លោកនាយករដ្ឋមន្ត្រី ហ៊ុន សែន លើកឡើងថា កម្ពុជាបានផលិតនាឡិកាដៃចំនួន ២៥ គ្រឿង សម្រាប់ជូនប្រធានគណៈប្រតិភូ ដែលមកចូលរួមប្រជុំកំពូលអាស៊ាននៅកម្ពុជាក្នុងសប្តាហ៍ក្រោយនេះ ដើម្បីទុកជាវត្ថុអនុស្សាវរីយ៍ និងដើម្បីបង្ហាញថា ជាផលិតផលស្នាដៃរបស់ខ្មេរ។
ទំព័រហ្វេសប៊ុករបស់លោកនាយករដ្ឋមន្ត្រី បានសរសេរកាលពីម្សិលមិញថា នាឡិកាដៃចំនួន២៥គ្រឿង ផលិតដោយកម្ពុជា នឹងរៀបចំទុកជូនដល់ប្រធានគណៈប្រតិភូដែលអញ្ជើញមកចូលរួមប្រជុំកំពូលអាស៊ាននៅកម្ពុជាឆ្នាំ២០២២ សម្រាប់ជាវត្ថុអនុស្សាវរីយ៍។
លោកបន្តថា នាឡិកានេះ ត្រូវបានរៀបចំផ្គុំឡើងដោយអ្នកបច្ចេកទេសខ្មែរសុទ្ធសាធដែលជាផ្នែកមួយនៃការរីកចម្រើនខាងវិទ្យាសាស្រ្តនិងបច្ចេកទេសរបស់កម្ពុជា ដែលលោកហៅថា «ខ្មែរធ្វើបាន»។
លោកថា៖«មុននេះខ្ញុំបាននិយាយថាកម្ពុជាបានផលិត នាឡិកាដៃចំនួន ២៥គ្រឿងសម្រាប់ជាវត្ថុអនុស្សាវរីយ៍ជូនប្រធានគណៈប្រតិភូ ដែលអញ្ជើញមកចូលរួមប្រជុំកំពូលអាស៊ាននៅកម្ពុជាឆ្នាំ២០២២។ នាឡិកានេះ ត្រូវបានរៀបចំផ្គុំឡើងដោយអ្នកបច្ចេកទេសខ្មែរសុទ្ធសាធដែលជាផ្នែកមួយនៃការរីកចំរើនខាងវិទ្យាសាស្រ្តនិង បច្ចេកទេសរបស់កម្ពុជា(ខ្មែរធ្វើបាន)។ ជូនភ្ជាប់រូបភាពនាឡិកាដើម្បីស្គាល់ជាមុន»។
ការរៀបចំនាឡិការបស់លោក ហ៊ុន សែន នេះ ធ្វើឡើងខណៈដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលប្រចាំឆ្នាំអាស៊ាន-អាមេរិក លើកទី៤០ និង៤១។ កិច្ចប្រជុំនេះ នឹងចាប់ផ្ដើមពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ នៅរាជធានីភ្នំពេញ។
បើតាមសេចក្ដីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជា កាលពីថ្ងៃទី២៨ ខែតុលា ឆ្នាំ២០២២ ឱ្យដឹងថា ក៏មានកិច្ចប្រជុំកំពូលប្រចាំឆ្នាំ អាស៊ាន-អាមេរិកមួយ ដោយប្រធានាធិបតីសហរដ្ឋអាមេរិក លោក ចូ បៃឌិន (Joe Biden) ក៏បានធ្វើដំណើរមកប្រទេសកម្ពុជា នៅថ្ងៃទី១២ និងទី១៣ ខែវិច្ឆិកា ខាងមុខនេះ ដើម្បីចូលរួមកិច្ចប្រជុំកំពូលប្រចាំឆ្នាំអាមេរិក-អាស៊ាន និងកិច្ចប្រជុំកំពូលអាស៊ីបូព៌ាផងដែរ៕
