ១៥អាសន:។
ផ្ទុយទៅវិញ តែបើមានការសហការគ្នាទាំង គណបក្សភ្លើងទៀន និងគណបក្សក្រៅរដ្ឋាភិបាល ឬបក្សជាដៃគូផ្សេងទៀត អាចបានរហូតដល់ជាង ៤០អាសន: (បើតាមក្បួនគណិតសាស្រ្តនិងចិត្តសាស្រ្ត) ដែលគ្រប់គ្រាន់សម្រាប់ទប់ទល់ការដឹកនាំបែបឯកបក្ស។
ករណីនេះ លោក យ៉ង សាំងកុមារ បញ្ជាក់ថា គណបក្សលោកបានឯកភាពថា មានតែការរួបរួមគ្នារវាងក្រុមគណបក្សក្រៅរដ្ឋាភិបាលដែលមាននិន្នាការសេរីភាពនិយម បៃតងនិយមនិង យុត្តិធម៌សង្គម ទើបអាចទទួលបានសំឡេងគ្រប់គ្រាន់ចូលរួមតម្រង់ទិស ការដឹកនាំប្រទេសតាមគោលការណ៍ និងយន្តការប្រជាធិបតេយ្យសេរីពហុបក្សបែបសភានិយម។
លោកបន្តថា ការរួបរួមគ្នារវាងបក្សប្រជាធិបតេយ្យមូលដ្ឋាន និងគណបក្សក្រៅរដ្ឋាភិបាលផ្សេងទៀត មិនមែនទៅសុំចែកអាសន:ពីបក្សភ្លើងទៀនទេ គឺដើម្បីកសាងកម្លាំងនយោបាយសេរីពហុបក្សនៅក្នុងសភាជាតិទប់ទល់នឹងអំណាចឯកបក្ស ជាពិសេសក្នុងការធ្វើវិសោធនកម្មរដ្ឋធម្មនុញ្ញ និងការធ្វើច្បាប់នានា។
ទាក់ទិនបញ្ហានេះ លោក យ៉ង សាំងកុមារ អំពាវនាវដល់អ្នកនយោបាយនិងសកម្មជននយោបាយដែលមាននិន្នាការដូចគ្នា បើកចិត្តឱ្យទូលាយ មើលទៅមុខឱ្យបានវែងឆ្ងាយ ជាពិសេសរួមគ្នាកសាងស្ថាប័នសភាជាតិ រាជរដ្ឋាភិបាល តុលាការ ឱ្យក្លាយជាស្ថាប័នប្រជាធិបតេយ្យទប់ទល់នឹងអំណាចអត្តាធិបតេយ្យសម្រាប់កូនចៅជំនាន់ក្រោយ។
វីអូឌីនៅមិនទាន់សុំការឆ្លើយតបពីអ្នកនាំពាក្យគណបក្សភ្លើងទៀន លោក ថាច់ សេដ្ឋា បានទេនៅថ្ងៃសៅរ៍នេះ។
អនុប្រធានបណ្ដោះអាសន្នគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា គណបក្សក្រៅរដ្ឋាភិបាលចំនួន ៥ធ្លាប់បានជួបជជែកគ្នាម្តងរួចមកហើយ អំពីដំណើរការរួបរួមគ្នាជាធ្លុងមួយ ដើម្បីត្រៀមខ្លួនប្រកួតប្រជែងការបោះឆ្នោតថ្នាក់ជាតិជាមួយគណបក្សកាន់អំណាចខាងមុខនេះ ។
លោកថា បើសិនជាគណបក្សក្រៅរដ្ឋាភិបាលទាំងអស់ចង់ឱ្យកម្ពុជាទទួលបានលទ្ធិប្រជាធិបតេយ្យពិតប្រាកដ ជំរុញឱ្យមានការកែទម្រង់ គ.ជ.ប និងស្ថាប័នជាតិនោះ គួរតែមានការរួបរួមគ្នា ទើបអាចយកឈ្នះគណបក្សកាន់អំណាចបាននៅថ្ងៃអនាគត។
លោកមានប្រសាសន៍ថា៖ «ខ្ញុំយល់ថា បើគណបក្សក្រៅរដ្ឋាភិបាលរួបរួមគ្នា ចុះសម្រុងគ្នាមែន អាចធ្វើឱ្យគណបក្សកាន់អំណាចមានការព្រួយបារម្ភ ព្រោះថា បើយើងរួបរួម យើងបូកសំឡេងឆ្នោតនៅក្រៅរដ្ឋាភិបាល សំឡេងឆ្នោតអ្នកដែលអត់ចេញទៅបោះឆ្នោត សំឡេងឆ្នោតរប៉ាត់រប៉ាយ និងសំឡេងឆ្នោតអ្នកបោះឆ្នោត ហើយសំឡេងអ្នកដែលមិនទាន់បានចុះឈ្មោះបោះឆ្នោត អាចមកចូលរួមបោះឆ្នោតជូនគណបក្សក្រៅរដ្ឋាភិបាល»។
លោកបន្ថែមថា៖ « ចរន្តនៃការផ្លាស់ប្តូរនៅតែមាន ជាពិសេសក្រុមយុវជន ព្រោះសម័យនេះ យុវជនបានទទួលព័ត៌មាន បានសិក្សាច្រើន យល់ដឹងពីសង្គមជាតិច្រើន។ សង្គមជាតិមានបញ្ហាអ្វី បើធៀបនឹងប្រទេសដទៃទៀតក្នុងសកលលោក ហើយគេចង់បានអនាគតរបស់គេល្អជាដើម»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនចាប់អារម្មណ៍ចំពោះការលើកឡើងរបស់គណបក្សក្រៅរដ្ឋាភិបាលដែលមានបំណងរួបរួមគ្នានោះទេ។ លោកបញ្ជាក់ថា គណបក្សកាន់អំណាចនៅតែមានភាពរឹងមាំ និងចាស់ទុំផ្នែកនយោបាយ ដោយគ្មានគណបក្សណាមកប្រកួតយកឈ្នះបាននោះទេ។
លោកមានប្រសាសន៍ថា៖ «យើងអត់មានអ្វីដែលត្រូវព្រួយបារម្ភការដណ្តើមអាសនៈអ្វីនោះទេ ពីព្រោះយើងដឹងហើយថា គណបក្សតូចតាចដែលមកចងសម្ព័ន្ធភាពជាមួយគ្នាជាថ្មី គឺចេញពីគណបក្សប្រឆាំងដដែលតើ។ បើគាត់ចេញពីគណបក្សប្រឆាំងដដែលគាត់ចាញ់ឆ្នោតតាំងពីឆ្នាំ២០១៣មក។ អ៊ីចឹងវាអត់មានអ្វីគួរឱ្យព្រួយបារម្ភទេ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ មានប្រសាសន៍ថា អ្នកនយោបាយតែងតែលើកឡើងនូវភាពខ្លាំងរបស់គណបក្សខ្លួន ដើម្បីបង្ហាញទៅដៃគូប្រកួតប្រជែងនយោបាយជាមួយគ្នា ។ លោកផ្តល់ជាអនុសាសន៍ថា បើបក្សក្រៅរដ្ឋាភិបាលរួបរួមគ្នា ហើយចង់យកឈ្នះគណបក្សកាន់អំណាច លុះត្រាតែពួកគេមានភាពស្មោះត្រង់ រឹងមាំ និងចុះធ្វើការងារយ៉ាងសកម្មនៅតាមមូលដ្ឋានជាដើម។
លោកផ្តល់ជាអនុសាសន៍ដូចនេះថា៖ «គណបក្សក្រៅរដ្ឋាភិបាលដែលច្របាច់បញ្ចូលគ្នា ឬរួបរួមគ្នា ធ្វើការឱ្យសកម្ម ហើយត្រូវមានសកម្មជននៅតាមការិយាល័យបោះឆ្នោត ហើយគ្រប់តាមគោលដៅសំខាន់ៗនៅក្នុងថ្នាក់មូលដ្ឋាន ទើបពួកគាត់អាចមានឱកាសក្នុងការប្រកួតប្រជែងយកអាសនៈនៅក្នុងរដ្ឋសភាជាមួយគណបក្សកាន់អំណាចបាន»។
លោកបន្ថែមថា៖ «ប៉ុន្តែបើសិនជាពួកគាត់រៀបចំមិនច្បាស់លាស់ ហើយមិនបានហ្មត់ចត់ទេ ខ្ញុំគិតថា ការរំពឹងទុករបស់បក្សក្រៅរដ្ឋាភិបាល ខ្ញុំគិតថាមិនទទួលបានផលវិជ្ជមានណាមួយនោះទេ»។
កាលពីថ្ងៃទី១១ ខែកក្កដា គណបក្សក្រៅរដ្ឋាភិបាលចំនួន៥ រួមមាន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ គណបក្សកែទម្រង់កម្ពុជា គណបក្សកម្ពុជានិយម និងគណបក្សភ្លើងទៀន បានកំណត់យក៨ចំណុច សម្រាប់យកទៅជជែកជាមួយគណបក្សប្រជាជនកម្ពុជានោះ រួមមាន ការតម្រូវឱ្យសមាសភាព គ.ជ.ប ត្រូវមានប្រធានជាបុគ្គលឯករាជ្យ។ លើសពីនេះ សមាជិក គ.ជ.ប ៤រូបមកពីប្រភពឯករាជ្យ មិនជាប់ពាក់ព័ន្ធនយោបាយ។ បន្ថែមពីនេះ ភាពមិនលម្អៀងរបស់មន្ត្រី គ.ជ.ប, អព្យាក្រឹត្យស្ថាប័នតុលាការ យោធា នគរបាលជាតិ មន្ត្រីរាជការស៊ីវិលគ្រប់លំដាប់ថ្នាក់ រួមទាំងមេភូមិ និងអនុភូមិ និងត្រូវទប់ស្កាត់រាល់សកម្មភាពបំភិតបំភ័យជាដើម៕