តុលាការកំពូលនឹងប្រកាសសាលដីកាលើសំណុំរឿងកុមារ កាក់ សុវណ្ណច្ឆ័យ កូនសកម្មជនគណបក្សសង្គ្រោះជាតិដែលតុលាការបានរំលាយ នៅថ្ងៃពុធសប្តាហ៍ក្រោយ ក្រោយពីមេធាវីការពារក្តីឱ្យកុមាររូបនេះ ស្នើតុលាការជាន់ខ្ពស់មួយនេះ លុបចោលសាលក្រមផ្តន្ទាទោសរបស់សាលាដំបូងរាជធានីភ្នំពេញ។
នៅព្រឹកថ្ងៃពុធនេះ តុលាការកំពូលបានបើកសវនាការជំនុំជម្រះលើបណ្ដឹងសាទុក្ខរបស់មេធាវីការពារក្ដីឱ្យកុមារ កាក់ សុវណ្ណច្ឆ័យ ដែលជាកូនរបស់លោក កាក់ កុម្ភារ សកម្មជនគណបក្សសង្គ្រោះជាតិដែលត្រូវតុលាការរំលាយ។
ក្នុងបន្ទប់សវនាការនៅតុលាការកំពូល លោក ជុំ សំបាន តំណាងអយ្យការតុលាការកំពូល បានឡើងធ្វើសន្និដ្ឋានដោយស្នើទៅប្រធានក្រុមប្រឹក្សាជំនុំជម្រះ លោក គង់ ស្រ៊ីម ឱ្យតម្កល់សាលដីកាសាលាឧទ្ធរណ៍ទុកនៅដដែល ក្រោមហេតុផលថា ការសម្រេចនោះជារឿងត្រឹមត្រូវ។ ចំពោះការលើកឡើងរបស់មេធាវីការពារសិទ្ធិដែលកុមារ កាក់ សុវណ្ណច្ឆ័យ មានជំងឺអូទីស្សឹមនោះ តំណាងអយ្យការរូបនេះ អះអាងថា មេធាវីពុំមានលិខិតធ្វើកោសលវិច័យ ដើម្បីបញ្ជាក់ឡើយ។
លោក ជុំ សំបាន ថា៖ «បើផ្អែកលើភស្តុតាង តំណាងអយ្យការឃើញមានការផ្សព្វផ្សាយលើបណ្ដាញសង្គមពីសំណាក់ កាក់ សុវណ្ណច្ឆ័យ មែនដូច្នេះ កាក់ សុវណ្ណច្ឆ័យ ក៏ត្រូវទទួលទោសដូចអ្នកដទៃដែរ ដូច្នេះតំណាងអយ្យការ ស្នើប្រធានក្រុមប្រឹក្សាតម្កល់សាលដីកាសាលាឧទ្ធរណ៍ទុកជាបានការដដែល»។
តែយ៉ាងណា មេធាវីការពារក្ដីឱ្យកុមារ កាក់ សុវណ្ណច្ឆ័យ គឺលោក សំ សុគង់ លើកឡើងថា នៅដំណាក់កាលចៅក្រមស៊ើបសាលាដំបូងរាជធានីភ្នំពេញ រូបលោកបានស្នើឱ្យយកគ្រូពេទ្យទៅពិនិត្យ ដើម្បីបញ្ជាក់ឱ្យច្បាស់ថា កូនក្ដីរបស់លោកមានជំងឺអូទីស្សឹមឬអត់ ប៉ុន្តែចៅក្រមស៊ើបមិនបានបំពេញកិច្ចនេះឡើយ។
មួយវិញទៀត លោកថា ការប្ដឹងសាទុក្ខនេះ ដោយសារកូនក្តីរបស់លោកមិនសុខចិត្តនឹងការសម្រេចរបស់ចៅក្រមសាលាឧទ្ធរណ៍ ដែលមិនបានពិចារណាលើសំណើរបស់តំណាងអយ្យការដែលស្នើសុំឱ្យទម្លាក់បទចោលប្រកាន់លើកូនក្ដីរបស់លោក ដើម្បីកុំឱ្យប៉ះពាល់ដល់ច្បាប់ការពារសិទ្ធិកុមារ។
លោក សំ សុគង់ ស្នើទៅប្រធានក្រុមប្រឹក្សាជំនុំជម្រះ លុបចោលសាលក្រមផ្ដន្ទាទោសសាលាដំបូងរាជធានីភ្នំពេញ ដើម្បីឱ្យកូនក្ដីមានសេរីភាព ដោយថា សាលក្រមផ្តន្ទាទោសនោះ បានធ្វើឡើងប្រាស់ចាកពីមាត្រា៣១ ៣៩ និង៤០ នៃក្រមព្រហ្មទណ្ឌកម្ពុជា។
លោក សំ សុគង់ ថា៖ «តំណាងអយ្យការសាលាឧទ្ធរណ៍ ស្នើទៅប្រធានក្រុមប្រឹក្សាពិចារណាលើផលប្រយោជន៍អនីតិជន និងតំណាងអយ្យការសាលាឧទ្ធរណ៍ ស្នើសុំឱ្យរួចផុតបទចោទប្រកាន់ដែរ។ មេធាវីការពារក៏បានឯកភាពដែរ»។
ក្រោយពីបើកសវនាការជិត ១ម៉ោង ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម បានប្រកាសថា សាលដីកាសំណុំរឿងនេះ នឹងប្រកាសនៅថ្ងៃទី១២ ខែតុលា ឆ្នាំ២០២២ ខណៈសវនាការនាព្រឹកមិញនេះ មិនមានវត្តមានជនជាប់ចោទចូលរួមទេ។
កាលពីថ្ងៃទី១៤ ខែមីនា ឆ្នាំ២០២២ សាលាឧទ្ធរណ៍រាជធានីភ្នំពេញ សម្រេចតម្កល់សាលក្រមសាសាដំបូងរាជធានីភ្នំពេញ ដែលបានកាត់ទោសកុមារ កាក់ សុវណ្ណច្ឆ័យ វ័យ១៦ឆ្នាំ ដាក់ពន្ធនាគាររយៈពេល៨ខែ និងដាក់ឱ្យស្ថិតក្រោមការត្រួតពិនិត្យរបស់តុលាការរយៈពេល២ឆ្នាំ។
កុមារ កាក់ សុវណ្ណច្ឆ័យ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ»។ ប៉ុន្តែតុលាការបង្គាប់ឱ្យកុមាររូបនេះ អនុវត្តទោសក្នុងពន្ធនាគាររយៈពេល ៤ខែ និង១៥ថ្ងៃ ចំណែកទោសដែលនៅសល់ត្រូវព្យួរសាកល្បងរយៈពេល២ឆ្នាំ។
ម្ដាយរបស់កុមារ កាក់ សុវណ្ណច្ឆ័យ គឺអ្នកស្រី ព្រំ ចាន់ថា មានប្រសាសន៍ថា មូលហេតុដែលគាត់ និងកូនប្រុសមិនបានចូលរួមសវនាការ ដោយសារពួកគាត់ទៅចូលរួមបា្ររព្ធទិវាគ្រូបង្រៀនពិភពលោក នៅទីលានប្រជាធិបតេយ្យ។
ចំពោះសវនាការព្រឹកមិញនេះ អ្នកស្រីមានក្ដីសង្ឃឹមតិចតួចដែលតុលាការកំពូលទម្លាក់បទចោទប្រកាន់ទៅលើកូនប្រុស ដោយសារកន្លងមក អ្នកស្រីកត់សម្គាល់ឃើញថា ឱ្យតែតុលាការថ្នាក់ក្រោមសម្រេចយ៉ាងម៉េច តុលាការកំពូលក៏សម្រេចបែបនោះដែរ។
អ្នកស្រី ព្រំ ចាន់ថា បន្តថា បច្ចុប្បន្នកូនរបស់អ្នកស្រីគ្មានសេរីភាពហើយ រងសម្ពាធថែមទៀតផងដែរ។
អ្នកស្រី ព្រំ ចាន់ថា ថ្លែងថា៖ «រឹតត្បិតសេរីភាពក្នុងការដើរហើរ ទី១ តាមដានមិនឱ្យកូនក្ដីខ្ញុំទៅណាទៅណី ហើយទៅបង្ហាញខ្លួនគ្រប់ខែទាំងអស់ គ្រប់ថ្ងៃដែលត្រូវតំណត់ថ្ងៃឱ្យបង្ហាញខ្លួន បើតុលាការមើលឃើញយើងធ្វើអ្វីដែលមិនពេញចិត្តគេ! គេអាចកោះហៅយើងទៅបង្ហាញខ្លួននៅតុលាការ ដើម្បីឱ្យគេដឹងយើងនៅណាមិនអាចឱ្យយើងទៅណាបាន។ អ៊ីចឹងវារឹតត្បិតសេរីភាពរបស់ក្មេង ហើយវាទៅរៀនអីក៏សម្ពាធ ធម្មតាមានការរើសអើងពីមជ្ឈដ្ឋានទូទៅ ក៏ដូចជាកូនសិស្សដូចគ្នា ឬក៏អ្នកផ្សេងទៀត។ អ៊ីចឹងវាលំបាកណាស់ ដល់អ៊ីចឹងវានៅតែមានទោស ជាប់គុកមានជញ្ជាំង មកជាប់គុកឥតជញ្ជាំងវិញ វាធ្ងន់ធ្ងរជាងមុនទៀត»។
យ៉ាងណាក៏ដោយ កុមារ កាក់ សុវណ្ណច្ឆ័យ ក៏ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្ដងរួចមកហើយ កាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមារារូបនេះ ត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារា កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្ដាលឱ្យបែកក្បាលដេរ ២០ថ្នេរ។ ប៉ុន្តែជាច្រើនខែមកហើយ សមត្ថកិច្ចនៅមិនទាន់រកឃើញមុខជនដៃដល់ ដើម្បីយកមកផ្ដន្ទាទោសនៅឡើយទេ៕
