សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានឱ្យដឹងថា កូដករជាស្ត្រីចំនួន២រូប នឹងចូលទៅបំភ្លឺតាមការកោះហៅជាលើកទី២របស់តុលាការ នៅថ្ងៃទី១៤ ខែវិច្ឆិកា ពាក់ព័ន្ធនឹងបទចោទប្រកាន់ចំនួន៣ ដែលក្រុមហ៊ុនល្បែងមួយនេះបានប្តឹងពួកគេ។
ក្នុងសេចក្តីជូនដំណឹងស្តីពីការចូលខ្លួនទៅឆ្លើយបំភ្លឺតាមដីកាកោះហៅលើកទី២ របស់ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះថ្ងៃទី១៣ ខែវិច្ឆិកានេះ បានឱ្យដឹងថា កូដករណាហ្គាវើលដ៍ជាស្ត្រីចំនួន២នាក់ រួមមាន កញ្ញា សុខ ថាវុធ និងអ្នកស្រី នេត ចរិយ៉ា ដែលត្រូវបានកោះហៅឱ្យចូលខ្លួនលើកទី២ ទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី១៤ ខែវិច្ឆិកា ឆ្នាំ២០២២ ដើម្បីចូលបំភ្លឺនៅម៉ោង៩កន្លះព្រឹក និងម៉ោ២កន្លះរសៀល អំពីបទចោទចំនួន៣ រួមមាន រំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ ដែលក្រុមហ៊ុនបានប្តឹងពួកគេ។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ អ្នកនាង ណុប ទិត្យបូរ៉ាវី មានប្រសាសន៍បន្ថែមថា ស្ត្រី២នាក់ ដែលជាកូដករណាហ្គាវើលដ៍នឹងចូលបំភ្លឺតាមដីកាកោះហៅរបស់តុលាការនាព្រឹកថ្ងៃទី១៤ ខែវិច្ឆិកា។ អ្នកនាងបន្តថា ដើមចមដែលស្ត្រីទាំងពីរចូលបំភ្លឺនៅតុលាការ ដោយសារពួកគេមិនបានធ្វើខុសដូចការចោទប្រកាន់នោះទេ។
អ្នកនាង ណុប ទិត្យបូរ៉ាវី ចាត់ទុកដីកាកោះហៅរបស់តុលាការជាលើកទី២នេះថា ជាសារគំរាមកំហែងដល់កម្មករ មិនឱ្យពួកគេធ្វើកូដកម្មទាមទារលក្ខខណ្ឌការងារស្របតាមច្បាប់ ។ ប៉ុន្តែគាត់ថា ទោះជាមានការកោះហៅ ឬចោទប្រកាន់ក្រុមកូដករយ៉ាងណា ក៏ពួកគេនៅតែបន្តធ្វើកូដកម្មទាមទារលក្ខខណ្ឌការងាររហូតមានដំណោះស្រាយ។
អ្នកនាងបញ្ជាក់ថា៖ «ក្រុមហ៊ុនប្រើប្រព័ន្ធតុលាការ ដើម្បីដាក់សម្ពាធមកលើក្រុមកូដករ ក្រុមគ្រួសារ ឱ្យគាត់ផ្អាកធ្វើកូដកម្ម។ អ៊ីចឹងជាអំពើមួយដែលធ្វើឱ្យប្រទេសកម្ពុជាយើងអាម៉ាស់មុខបំផុត។ អ៊ីចឹង ទោះបីជាមានដីកាកោះហៅជាបន្តបន្ទាប់ក៏ពួកខ្ញុំបន្តធ្វើកូដកម្មរហូតមានដំណោះស្រាយ ព្រោះយើងប្រើប្រាស់សិទ្ធិរបស់យើងធ្វើកូដកម្ម ហើយយើងប្រើប្រាស់អស់នីតិវិធច្បាប់ ហើយពួកយើងអត់មានធ្វើអ្វីខុសផង»។
ក្រោយពីការធ្វើកូដកម្មជាង១០ខែមកនេះ កូដករណាហ្គាវើលដ៍ជិត ១០រូបហើយ ត្រូវបានសាលាដំបូងរាជធានីភ្នំពេញ កោះហៅឱ្យចូលបំភ្លឺ ក្រោមបណ្តឹងរបស់ក្រុមហ៊ុន។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុនល្បែងស៊ីសងនិងកាស៊ីណូមួយនេះបានបញ្ឈប់បុគ្គលិកចំនួន ១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។
យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕
