មន្រ្តីជាន់ខ្ពស់នៃអគ្គនាយកដ្ឋានប្រេងកាតកម្ពុជា ឱ្យដឹងថា មកដល់ពេលនេះ គ្រប់ភាគីដែលពាក់ព័ន្ធរឿងប្រេងឆៅដែលបានបាត់ជិត៣០ម៉ឺនបារ៉ែល ពីកម្ពុជា គឺបានឈានដល់តំណាក់កាលបញ្ចប់កិច្ចការនានា តាមនីតិវិធីផ្លូវច្បាប់ ពោលគឺនៅរង់ចាំតែការវាយតម្លៃអំពីទីផ្សារប្រេងឆៅក្នុងដំណាក់បន្ទាប់ទៀត ដែលជាកិច្ចការនៅសេសសល់ចុងក្រោយប៉ុណ្ណោះ។
តាមរយៈសារជាសំឡេងរបស់អ្នកនាំពាក្យក្រសួងរ៉ែ និងថាមពល នៅលើបណ្តាញសង្គម លោក ជៀប សួរ បានប្រាប់វីអូឌី នៅថ្ងៃទី២៩ ខែកញ្ញាថា ម្ចាស់បំណុលរបស់ក្រុមហ៊ុន គ្រីសអិនណឺ ជី(GrisEnergy) ភាគីតំណាងកប៉ាល់ MT Strovolos និងរដ្ឋាភិបាលកម្ពុជា បានចុះកិច្ចព្រមព្រៀងរួមគ្នារួចរាល់ កាលពីថ្ងៃទី១០ ខែកញ្ញា កន្លងទៅថ្មីៗនេះ ដើម្បីលក់ប្រេងឆៅដែលយកបានមកវិញនេះ ដើម្បីចែកផលសេដ្ឋកិច្ចគ្នា។
បើតាមលោក ជៀប សួរ នៅចំពោះមុខនេះ ប្រេងឆៅជិត៣០ម៉ឺនបារ៉ែលនោះ បានផ្ទេរចេញពីកប៉ាល់ MT Strovovol ទៅកប៉ាល់មួយថ្មីទៀតហើយ ដែលជាកប៉ាល់អ្នកបញ្ជាទិញប្រេងឆៅនេះ។ ប្រភពដដែលបន្តថា អ្វីដែលមិនទាន់ដាច់ស្រេចនៅពេលនេះ គឺត្រូវរង់ចាំការវាយតម្លៃពីទីផ្សារប្រេងឆៅសិន ដែលភាគីទាំង៣ កំណត់យកតម្លៃទីផ្សារប្រេងឆៅ សម្រាប់លក់ចេញគឺក្នុងខែកញ្ញានេះ ហើយកម្ពុជាទទួលបានផលពីការលក់ប្រេងឆៅនេះ ចំនួន៧០ភាគរយ។
លោកបន្តថា៖ «សម្រាប់៧០ភាគរយហ្នឹងយើងអត់ទាន់ប្រាប់ឱ្យច្បាស់ថានឹងត្រូវទទួលបានថវិកាប៉ុន្មាននៅឡើយទេ ដោយសារតម្លៃប្រេងដែលបានឯកភាពគ្នាហ្នឹង គឺត្រូវយកមធ្យមភាគនៅក្នុងខែ៩នេះ គឺជាខែដែលយើងលក់ប្រេងហ្នឹង។ នេះជាលក្ខណៈបច្ចេកទេសដោយសារយើងដឹងហើយ គឺប្រេងវាប្រែប្រួលគ្រប់ម៉ោងគ្រប់ពេលរៀងរាល់ថ្ងៃផង»។
លោក ជៀប សួរ បន្ថែមថា៖ «អ៊ីចឹងអ្វីដែលឯកភាពគ្នាហ្នឹង គឺយកមធ្យមភាគក្នុងខែដែលបានទិញលក់ហ្នឹង ដូច្នេះខែកញ្ញាអត់ទាន់ដាច់នៅឡើយ យើងអត់ទាន់បានគិតគូរឡើយទេ។ ចំពោះមធ្យមភាគរបស់ប្រេងហ្នឹងក្នុងមួយបារ៉ែលប៉ុន្មានឡើយទេ ដើម្បីយកមកគណនា។ នៅពេលគណនាឃើញហើយ យើងត្រូវដកការចំណាយពាក់ព័ន្ធផ្សេងៗ ដូចជាចំណាយការវាស់វាល់ប្រេង ចំណាយទៅលើកប៉ាល់មកដឹក ចំណាយទៅលើថ្លៃទីផ្សាររបស់ប្រេងឆៅហ្នឹង ហើយនិងចំណាយការថែទាំគុណភាពប្រេងអីផ្សេងៗ។ ដូច្នេះមកដល់ពេលនេះ យើងអត់ទាន់គណនានៅឡើយទេ នៅរង់ចាំទាំងអស់គ្នាឡើយ ហើយការទូទាត់ប្រេងគឺក្នុងរយៈពេល៣០ថ្ងៃ ក្រោយពីការលក់ប្រេងបានកើតឡើងហ្នឹង»។
ដំណក់ប្រេងឆៅ ត្រូវបានបូមចេញពីប្លុកA ដោយក្រុមហ៊ុន គ្រីសអិនណឺជី ចេញពីដែនសមុទ្រកម្ពុជា ជាលើកដំបូង កាលពីថ្ងៃទី២៩ ខែធ្នូ ឆ្នាំ២០២០។ ក្រុមហ៊ុន គ្រីសអិនណឺជី របស់សិង្ហបូរី ជាប្រតិបត្តិករ ទទួលបានសិទ្ធិធ្វើអាជីវកម្មបូមប្រេងឆៅនេះ។ ក៏ប៉ុន្តែ ក្រុមហ៊ុនមេរបស់ក្រុមហ៊ុន គ្រីសអិនណឺជីនេះ បានប្រកាសក្ស័យធន នៅអំឡុងពេលប្រតិបត្តិការ ដែលមិនអាចបន្តអាជីវកម្មរបស់ខ្លួនបាន ដូចផែនការដែលបានគ្រោងទុក។
នៅមុនពេលនាវិកនៃកប៉ាល់ឈ្មោះ MT Strovolos នេះដឹកប្រេងឆៅចេញពីកម្ពុជា កាលពីថ្ងៃទី១៩ ខែមិថុនា ឆ្នាំ២០២១ ដោយមិនបានជូនដំណឹងដល់អាជ្ញាធរកម្ពុជា នាវានេះត្រូវបានក្រុមហ៊ុន គ្រីសអិនណឺជី ជួលក្នុងតួនាទីជាអ្នកផ្ទុក និងផ្ទេរប្រេងឆៅ នៅក្នុងតំបន់នៃគម្រោងប្រេងកាតអប្សរា។
សម្រាប់នាយកប្រតិបត្តិ នៃអង្គការតម្លាភាពកម្ពុជា ដែលហៅកាត់ថា TI លោក ប៉ិច ពិសី យល់ឃើញថា វាជាមោទកភាពដែលនៅទីបំផុតទៅ កម្ពុជាអាចទទួលបានអ្វីដែលខ្លួនបាត់បង់មកវិញ។លោកបន្តថា នេះគឺជាដំណឹងដ៏រីករាយមួយ ព្រោះចំណូលដែលបានពីការលក់ប្រេងឆៅនេះ នឹងជួយបង្កើនសេដ្ឋកិច្ចរបស់ជាតិ។
លោកបន្តថា៖ «ជាការសាទរមួយដែលរដ្ឋាភិបាល ជាពិសេសក្រសួងរ៉ែ និងថាមពល ហើយនិងក្រុមអ្នកច្បាប់របស់ក្រសួងហ្នឹង ដែលរៀបចំនីតិវិធីរហូតឈានដល់ការនាំយកប្រេងដែលត្រូវបានលួចហ្នឹងមកកាន់កម្ពុជាវិញ។ នេះជាព័ត៌មានមួយល្អ»។
បើទោះបែបណា ក្រុមហ៊ុនឈ្មោះ World Trankers Management របស់នាវាដែលដឹកប្រេងឆៅចេញពីកម្ពុជា ធ្លាប់បានចេញសេចក្តីប្រកាសព័ត៌មាន កាលពីអំឡុងខែសីហា ឆ្នាំ២០២១ ដោយច្រានចោលការចោទប្រកាន់នានាថា ខ្លួនលួចដឹកប្រេងឆៅជិត៣០ម៉ឺនបារ៉ែលនេះ ចេញពីដែនសមុទ្រកម្ពុជា។ ម្ចាស់ក្រុមហ៊ុននៃនាវា MT Strovolos បញ្ជាក់នៅក្នុងសេចក្តីថ្លែងការណ៍របស់ខ្លួនថា តាមពិតក្រុមហ៊ុនអ្នកជួលបញ្ជាក់ថា ទំនិញនោះគឺជាកម្មសិទ្ធិរបស់ខ្លួន។
ចំណែក រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា ធ្លាប់ប្រាប់អ្នកសារព័ត៌មានកាលពីខែសីហា ឆ្នាំ២០២១ថា ការកើនឡើងនៃតម្លៃប្រេងឆៅនៅលើទីផ្សារប្រេងឆៅអន្តរជាតិ គឺប្រេងដែលបាត់ជិត៣០ម៉ឺនបារ៉ែលនេះ បើគិតជាចំណូលប្រហែល ២០លានដុល្លារអាមេរិក៕
