ក្រុមកូដករណាហ្គាវើលដ៏ នៅថ្ងៃចន្ទនេះ បន្តធ្វើកូដកម្មនៅមុខក្រុមហ៊ុន ក្នុងខណ្ឌចំការមន រាជធានីភ្នំពេញ ដើម្បីទាមទារឱ្យមានដំណោះស្រាយវិវាទការងារដែលបានអូសបន្លាយរយៈពេលជាង ១ឆ្នាំ បើទោះបីរដ្ឋបាលរាជធានីភ្នំពេញ បានព្រមានចាត់វិធានការច្បាប់លើពួកគេក្ដី។
កូដករណាហ្គាវើលដ៍ កញ្ញា សៀក បញ្ញា ប្រាប់អ្នកសារព័ត៌មាននៅកន្លែងធ្វើកូដកម្មខាងមុខក្រុមហ៊ុនណាហ្គាវើលដ៍ថា ការដែលពួកគាត់បន្តធ្វើកូដកម្មនេះ ដោយសារថៅកែក្រុមហ៊ុន និងក្រសួង-ស្ថាប័នពាក់ព័ន្ធ មិនបានដោះស្រាយវិវាទការងារឱ្យមានយុត្តិធម៌ និងតម្លាភាពនៅឡើយ។ កញ្ញាបន្តថា ពួកគាត់មិនមានក្ដីបារម្ភចំពោះការព្រមានរបស់អាជ្ញាធរនោះទេ ដោយសារ ការធ្វើកូដកម្មនេះ ស្របតាមច្បាប់ការងារ រដ្ឋធម្មនុញ្ញ និងច្បាប់អន្តរជាតិ។
កញ្ញាថា៖ «រដ្ឋបាលរាជធានីភ្នំពេញ គាត់ចេញសេចក្ដីប្រកាសគំរាមកំហែងពួកខ្ញុំសព្វបែបយ៉ាង ដូចខ្ញុំបញ្ជាក់ខាងដើមអ៊ីចឹង គោលជំហរពួកខ្ញុំ នៅដដែល ពួកខ្ញុំគឺនៅបន្តធ្វើកូដកម្ម រហូតទាល់មានដំណោះស្រាយ។ សាលារាជធានីភ្នំពេញ រួមទាំងស្ថាប័នរដ្ឋពាក់ព័ន្ធទាំងអស់ ចង់ឱ្យអត់មានកូដកម្មកើតឡើង លុះត្រាតែឱ្យថៅកែចេញមកដោះស្រាយមក។ ពួកខ្ញុំមិនមែនចង់ផ្អាកទេ គឺចង់ឈប់តែម្ដង ប៉ុន្តែឱ្យតែមានដំណោះស្រាយសម្រាប់ពួកខ្ញុំ»។
កូដករណាហ្គាម្នាក់ទៀត អ្នកនាង ស្រីមិញ លើកឡើងដែរថា ការព្រមានរបស់អាជ្ញាធររាជធានីភ្នំពេញ មកលើពួកគាត់មិនមែនជារឿងថ្មីឡើយ។ អ្នកនាងបន្តថា ពួកគាត់ទាំងអស់គ្នា មិនចង់បន្តការតវ៉ានៅមុខក្រុមហ៊ុនបែបនេះទេ ប៉ុន្តែដោយសារថៅកែក្រុមហ៊ុន មិនព្រមដោះស្រាយវិវាទការងារជូនពួកគាត់។
អ្នកនាងថា៖ «យើងនៅបន្ត ព្រោះយើងមានដំណោះស្រាយពីក្រុមហ៊ុន អ៊ីចឹងខ្ញុំនៅបន្តធ្វើកូដកម្ម លុះត្រាមានដំណោះស្រាយជូនពួកខ្ញុំ។ ពួកខ្ញុំមិនមានការព្រួយបារម្ភទេ ព្រោះរឿងព្រមានរឿងអីហ្នឹង វាមានច្រើនហើយ គាត់តែងព្រមានរាប់មិនអស់ទេ អ៊ីចឹងវាអត់មានអីចម្លែកចិត្តទេ»។
កាលពីថ្ងៃទី៥ ខែវិច្ឆិកា ចុងសប្តាហ៍មុននេះ រដ្ឋបាលរាជធានីភ្នំពេញ បានស្នើឱ្យក្រុមកូដករក្រុមហ៊ុនណាហ្គាវើលដ៍ ផ្អាកធ្វើកូដកម្ម ខណៈកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានថ្ងៃទី១០ ដល់ថ្ងៃទី១៣ ខែវិច្ឆិកានេះ។ អាជ្ញាធរក៏បានព្រមានចាត់វិធានការច្បាប់ផងដែរ បើកូដករនៅបន្តការតវ៉ា ដែលធ្វើឱ្យប៉ះពាល់ដល់សន្តិសុខ និងសណ្ដាប់ធ្នាប់សង្គម កំឡុងពេលកិច្ចប្រជុំកំពូលអាស៊ាននេះ។
ក្រោយពីការធ្វើកូដកម្មប្រមាណ១០ខែមកនេះ កូដករណាហ្គាវើលដ៏ជិត ១០រូបហើយ ត្រូវបានសាលាដំបូងរាជធានីភ្នំពេញ កោះហៅឱ្យចូលបំភ្លឺ ក្រោមបណ្តឹងរបស់ក្រុមហ៊ុន។
ពាក់ព័ន្ធនឹងរឿងវិវាទការងារក្រុមហ៊ុនណាហ្គាវើលដ៍នេះ កាលពីខែមករាដើមឆ្នាំ២០២២នេះ ថ្នាក់ដឹកនាំ និងសកម្មជនសហជីពចំនួន ១១នាក់ ដែលជាតំណាងរបស់ក្រុមកូដករណាហ្គាវើលដ៏ ក៏ត្រូវបានតុលាការចោទប្រកាន់ និងឃុំខ្លួនជាបណ្តោះអាសន្ន ក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ «រារាំងការអនុវត្តវិធានការទប់ស្កាត់ការរាលដាលជំងឺកូវីដ-១៩»។
អភិបាលរងរាជធានីភ្នំពេញ លោក កើត ឆែ មានប្រសាសន៍ថា ប្រសិនបើកូដករណាហ្គានៅបន្តធ្វើកូដកម្ម កំឡុងពេលកម្ពុជារៀបចំកិច្ចប្រជុំកំពូលអាស៊ាន នោះពួកគេនឹងប្រឈមផ្លូវច្បាប់ហើយ។
លោកថា៖ «គាត់ធ្វើទៅ ប៉ុន្តែគាត់នឹងទទួលខុសត្រូវផ្លូវច្បាប់បន្តទៀតទៅ មានអីព្រោះយើងបានជម្រាបគាត់អស់ហើយ»។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា រដ្ឋាភិបាល និងអាជ្ញាធរត្រូវដោះស្រាយវិវាទការងារមួយនេះ ជាជាងចេញលិខិតកោះហៅ និងឱ្យកូដករផ្អាកធ្វើកូដកម្មទាំងដំណោះស្រាយមិនទាន់មានតម្លាភាពសម្រាប់ពួកគាត់នោះ។ អ្នកស្រីបន្តថា ការចេញលិខិតឱ្យកូដករផ្អាកធ្វើកូដកម្ម និងព្រមានចាត់វិធានការច្បាប់នេះ មិនមែនជាដំណោះស្រាយឡើយ ប៉ុន្តែវានឹងធ្វើឱ្យប៉ះពាល់មុខមាត់រដ្ឋាភិបាលទៅវិញទេ។
វិវាទការងារក្រុមហ៊ុនណាហ្គាវើលដ៍ បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង ៨ ០០០នាក់ ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។ យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕
