មន្ត្រីជាន់ខ្ពស់ក្រសួងការពារជាតិកម្ពុជា បានឱ្យដឹងថា មន្ត្រីយោធាកម្ពុជាម្នាក់ ត្រូវបានអាជ្ញាធរថៃឃាត់ខ្លួននៅខេត្តស្រះកែវ និងចោទប្រកាន់ថាបានលួចបើករថយន្តចូលប្រទេសថៃ និងប្រើប្រាស់អាវុធខុសច្បាប់ ហើយករណីនេះក្រុមការងារជំនាញកម្ពុជា កំពុងសហការជាមួយអាជ្ញាធរថៃ ដើម្បីដោះស្រាយបញ្ហានេះ។
អ្នកនាំពាក្យក្រសួងការពារជាតិកម្ពុជា លោក ឈុំ សុជាតិ មានប្រសាសន៍នៅថ្ងៃចន្ទនេះថា បើតាមព័ត៌មានបឋមដែលលោកទទួលបាន មានមន្ត្រីយោធាកម្ពុជាមួយរូបឈ្មោះ សុខ បានផល មានឋានន្តរសក្ដិវរសេនីយ៍ឯក នៃអគ្គលេខាធិការដ្ឋាន ក្រសួងការពារជាតិ ត្រូវបានកម្លាំងយោធាថៃឃាត់ខ្លួនបានកាលពីថ្ងៃទី៥ ខែវិច្ឆិកា ឆ្នាំ២០២២ បន្ទាប់ពីមន្ត្រីយោធារូបនោះ បានបើករថយន្តចូលដីថៃ ដោយគ្មានការអនុញ្ញាត ហើយថែមទាំងបានដកកាំភ្លើងខ្លីដើររេរានៅក្នុងទឹកដីថៃ។
បើតាម លោក ឈុំ សុជាតិ ក្រុមការងារជំនាញកម្ពុជា កំពុងសហការជាមួយភាគីថៃ ដើម្បីដោះស្រាយបញ្ហានេះ។
លោកមានប្រសាសន៍ថា៖ «គេចោទម៉េចចោទទៅ ខ្ញុំទាក់ទងទៅខាងអគ្គលេខាធិការដ្ឋាននៃក្រសួងការពារជាតិ[ធ្វើការងារ]ហ្នឹងហើយ»។
យោងតាមសារព័ត៌មានក្នុងស្រុក ដែលបានផ្សព្វផ្សាយនៅថ្ងៃទី៧ ខែវិច្ឆិកានេះ ឱ្យដឹងថា កាលពីព្រលប់ថ្ងៃទី៥ ខែវិច្ឆិកា ឆ្នាំ២០២២ មានរថយន្តម៉ាកហ្ស៊ីប ព៌ណខ្មៅមួយគ្រឿង ពាក់ស្លាកលេខ កម្ពុជា PICH NIK បានបើកបរឆ្លងព្រំដែនតាមច្រកអន្តរជាតិភ្នំដី ហើយបានបំពាននៅប៉ុស្តិ៍ត្រួតពិនិត្យរបស់ភាគីថៃ ដោយបន្ថែមល្បឿនចូលទៅក្នុងទឹកដីថៃ ទាំងគ្មានច្បាប់អនុញ្ញាត។
ប្រភពដដែលបន្តថា ក្រោយមក រថយន្តនោះត្រូវបានកម្លាំងយោធាថៃឡោមព័ទ្ធ អស់រយ:ពេលជាង ១៧ម៉ោង ទើបឃាត់ខ្លួនបាននៅត្រង់ចំណុចផ្លូវបែកជា៤ ក្នុងស្រុកវឌ្ឍនាណាក់ខន ខេត្តស្រះកែវ ប្រទេសថៃ។ ករណីនេះ អាជ្ញាធរថៃបានចោទប្រកាន់ទៅលើអ្នកបើកបរដែលជាមន្ត្រីយោធាកម្ពុជានោះចំនួន ៤ករណី រួមមាន ធ្វើដំណើរចូលក្នុងទឹកដីថៃដោយខុសច្បាប់ មិនបានឆ្លងកាត់អន្តោប្រវេសន៍, នាំរថយន្តចូលក្នុងទឹកដីថៃ ដោយគ្មានច្បាប់អនុញ្ញាតពីមន្ត្រីគយ, ប្រើប្រាស់អាវុធខុសច្បាប់ក្នុងទឹកដីថៃ និងរារាំងកិច្ចប្រតិបត្តិការរបស់សមត្ថកិច្ច ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា មន្ត្រីយោធាកម្ពុជា ត្រូវបានអាជ្ញាធរថៃឃាត់ខ្លួននោះ ទំនងជាកម្ពុជាមិនអាចជួយដោះស្រាយឱ្យរួចផុតពីការចោទប្រកាន់របស់អាជ្ញាធរថៃបានទេ ដោយសារប្រទេសថៃជាប្រទេសដែលគោរពច្បាប់។
លោកបន្តថា៖ «មន្ត្រីដែលមានឋានន្តរស័ក្ត ហើយទៅធ្វើអំពើមិនសាកសម ឬទង្វើខុសច្បាប់នៅប្រទេសគេដូច្នេះ វាធ្វើឱ្យប៉ះពាល់សម្រាប់មុខមាត់រាជរដ្ឋាភិបាលយើងផងដែរ ហើយជាពិសេសខ្មាស់ពលរដ្ឋគេផង អីចឹងចំណុចនេះហើយដែលយើងឃើញថា មកទល់ពេលនេះ វាអត់មានការអន្តរាគមន៍ណាមួយពីរាជរដ្ឋាភិបាល ឬអាជ្ញាធរកម្ពុជា ពីព្រោះយ៉ាងហោចណាស់ ទុកឱ្យគេអនុវត្តត្រឹមត្រូវតាមផ្លូវច្បាប់តាមនីតិវិធីរបស់គេដែរ»។
លោកបន្ថែមថា៖ «ទោះបីជាមន្ត្រីយោធា ឬក៏មន្ត្រីផ្សេងៗនៅតាមព្រំដែន ត្រូវអនុវត្តច្បាប់ជាគំរូ កុំឱ្យយកគំរូតាមមន្ត្រីទាំងអស់នេះ ហើយត្រូវអនុវត្តច្បាប់ឱ្យបានតឹងរឹង ដើម្បីរក្សាមុខមាត់និងកិត្តិយសរបស់ប្រទេសយើង»៕
