សាច់ញាតិសកម្មជនគណបក្សសង្គ្រោះជាតិដែលត្រូវបានតុលាការរំលាយ បង្ហាញការតូចចិត្ត ត្បិតនៅថ្ងៃបុណ្យភ្ជុំបិណ្ឌប្រពៃណីជាតិ បែរជាមិនបានជួបជុំគ្រួសារ ដូចគ្រួសារគេដទៃ ដោយសារសមាជិកគ្រួសារពួកគាត់ត្រូវជាប់ពន្ធនាគារទាំងមិនបានធ្វើខុសដូចការចោទប្រកាន់នោះទេ។
អ្នកស្រី ព្រំ ចន្ថា ត្រូវជាភរិយារបស់ លោក កាក់ កុម្ភារ ដែលជាសកម្មជនគណបក្សសង្រ្គោះជាតិ បានថ្លែងប្រាប់វីអូឌីនៅថ្ងៃអាទិត្យថា ជាង២ឆ្នាំមកហើយ គាត់បានឃ្លាតឆ្ងាយពីគ្រួសារ និងមិនបានជួបគ្នា ជាពិសេសនៅថ្ងៃបុណ្យទានធំៗ ដូចជាថ្ងៃបុណ្យភ្ជុំបិណ្ឌជាដើម។
ករណីនេះ គាត់មានអារម្មណ៍សោកសៅនៅពេលថ្ងៃបុណ្យប្រពៃណីជាតិ ត្រូវបានឃ្លាតឆ្ងាយពីគ្រួសារ ខណៈអ្នកជិតខាងតែងតែសួរនាំពីគ្រួសារគាត់ ដែលធ្វើឱ្យគាត់មានអារម្មណ៍ពិបាក និងតូចតិច ខណៈប្តីរបស់គាត់ត្រូវបានជាប់ពន្ធនាគារដោយអយុត្តិធម៌។
អ្នកស្រីមានប្រសាសន៍ថា៖ «បើនិយាយពីការសោកសៅ និងការព្រាត់ប្រាស់គ្រួសារ ខ្ញុំបែកបាក់គ្រួសារជាង២ឆ្នាំហើយ បើគិតជាឱកាសថ្ងៃភ្ជុំមានរយៈពេល៣ដងហើយ ដែលនាងខ្ញុំខានជួបជុំគ្រួសារ។ ខ្ញុំមានអារម្មណ៍ថា ពិបាក នៅពេលដែលឃើញក្រុមគ្រួសារជួបជុំគ្នាមានអារម្មណ៍ក្តុកក្តួលយ៉ាងខ្លាំង ដោយសារប្តីជាប់ពន្ធនាគារ ហើយខ្ញុំនាំកូនបានត្រឹមតែជួបជុំមីងមា ហើយពេលមកមីងមាសួរគ្រប់គ្នា ខ្ញុំមានអារម្មណ៍ពិបាកឆ្លើយណាស់ ព្រោះគាត់មិនទាន់ចេញពីពន្ធនាគារ»។
អ្នកស្រី អ៊ុក ចន្ធី ត្រូវជាភរិយារបស់លោក យឹម សារ៉េត អតីតសមាជិកក្រុមប្រឹក្សាឃុំចន្ទ្រាគណបក្សសង្គ្រោះជាតិ ស្រុករមាសហែក ខេត្តស្វាយរៀង មានប្រសាសន៍ថា ស្វាមីគាត់ ត្រូវបានអាជ្ញាធរក្រសួងមហាផ្ទៃបញ្ជូនពីពន្ធនាគារព្រៃស ទៅឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាម កាលពីចុងខែសីហា ឆ្នាំ២០២២។
អ្នកស្រីបន្តថា ក្រោយពីស្វាមីគាត់ជាប់ពន្ធនាគារជាង២ឆ្នាំមកនេះ ធ្វើឱ្យគាត់ជួបបញ្ហាប្រឈមច្រើន ក្នុងជីវភាពគ្រួសារ ហើយពេលជួបជុំគ្រួសារមានការរឹតត្បិត ព្រោះក្រៅពីសាច់ញាតិដែលមានឈ្មោះនៅក្នុងសៀវភៅគ្រួសារ អនុរក្សពន្ធនាគារ មិនអនុញាតឱ្យជួបសួរសុខទុក្ខនោះទេ។
អ្នកស្រីនិយាយថា៖ «ខាងពន្ធនាគារគេមិនអនុញាតឱ្យប្រពន្ធ និងកូនដែលមានឈ្មោះនៅក្នុងសៀវភៅគ្រួសារនោះទេ កាលគាត់ជាប់ពន្ធនាគារនៅព្រៃស ឱ្យតែមានកាតចាក់វ៉ាក់សាំង និងសៀវភៅគ្រួសារ មិត្តភក្តិអាចជួបសួរសុខទុក្ខបានទាំងអស់ ប៉ុន្តែនៅពេលទៅត្រពាំងផ្លុង គេទាមទាឱ្យអ្នកដែលមានឈ្មោះក្នុងសៀវភៅគ្រួសារតែប៉ុណ្ណោះ ទើបចូលសួរសុខទុក្ខគាត់បាន»។
ទាក់ទិនបញ្ហានេះ អ្នកស្រីយល់ឃើញថា ការបញ្ជូនស្វាមីគាត់ពីពន្ធនាគារព្រៃស ទៅពន្ធនាគារត្រពាំងផ្លុង ហើយនៅពេលដែលមិត្តិភក្តិ និងសាច់ញាតិដែលមិនមានឈ្មោះក្នុងសៀវភៅគ្រួសារ មិនអនុញាតិឱ្យគាត់សួរសុខទុក្ខបាន ធ្វើឱ្យគាត់កាន់តែព្រួយបារម្ភយ៉ាងខ្លាំងជុំវិញការរឹតត្បិតសេរីភាព ដែលផ្ទុយពីច្បាប់។
ករណីនេះ អ្នកស្រីអំពាវនាវទៅរដ្ឋាភិបាលឱ្យដោះលែងស្វាមីគាត់ និងអ្នកជាប់ឃុំពាក់ព័ន្ធរឿងនយោបាយផ្សេងទៀតឱ្យមានសេរីភាពវិញ ពីព្រោះពួកគាត់មិនបានធ្វើខុសដូចការចោទប្រកាន់នោះទេ។
វីអូឌីមិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃ២៥ ខែកញ្ញា។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការលើកឡើងរបស់សាច់ញាតិដែលអះអាងថា គាត់ពិបាកក្នុងការជួបជុំគ្រួសារនាអំឡុងពេលបុណ្យភ្ជុំបិណ្ឌ មិនដូចគ្រួសារអ្នកដទៃ ទំនងជាពួកគេឃើញអ្នកជិតខាងសួរនាំជុំវិញរឿងគ្រួសាររបស់គាត់។
បញ្ហានេះ លោកជំរុញទៅអ្នកនយោបាយគួរយកបញ្ហាជជែកគ្នា សម្របសម្រួលផ្នែកនយោបាយ ដើម្បីកុំឱ្យមានការរិះគន់ពីសហគមន៍ជាតិ និងអន្តរជាតិ ជុំវិញលទ្ធិប្រជាធិបេយ្យនៅកម្ពុជា។
កាលពីថ្ងៃទី១៧ ខែមីនា ឆ្នាំ២០២២ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក រស់ ពិសិដ្ឋ បានប្រកាសសាលក្រមផ្ដន្ទាទោសថ្នាក់ដឹកនាំគណបក្សសង្គ្រោះជាតិ ចំនួន៧នាក់ រួមមាន លោក សម រង្សី លោកស្រី ជូឡុង សូមូរ៉ា លោកស្រី មូរ សុខហួរ លោក តុប វណ្ណចាន់ លោក នុត រំដួល លោក ហូរ វ៉ាន់ លោក អេង ឆៃអ៊ាង ក្នុងម្នាក់ៗ១០ឆ្នាំ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ញុះញង់ឱ្យយោធិនមិនស្ដាប់បញ្ជា និងរួមគំនិតក្បត់»។
ចំណែកសកម្មជនគណបក្សនេះជាច្រើននាក់ទៀត ត្រូវបានតុលាការផ្តន្ទាទោសដាក់ពន្ធនាគារម្នាក់ៗ ៥ឆ្នាំ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងរួមគំនិតក្បត់»។ ប៉ុន្តែទោស៥ឆ្នាំនេះ ត្រូវអនុវត្តទោសក្នុងពន្ធនាគារចំនួន៣ឆ្នាំ ៨ខែ ហើយទោសនៅសល់ត្រូវបានព្យួរ៕