ប្រធានអង្គភាពអ្នកនាំពាក្យរដ្ឋាភិបាល ចាត់ទុកការអំពាវនាវរបស់វេទិកាពលរដ្ឋ ដែលឱ្យពលរដ្ឋងើបឡើងធ្វើបាតុកម្មនៅអំឡុងពេលកិច្ចប្រជុំអាស៊ាននោះថា ជាផ្នែកមួយដែលគ្មានតម្លៃអ្វីសម្រាប់ឱ្យថ្នាក់ដឹកនាំ និងប្រមុខកាទូតអាស៊ាន ត្រូវចាប់បង្ខំឱ្យរដ្ឋាភិបាលកម្ពុជាដែលជាប្រធានប្តូរវេនអាស៊ាន ត្រូវតែអនុវត្តស្មារតីនៃកិច្ចព្រមព្រៀងសន្តិភាពទីក្រុងប៉ារីសឡើយ។
ការឆ្លើយតបរបស់មន្រ្តីជាន់ខ្ពស់របស់រដ្ឋាភិបាលកម្ពុជា បានធ្វើឡើងស្របពេលដែលវេទិកាពលរដ្ឋ បានចេញសារកៀរគរឱ្យពលរដ្ឋ ត្រូវងើបធ្វើបាតុកម្ម នៅថ្ងៃប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដទៃទៀត ដែលកម្ពុជាជាអ្នកដឹកនាំ។
ប្រាប់ វីអូឌី នៅថ្ងៃចន្ទនេះ លោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលកម្ពុជា ចំអកឱ្យលោក គឹម សុខ ប្រធានវេទិកាពលរដ្ឋដែលមានមូលដ្ឋានៅនៅសហរដ្ឋអាមេរិក ថានេះជាគំនិតរវើរវាយ កើតចេញពីបុគ្គលផ្ទាល់ខ្លួន។ លោកបន្តថា ការពិត កិច្ចប្រជុំកំពូលអាស៊ាននេះ មិនមែនធ្វើឡើងជាទ្វេភាគីទេ ហេតុនេះបើទោះជាមានការបំផុសឱ្យមានចលនាតវ៉ាបែបណាក៏ដោយ ក៏វាគ្មានសារសំខាន់ដែរ។
មួយវិញទៀត លោកថា ស្មារតីនៃកិច្ចព្រមព្រៀងសន្តិភាពទីក្រុងប៉ារីស ស្តីពីកម្ពុជានេះ ត្រូវបានដាក់បញ្ចូលនៅក្នុងរដ្ឋធម្មនុញ្ញរួចអស់ទៅហើយ។
លោកបន្តថា៖ «ការប្រកាសរបស់ គឹម សុខ ឱ្យប្រជាពលរដ្ឋងើបឡើងដើម្បីតវ៉ាជាមួយភាគីហត្ថលេខីដែលបានអញ្ជើញមកកម្ពុជាគ្រាន់តែជាការបង្កើតមួយឱ្យគេចាប់អារម្មណ៍។ ប៉ុន្តែវាអត់មានប្រសិទ្ធិភាពអ្វីទេ ព្រោះវេទិកានេះជាវេទិកាពហុភាគីទេ»។
កិច្ចប្រជុំកំពូលអាស៊ានលើកទី៤០ និងលើកទី៤១ និងកិច្ចប្រជុំកំពូលពាក់ព័ន្ធ ដែលកម្ពុជាធ្វើជាម្ចាស់ផ្ទះនេះ នឹងប្រព្រឹត្តទៅចាប់ពីថ្ងៃទី១០ ដល់ថ្ងៃទី១៣ ខែ វិច្ឆិកា ឆ្នាំ២០២២។
លោក គឹម សុខ ដែលជាអ្នកវិភាគនយោបាយផងនោះ បានលើកឡើងនៅក្នុងសេចក្តីថ្លែងការណ៍របស់វេទិកាពលរដ្ឋ នៅថ្ងៃទី៧ ខែវិច្ឆិកានេះថា ពលរដ្ឋត្រូវចេញតវ៉ានៅទូទាំងប្រទេស ចាប់ពីថ្ងៃនេះ រហូតដល់ថ្ងៃចុងក្រោយនៃកិច្ចប្រជុំកំពូលអាស៊ាន។
តាមរយៈសេចក្តីថ្លែងការណ៍នេះ វេទិកាពលរដ្ឋ លើកឡើងទៀតថា កាលៈទេសៈនេះ ជាឱកាសមួយដ៏កម្រសម្រាប់អ្នកនយោបាយ សង្គមស៊ីវិល សកម្មជន និងពលរដ្ឋ ដែលប្រាថ្នាចង់បានប្រទេសមួយ មានប្រជាធិបតេយ្យ និងយុត្តិធម៌សង្គម ស្របពេលដែលប្រមុខរដ្ឋ និងប្រមុខរដ្ឋាភិបាលដែលជាភាគីហត្ថលេខីនៃកិច្ចព្រមព្រៀងទីក្រុងប៉ារីស នឹងមានវត្តមាននៅកម្ពុជា អំឡុងពេលកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធផ្សេងទៀត។
មិនតែប៉ុណ្ណោះ វេទិកាពលរដ្ឋ បញ្ជាក់បន្ថែមថា នៅពេលនេះ ពលរដ្ឋមិនគួរនៅញញើតនឹងអំណាចនាយករដ្ឋមន្រ្តីទេ ព្រោះអំណាចរបស់ពលរដ្ឋនេះ ក៏មានបញ្ញត្តិដែរនៅក្នុងរដ្ឋធម្មនុញ្ញ និងកិច្ចព្រមព្រៀងទីក្រុងប៉ារីស។
ចំណែក ស្ថាបនិកនៃអង្គការអភិវឌ្ឍន៍ផ្នត់គំនិត លោក សេក សុជាតិ យល់ឃើញថា អ្វីដែលលោក គឹម សុខ លើកឡើងនៅក្នុងសេចក្តីថ្លែងការណ៍នៃវេទិកាពលរដ្ឋនោះ ជាជម្រើសមួយល្អ សម្រាប់ប្រទេសដែលគោរពសិទ្ធិពលរដ្ឋជាមូលដ្ឋាន ដូចជា សហរដ្ឋអាមេរិក និងសហភាពអឺរ៉ុបជាដើម។ ក៏ប៉ុន្តែ លោកថា សម្រាប់បរិបថនៅកម្ពុជា ការកៀរគរនេះ ហាក់ជួបឧបសគ្គ ដោយសារសិទ្ធិសម្តែងមតិរបស់ពលរដ្ឋ មិនត្រូវបានបើកទូលាយប៉ុន្មាននោះឡើយ។
លោកបន្តថា៖ «ខ្ញុំគិតថា បញ្ហានេះ គឺវាមានភាពលំបាកនៅក្នុងប្រទេសកម្ពុជា។ មួយវិញទៀត យើងឃើញថា បញ្ហាទាំងអស់នេះ គឺជាបញ្ហាមួយ ប្រសិនបើកម្ពុជាស្ថិតនៅក្នុងប្រទេសដែលមានលទ្ធិប្រជាធិបតេយ្យពិតប្រាកដ ហើយមានការចូលរួមពីគណបក្សប្រឆាំង ខ្ញុំគិតថា វាអាចនឹងមានការជួបជុំ និងការស្នើសុំ ឬក៏ដាក់ញត្តិ ឬក៏ការសម្តែងមតិនៅទីសាធារណៈ ដើម្បីសហគមន៍អន្តរជាតិដែលមកចូលរួមប្រជុំនៅរាជធានីភ្នំពេញនេះ បានដឹង បានឮ និងបានឃើញអំពីអ្វីដែលជាក្តីបំណង ឬក៏ការចង់បានពីប្រជាពលរដ្ឋដែលជាម្ចាស់ឆ្នោតហ្នឹង»។
ប្រទេសកម្ពុជា ធ្លាប់ធ្វើជាម្ចាស់ផ្ទះប្តូរវេន២លើករួចមកហើយ កាលពីឆ្នាំ២០០២ និងឆ្នាំ២០១២ បន្ទាប់ពីប្រទេសកំពុងអភិវឌ្ឍន៍មួយនេះ ត្រូវបានដាក់បញ្ចូលជាសមាជិកអាស៊ាន កាលពីឆ្នាំ១៩៩៩។ បើទោះជាបែបណា សម្រាប់លោកនាយករដ្ឋមន្រ្តី បានថ្លែងការពារកាលពីថ្ងៃទី១០ ខែតុលា ឆ្នាំ២០២២ ថា តាមពិត ស្មារតីនៃកិច្ចព្រមព្រៀងដែលបានបញ្ចប់សង្រ្គាមស៊ីវិលទាំង៤ភាគី នៅកម្ពុជា ត្រូវបានដាក់បញ្ចូលទៅក្នុងរដ្ឋធម្មនុញ្ញរួចអស់ទៅហើយ។ ក៏ប៉ុន្តែសម្រាប់លោក គឹម សុខ ដែលលើកឡើងនៅថ្ងៃនេះ នៅក្នុងវេទិកាពលរដ្ឋ នៅតែចាត់ទុកថា ធម្មនុញ្ញនៃកិច្ចព្រមព្រៀងសន្តិភាពទីក្រុងប៉ារីសនេះ ត្រូវបានរដ្ឋាភិបាលអនុវត្តក្នុងកម្រិតតិចតួច ជាពិសេសគោលការណ៍ដែលធានាពីប្រជាធិបតេយ្យសេរីពហុបក្ស មិនត្រូវបានគាំពារដោយអង្គការរដ្ឋឡើយ៕
