លោកនាយករដ្ឋមន្ត្រី ហ៊ុន សែន បានលើកឡើងថា ទិវាបុណ្យឯករាជ្យជាតិ ៩វិច្ឆិកា បានរំលឹកឱ្យឃើញពីព្រះរាជបេសកកម្មរបស់ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ដើម្បីជាតិមាតុភូមិ និងប្រជារាស្ត្រខ្មែរ។
លោកនាយករដ្ឋមន្ត្រី ហ៊ុន សែន បានសរសេរលើទំព័រហ្វេសប៊ុកនៅថ្ងៃទី ៩ ខែវិច្ឆិកា ឆ្នាំ២០២២នេះ ដែលជាខួបអនុស្សាវរីយ៍លើកទី៦៩ នៃទិវាបុណ្យឯករាជ្យជាតិ ៩ វិច្ឆិកា ១៩៥៣ – ៩ វិច្ឆិកា ២០២២ ដែលកម្ពុជាទទួលបានឯករាជ្យ ពីអាណានិគមនិយមបារាំង ស្របជាមួយនឹងខួប ៦៩ឆ្នាំ នៃការបង្កើតកងយោធពលខេមរភូមិន្ទ។
លោកបានលើកឡើងថា៖ «ទិវាបុណ្យឯករាជ្យជាតិ ៩វិច្ឆិកា បានរំលឹកឱ្យឃើញពីព្រះរាជបេសកកកម្ម ដើម្បីជាតិមាតុភូមិ និងប្រជារាស្ត្រខ្មែរ របស់ព្រះករុណា ព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូ ក្នុងក្របខណ្ឌនៃព្រះរាជបូជនីយកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា»។
នៅថ្ងៃនេះដែរ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក៏បានយាងចូលរួមព្រះរាជពិធីប្រទានភ្លើងជ័យ ដើម្បីអបអរសាទរទិវាបុណ្យឯករាជ្យជាតិខួបលើកទី៦៩ នៅវិមានឯករាជ្យផងដែរ។
ចំណែក ប្រធានគណបក្សសង្គ្រោះជាតិដែលត្រូវបានតុលាការរំលាយ លោក កឹម សុខា កាលពីថ្ងៃម្សិលមិញ បានយកទិវាបុណ្យឯករាជ្យជាតិនេះ ផ្ញើសារទៅភាគីពាក់ព័ន្ធថា ដើម្បីឱ្យមានឯករាជ្យជាតិពិត ពលរដ្ឋខ្មែរត្រូវគោរពសិទ្ធិគ្នា មិនបង្កឱ្យការឈឺចាប់ និងមិនយកខ្មែរណាម្នាក់ជាសត្រូវឡើយ។
មួយឆ្នាំមុនការយាងចូលទិវង្គត ពោលគឺនៅថ្ងៃទី៣១ ខែតុលា ឆ្នាំ២០១១ ក្នុងឱកាសនៃព្រះរាជពិធីបុណ្យចម្រើនព្រះជន្មព្រះអង្គយាងចូល៩០ព្រះវស្សា ព្រះករុណា ព្រះបាទសម្តេចព្រះនរោត្តម សីហនុ បានមានព្រះរាជបណ្តាំផ្ញើជនរួមជាតិទាំងអស់ ជាពិសេសអ្នកនយោបាយខ្មែរ ឱ្យនាំគ្នារួបរួមសាមគ្គី និងឯកភាពគ្នាកាន់តែរឹងមាំ។
ព្រះរាជបន្ទូលជាង២០នាទី កាលនោះ ព្រះអង្គបញ្ជាក់ថា កម្ពុជាមិនចង់ធ្វើជាមហាអំណាចទេ តែចង់ឱ្យពិភពលោកទទួលស្គាល់ថា ប្រជាជាតិកម្ពុជារួបរួមសាមគ្គីគ្នា ដែលជាកម្លាំងរ៉ឹងមាំរបស់កម្ពុជា។
ព្រះអង្គមានព្រះរាជបន្ទូលថា៖ «យើងសប្បាយណាស់ដែលជាលើកទី១ហើយ យើងបានរួបរួមគ្នាជាធ្លុងមួយ ដែលនរណាក៏បំបែកបំបាក់មិនបានដែរ ធ្វើឱ្យទន់ខ្សោយទៅវិញមិនបានដែរ។ យើងច្បាស់ចេះតែខ្លាំងទៅៗ នូវវិស័យអ្វីក៏ដោយ ក៏យើងចេះតែខ្លាំងទៅហើយ»៕
