ធនាគារអភិវឌ្ឍន៍អាស៊ី (ADB) បានអនុម័តកម្ចីចំនួន ៧0លានដុល្លារ ដល់ប្រទេសកម្ពុជា ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការធ្វើកំណែទម្រង់ស៊ីជម្រៅ លើវិស័យអប់រំកម្រិតមធ្យមសិក្សាទុតិយភូមិនៅទូទាំងប្រទេស។
ក្នុងសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ី (ADB) បានឱ្យដឹងនៅថ្ងៃទី៧ ខែវិច្ឆិកានេះថា ធនាគារនេះ បានអនុម័តកម្ចីចំនួន ៧0លានដុល្លារ ដល់ប្រទេសកម្ពុជា ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការធ្វើកំណែទម្រង់ស៊ីជម្រៅលើផ្នែកវិទ្យសាស្រ្ត បច្ចេកវិទ្យា វិស្វកម្ម និងគណិតវិទ្យា (STEM) នៃការអប់រំកម្រិតមធ្យមសិក្សាទុតិយភូមិ នៅទូទាំងប្រទេស។
ប្រភពដដែល បន្តថា គម្រោងវិទ្យាសាស្ត្រ និងបច្ចេកវិទ្យា ក្នុងការអប់រំមធ្យមសិក្សាទុតិយភូមិនេះ នឹងជួយកម្ពុជា អភិវឌ្ឍន៍ធនធានមនុស្សប្រកបដោយគុណភាពខ្ពស់ ជាពិសេសក្នុងវិស័យ STEM ហើយគម្រោងនេះ នឹងពង្រីកលទ្ធភាពទទួលបានការអប់រំកម្រិតមធ្យមសិក្សាទុតិយភូមិ ដែលផ្អែកលើស្តង់ដារ លើកកម្ពស់ការអប់រំ STEM ដោយគុណភាព និងពង្រឹងសមត្ថភាពស្ថាប័នសម្រាប់ការធ្វើផែនការ ការគ្រប់គ្រង និងការផ្តល់ការអប់រំមធ្យមសិក្សាទុតិយភូមិ។
អ្នកឯកទេសជាន់ខ្ពស់ផ្នែកអប់រំរបស់ADB សម្រាប់តំបន់អាស៊ីអាគ្នេយ៍ លោកស្រី Lynnette Perez បានលើកឡើងនៅក្នុងសេចក្តីប្រកាសព័ត៌មាននោះថា ដោយសារតម្រូវការខ្លាំងនៃជំនាញ STEM គម្រោងនេះនឹងជួយពង្រឹងប្រព័ន្ធអប់រំរបស់កម្ពុជា តាមរយៈការធ្វើឱ្យប្រសើរឡើងនូវការអប់រំ STEM បច្ចុប្បន្ន ដើម្បីតាមទាន់ការកើនឡើងនៃតម្រូវការសម្រាប់កម្លាំងពលកម្មដែលមានសមត្ថភាពខ្ពស់។
លោកស្រី បន្តថា៖ «ការងារនេះ មានសារៈសំខាន់ណាស់សម្រាប់ប្រទេសកម្ពុជា ក្នុងការបំពេញជំនាញ ចំណេះដឹង និងសមត្ថភាពសតវត្សទី២១ ទៅក្នុងការអប់រំ STEM របស់ខ្លួន នឹងធ្វើឱ្យប្រសើរឡើងនូវជំនាញរបស់សិស្សក្នុងការគិតបែបវិភាគ ការដោះស្រាយបញ្ហា ការច្នៃប្រឌិត និងការសហការ ដែលទាំងនេះនឹងត្រូវការសម្រាប់សេដ្ឋកិច្ចផ្អែកលើចំណេះដឹង»។
សេចក្តីប្រកាសព័ត៌មានរបស់ADB បញ្ជាក់ទៀតថា ក្នុងចំណោមផែនការរបស់គម្រោង ក៏នឹងមានការធ្វើឱ្យប្រសើរឡើងនូវសម្ភារៈបរិក្ខារនៃសាលាមធ្យមសិក្សាទុតិយភូមិចំនួន១៤ និងសាលាមធ្យមសិក្សាទុតិយភូមិទូទៅចំនួន១០៣ ដោយបំប្លែងថ្នាក់រៀនចំនួន៣ ដោយក្នុងសាលានីមួយៗទៅជាថ្នាក់រៀនវិទ្យាសាស្ត្រចំនួន ២ និងបណ្ណាល័យមួយ ដែលមានបំពាក់ឧបករណ៍ សម្ភារៈបង្រៀន សៀវភៅ គ្រឿងសង្ហារឹម និងធនធានបច្ចេកវិទ្យាអប់រំចាំបាច់ផងដែរ។
បន្ថែមពីនេះ និងមានការបង្កើនជំនាញគរុកោសល្យ ចំណេះទ្រឹស្តីរបស់គ្រូបង្រៀន និងពង្រឹងការផ្តល់ការអប់រំ STEM នោះ ADB ថាគម្រោងនឹងផ្តល់នូវការអភិវឌ្ឍវិជ្ជាជីវៈជាបន្តបន្ទាប់ ក្នុងការបង្រៀនប្រកបដោយប្រសិទ្ធភាព និងប្រកបដោយភាពច្នៃប្រឌិតដល់គ្រូបង្រៀន STEM ចំនួន ៧៧៥នាក់ ដែលមានស្ត្រីយ៉ាងតិច ៤0% និងសាស្ត្រាចារ្យ STEM ចំនួន ២៥នាក់ មកពីវិទ្យាស្ថានជាតិអប់រំ ដែលមានស្ត្រីយ៉ាងហោចណាស់ ៨0% ៕
