សមាជិកខ្មែរថាវរៈម្នាក់ទៀត ដែលធ្វើយុទ្ធនាការទាមទារឱ្យដោះលែងកញ្ញា សេង ធារី និងអ្នកទោសមនសិការផ្សេងទៀត ត្រូវបានបញ្ជូនទៅមន្ទីរពេទ្យ បន្ទាប់ពីបានបង្អត់អាហារអស់រយៈពេល ៦ថ្ងៃ។
កញ្ញា ឈឿន ដារ៉ាវី ប្រាប់វីអូឌីនៅថ្ងៃសៅរ៍នេះថា សមាជិកខ្មែរថាវរៈ លោក ស្វាយ សំណាង បានឈឺនិងបញ្ជូនទៅកាន់មន្ទីរពេទ្យភ្លាមៗនៅថ្ងៃទី១២ខែវិច្ឆិកានេះ ក្រោយលោកបានចូលរួមធ្វើយុទ្ធនាការ បង្អត់អាហាររយៈពេល ៦ថ្ងៃ ខណៈកញ្ញា ឆែម ស្រីគា បានធូរស្រាលវិញ។
កញ្ញាបញ្ជាក់ថា គិតត្រឹមថ្ងៃសៅរ៍ ដែលជាថ្ងៃទី៦នៃយុទ្ធនាការបង្អត់អាហារនេះ មានសមាជិកខ្មែរថាវរៈ ២នាក់ ដែលបានបញ្ជូនទៅមន្ទីរពេទ្យ ហើយចំណែក ៣នាក់ទៀត ក្នុងនោះ មានកញ្ញា លោក ហ៊ុន វណ្ណៈ និងកញ្ញា សុគន្ធ តុលា បាននាំគ្នាបន្តធ្វើយុទ្ធនាការបង្អត់អាហារ ដោយបោះតង់សម្រាកនៅទីលានប្រជាធិបតេយ្យដដែល។
កញ្ញាបន្តថា៖«ម្នាក់ៗហេវហត់គ្រប់គ្នា ថាមពលគឺអស់ពីខ្លួនហើយ ទោះបីប្រឹងផឹកទឹកដោះគោយ៉ាងម៉េច។ ហេតុនឹងហើយដែលធ្វើឱ្យយើង កាន់តែព្រួយបារម្ភកញ្ញា សេង ធារី ដែលនៅក្នុងពន្ធនាគារ ការអត់អាហារគាត់ នឹងអាចប៉ះពាល់សុវត្ថិភាពគាត់ ដែលឬអត់ ព្រោះដំណឹងយើងអត់អាចជឿជាក់បានទេ ព្រោះមានជនខិលខូចនឹង បង្ហាញរូបភាពមួយថា គាត់មិនបានអត់បាយទេ។ យើងទាំងអស់គ្នាមិនជឿជាក់ទេ ព្រោះមនុស្សល្អជា យើងដឹងថា និយាយម៉ាត់ណា គឺម៉ាត់ហ្នឹង ដោយមិនបត់បែនទេ»។
កញ្ញា ឈឿន ដារ៉ាវី បន្តថា ទោះបីជាពួកគេធ្វើយុទ្ធនាការបង្អត់ដោយសន្តិវិធីនៅទីលានប្រជាធិបតេយ្យក្ដី ប៉ុន្តែអាជ្ញាធរខណ្ឌឫស្សីកែវបានធ្វើទុក្ខបុកម្នេញពួកគេ ដោយបិទទឹកមិនឱ្យប្រើប្រាស់ រំខានពេលសម្រាកនាពេលយប់ រារាំងមិនឱ្យប្រជាពលរដ្ឋ និងអ្នកស្គាល់ចូលទៅជួបសួរសុខទុក្ខឡើយ។
កញ្ញាបង្ហាញការសោកស្ដាយ ដោយចាត់ទុកការធ្វើទុក្ខបុកម្នេញរបស់អាជ្ញាធរដែលគ្រាន់តែនាំគ្នាសម្ដែងមតិអហិង្សា ទាមទារយុត្តិធម៌សង្គម និងដោះលែងកញ្ញា សេង ធារី ព្រមទាំងអ្នកទោសមនសិការផ្សេងៗទៀត ថាជាការរឹតត្បិតសិទ្ធិសេរីភាពមូលដ្ឋានរបស់ប្រជាពលរដ្ឋ។
អភិបាលខណ្ឌឫស្សីកែវ លោក ឯក ឃុនដឿន បានប្រាប់វីអូឌីកាលពីថ្ងៃទី១០ ខែវិច្ឆិកា ឆ្នាំ២០២២ ថា បើយុវជនខ្មែរថាវរៈ ចង់ធ្វើសមាធិ គួររកកន្លែងសមរម្យ ដោយមិនគួរធ្វើនៅទីលានប្រជាធិបតេយ្យ ដែលបង្កផលប៉ះពាល់សណ្ដាប់ធ្នាប់ និងរបៀបរៀបរយសង្គម។ លោកចាត់ទុកការតស៊ូមតិរបស់យុវជនខ្មែរថាវរៈ ដែលទាមទាររកយុត្តិធម៌ដល់អ្នកទោសមនសិការនោះថា ជាការបំផ្លាញកិត្តិយសប្រទេសជាតិ។
កាលពីថ្ងៃទី៧ ខែវិច្ឆិកានេះ ក្រុមយុវជនខ្មែរថាវរៈចំនួន៥នាក់ បានចាប់ផ្តើមធ្វើយុទ្ធនាការមិនបរិភោគអាហារ នៅខេត្តព្រះវិហារ ជាទីដែលឃុំខ្លួនកញ្ញា សេង ធារី មេធាវីអន្តរជាតិដែលមានសញ្ជាតិខ្មែរ-អាមេរិក។ បន្ទាប់ពីធ្វើយុទ្ធនាការបង្អត់អាហារបាន២ថ្ងៃ ពួកគេក៏បាននាំគ្នាធ្វើដំណើរមកកាន់រាជធានីភ្នំពេញ ដោយបន្តយុទ្ធនាការបង្អត់អាហារ និងបោះតង់សម្រាកនៅទីលានប្រជាធិបតេយ្យ ក្នុងខណ្ឌឫស្សីកែវ ដើម្បីសម្ដែងមតិទាមទារឱ្យដោះលែងកញ្ញា សេង ធារី និងអ្នកទោសមនសិការផ្សេងទៀត។
ពាក់ព័ន្ធនឹងរឿងកញ្ញា សេង ធារី នេះដែរ ក្រសួងការបរទេសអាមេរិកស្នើឱ្យកម្ពុជាដោះលែងមេធាវីខ្មែរអាមេរិកាំងកញ្ញា សេង ធារី វិញ ដោយចាត់ទុកការឃុំខ្លួនកញ្ញា សេង ធារី និងអ្នកផ្សេងទៀត ថាជារឿងនយោបាយ។
ការស្នើក្រសួងការបរទេសសហរដ្ឋអាមេរិកជាថ្មីទៀត ធ្វើឡើងស្របពេលដែលប្រធានាធិបតីសហរដ្ឋអាមេរិក លោក Joe Biden មកចូលរួមកិច្ចប្រជុំកំពូលអាមេរិក-អាស៊ាន និងកិច្ចប្រជុំកំពូលពាក់ព័ន្ធនៅកម្ពុជា។
ប្រធានសមាគមការពារសិទ្ធិមនុស្សអាដហុក លោក នី សុខា ចាត់ទុកការធ្វើទុក្ខបុកម្នេញលើយុវជនដែលតស៊ូមតិដោយសន្តិវិធីរបស់អាជ្ញាធរថា ជារំលោភគោលការណ៍ច្បាប់ និងសិទ្ធិប្រជាពលរដ្ឋ ដែលមានចែងនៅក្នុងច្បាប់ជាតិ និងអន្តរជាតិ។
លោកបន្តថា៖«ការធ្វើបាតុកម្ម និងកូដកម្ម ឬការទាមទារ ទាំងឡាយណាដែលធ្វើឡើងដោយអហិង្សាគឺជាសកម្មភាពស្របទៅតាមគោលការណ៍ច្បាប់ មិនមែនជាសកម្មភាពខុសច្បាប់ទេ។ គ្រប់សកម្មភាពរបស់អាជ្ញាធរ ឬជនណាក៏ដោយដែលបានទៅយាយី រំខាន រារាំង ឬបង្ក្រាបដោហិង្សាមិនប្រើហិង្សាក្ដី វាសុទ្ធតែជាអំពើមួយដែលរំលោភទៅគោលការណ៍ច្បាប់ ដែលវាមានជាធរមាននៅក្នុងប្រទេសកម្ពុជាយើង ជាពិសេសរំលោភគោលការណ៍លទ្ធិប្រជាធិបតេយ្យ ហើយនឹងរដ្ឋធម្មនុញ្ញដែលជាច្បាប់កំពូលរបស់កម្ពុជា»។
ក្នុងសន្និសីទសារព័ត៌មាន នៅថ្ងៃទីនេះ អគ្គលេខាធិការអង្គការសហប្រជាជាតិលោក Antonio Guterres បានស្នើឱ្យកម្ពុជាបើកលំហសង្គមស៊ីវិល ពលរដ្ឋ អ្នកការពារសិទ្ធិមនុស្ស និងសកម្មជនបរិស្ថាន។ លោកបញ្ជាក់ថា សង្គមស៊ីវិល ពលរដ្ឋ អ្នកការពារសិទ្ធិមនុស្ស និងសកម្មជនបរិស្ថាន ត្រូវតែបើកចំហ និងទទួលបានការការពារ។
ការស្នើរបស់អគ្គលេខាធិការអង្គការសហប្រជាជាតិលោក Antonio Guterres ធ្វើឡើងអំឡុងពេលដែលលោកកំពុងមានវត្តមាននៅរាជធានីភ្នំពេញ ដើម្បីចូលរួមកិច្ចប្រជុំកំពូលអាស៊ាន។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយរូបផងនោះ ត្រូវបានលោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ ផ្ដន្ទាទោសដាក់ពន្ធនាគាររយៈពេល៦ឆ្នាំ ពីបទ «ញុះញង់ និងរួមគំនិតក្បត់»។
មាត្រា៣៥ នៃរដ្ឋធម្មនុញ្ញព្រះរាជាណាចក្រកម្ពុជា ចែងថា ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕