កម្មករ២នាក់ទៀត ដែលបម្រើការងារនៅរោងចក្រ អ៊ីស្តក្រោន ហ៊្វូតវែរ អ៊ិនដាសស្ទ្រី ឯ.ក (EASTCROWN FOOTWEAR INDUSTRY CO,.LTD) ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានប្តឹងទៅក្រសួងការងារ ករណីថៅកែបញ្ឈប់ពីការងារ ក្រោយពួកគេនាំគ្នាបង្កើតសហជីពក្នុងរោងចក្រ។
គិតត្រឹមថ្ងៃទី៧ ខែវិច្ឆិកា ឆ្នាំ២០២២ កម្មករ-កម្មការិនីចំនួន ៩នាក់ហើយ ដែលបម្រើការងារនៅរោងចក្រ អ៊ីស្តក្រោន ត្រូវបានថៅកែចេញលិខិតបញ្ចប់កិច្ចសន្យាការងារ ក្រោយកម្មករទាំងនោះនាំគ្នាបង្កើតសហជីពមួយឈ្មោះ «សហជីពឯករាជ្យ» នៅក្នុងរោងចក្រ ដើម្បីជួយតស៊ូមតិ និងការពារសិទ្ធិជូនកម្មករ។
ក្នុងបណ្តឹងដាក់ទៅក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៣ ខែវិច្ឆិកា ឆ្នាំ២០២២ ដែលវីអូឌីទើបទទួលបាននៅថ្ងៃចន្ទនេះ បានឱ្យដឹងថា កាលពីថ្ងៃទី៣១ ខែសីហា ឆ្នាំ២០២២ កម្មករប្រមាណ១០នាក់ បានបោះឆ្នោតបង្កើតសហជីពឯករាជនៅក្នុងរោងចក្រ អ៊ីស្តក្រោន។ បណ្តឹងបន្តថា ក្រោយបោះឆ្នោតបង្កើតសហជីពរួចហើយ ក្រុមកម្មករបានដាក់ពាក្យស្នើសុំទៅក្រសួងការងារ ដោយមន្ត្រីក្រសួងការងារបានចេញបង្កាន់ដៃទទួលស្គាល់ពាក្យស្នើសុំចុះបញ្ជីនោះពីកម្មករ។
ប្រភពដដែល អះអាងថា ក្រោយមកនៅថ្ងៃទី៤ ខែតុលា ដល់ថ្ងៃទី១ ខែវិច្ឆិកា ឆ្នាំ២០២២ ថៅកែរោងចក្របានបញ្ឈប់ថ្នាក់ដឹកនាំ និងស្ថាបនិកសហជីពចំនួន៩នាក់ជាបន្តបន្ទាប់ ដោយពុំបានបញ្ជាក់ពីមូលហេតុត្រឹមត្រូវឡើយ។
លើសពីនេះ បណ្តឹងរបស់កម្មករបានលើកឡើងថា ប្រធានរដ្ឋបាលរោងចក្រអ៊ីស្តក្រោន លោក វ៉ា អ៊ីហុង បានប្រាប់ទៅក្រុមកម្មករឱ្យលាលែងពីសហជីពឯករាជ្យ ឱ្យទៅចុះចូលជាមួយសហជីពដែលបង្កើតឡើងដោយរោងចក្រវិញ ហើយបានគំរាមកម្មករថា ប្រសិនបើពួកគេមិនព្រមចុះចូលទេ ខាងរោងចក្រនឹងបញ្ចប់កិច្ចសន្យាការងារពួកគេទាំងអស់គ្នា និងមិនបើកប្រាក់ឈ្នួលឱ្យថែមទៀត។
មួយទៀតនោះ រដ្ឋបាលរោងចក្រ បានគំរាមថា នឹងបញ្ជូនឈ្មោះកម្មករដែលបង្កើតសហជីពឯករាជ្យទៅក្នុងបញ្ជីខ្មៅ ហើយបញ្ជូនទៅតាមបណ្តារោងចក្រផ្សេងៗទៀត ដើម្បីកុំឱ្យទទួលយកកម្មករទាំងនោះចូលបម្រើការងារផងដែរ។
បណ្តឹងរបស់កម្មករបានចាត់ទុកទង្វើរបស់រោងចក្រនេះ ថាអនុវត្តផ្ទុយពីច្បាប់ស្តីពីសហជីព ត្រង់មាត្រា៤៣ និងមាត្រា៦៧ ដែលពួកគេត្រូវទទួលបាននូវការការពារពិសេសពីការរងគ្រោះ និងបញ្ឈប់ពីការងារ ដោយសារពួកគេជាបេក្ខជនឈរឈ្មោះឱ្យគេបោះឆ្នោតឱ្យ និងជាស្ថាបនិកសហជីពដែលកំពុងស្ថិតនៅក្នុងការស្នើសុំចុះបញ្ជីនៅនាយកដ្ឋានប្រធានសហជីពមូលដ្ឋាន និងប្រតិភូបុគ្គលិកផងដែរ។
ស្ថាបនិកសហជីពឯករាជ្យប្រចាំរោងចក្រ អ៊ីស្តក្រោន លោក ឌួង តុលា មានប្រសាសន៍នៅថ្ងៃចន្ទនេះថា ករណីថៅកែបញ្ឈប់កម្មករជាបន្តបន្ទាប់នេះ គឺជាចេតនារើសអើងសហជីព និងបានរំលោភលើសិទ្ធិកម្មករ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ធ្លាប់ប្រាប់វីអូឌីថា មន្ត្រីជំនាញរបស់ក្រសួង កំពុងដោះស្រាយបញ្ហានេះ។
តំណាងក្រុមហ៊ុនបញ្ជាទិញម៉ាកភូម៉ា(PUMA) បានប្រាប់វីអូឌីតាមរយៈប្រព័ន្ធអេឡេចត្រូនិចអ៊ីម៉ែលកាលពីថ្ងៃទី២៥ ខែតុលាថា ក្រុមហ៊ុនមួយនេះ បេ្តជ្ញាការពារសិទ្ធិកម្មករក្នុងការបង្កើតសហជីព ហើយមិនអត់ឱនចំពោះការរំលោភបំពានលើសេរីភាពសហជីពឡើយ។
បើតាមកម្មករ រោងចក្រអ៊ីស្តក្រោន ហ៊្វូតវែរ អ៊ិនដាសស្ទ្រី ឯ.ក (EASTCROWN FOOTWEAR INDUSTRY CO,.LTD)មានកម្មករប្រមាណ ៣ ០០០នាក់ កំពុងបម្រើការងារ ដែលមានថៅកែជាជនជាតិចិន និងជារោងចក្រផលិតស្បែកជើងម៉ាក ភូម៉ា (PUMA)៕
