ក្រុមកូដករណាហ្គាវើលដ៍ប្រមាណ ១០០នាក់ បន្តចេញធ្វើកូដកម្មនៅខាងមុខក្រុមហ៊ុន និងបាននាំគ្នាចែកប៉ោងប៉ោងទៅកាន់សាធារណជន ដោយភ្ជាប់សារទាមទារដោះលែងប្រធានសហជីពប្រចាំក្រុមហ៊ុនល្បែងមួយនេះ គឺ កញ្ញា ឈឹម ស៊ីថរ និងទាមទារឱ្យដោះស្រាយវិវាទការងាររបស់ពួកគាត់ដែលបានអូសបន្លាយជាង១ឆ្នាំមកហើយ។
កូដករណាហ្គាវើលដ៍មួយរូប អ្នកនាង សុខ រតនា ប្រាប់វីអូឌីនៅថ្ងៃសៅរ៍ ទី៧ ខែមករា ថា ការចែកប៉ោងប៉ោងនាថ្ងៃនេះ ដើម្បីឱ្យសាធារណជនបានដឹងពីរឿងរ៉ាវនៃវិវាទការងាររបស់ពួកគាត់ ដែលបានកើតឡើងជាង ១ ឆ្នាំមកនេះ ដោយមិនទាន់ត្រូវបានដោះស្រាយនៅឡើយ ខណៈកញ្ញា ឈឹម ស៊ីថរ ប្រធានសហជីពក៏ត្រូវបានចាប់ខ្លួនជាថ្មីទាំងអយុត្តិធម៌ផងដែរ។
អ្នកនាងថា៖«យើងចង់ឱ្យសាធារណជនបានដឹងរឿងយើង កាន់តែទូលំទូលាយ ហើយមួយទៀត[ឱ្យសាធារណជន]ដឹងថា កញ្ញា ឈឹម ស៊ីថរ នៅជាប់ឃុំនៅឡើយទេ មិនទាន់មានការដោះលែងនៅឡើយទេ ។ មួយទៀតចង់ឱ្យពួកគាត់យល់ពីយើង គឺថា យើងធ្វើនេះ ដើម្បីទាមទារអី? យើងចង់បានអី? ហើយឱ្យគាត់ឈឺឆ្អាលរឿងយើង ហើយចង់ឱ្យឆាប់មានដំណោះស្រាយអីជាដើម»។
អ្នកនាងបន្តថា ពួកគាត់នឹងមិនបោះបង់ចោលការធ្វើកូដកម្មឡើយ បើមិនមានដំណោះស្រាយ ទោះបីជាពួកគាត់ត្រូវជួបបញ្ហាប្រឈមជាច្រើនបន្តទៀតក្ដី។
អ្នកនាងបញ្ជាក់ថា ការមិនបោះបង់នេះ ដោយពួកគាត់ជឿជាក់ថា យុត្តិធម៌ ព្រមទាំងដំណោះស្រាយនឹងមានសម្រាប់កម្មករខ្មែរ និងប្រធានសហជីព កញ្ញា ឈឹម ស៊ីថរ ខណៈការចាប់ខ្លួនជាថ្មីកាលពីចុងឆ្នាំមុននោះ តុលាការក៏បានទទួលស្គាល់ថា មិនបានជូនដំណឹង ប៉ុន្តែតុលាការនៅតែមិនព្រមដោះលែងប្រធានសហជីពរបស់ពួកគាត់ទៀត។
អ្នកនាងបន្ថែមថា៖«គាត់[កញ្ញា ឈឹម ស៊ីថរ]ជាប់ឃុំនេះ គឺជាប់ទាំងអយុត្តិធម៌ សូម្បីតុលាការទទួលស្គាល់ហើយថា តុលាការមិនបានផ្ដល់ដំណឹងឱ្យ ប៉ុន្តែនៅតែមិនព្រមដោះលែងកញ្ញា ស៊ីថរ ឱ្យមានសេរីភាពឡើងវិញអ៊ីចឹង។ ទោះបីដោះលែងហើយ អត់ដោះស្រាយ អត់ផ្ដល់ដំណោះស្រាយត្រឹមត្រូវដល់បុគ្គលិក ឱ្យកម្មករក៏ពួកខ្ញុំអត់ព្រម បញ្ឈប់ដែរគឺពួកខ្ញុំនៅទាមទារ ព្រោះយើងអត់ទាន់ទទួលបានយុត្តិធម៌ទេ។ យើងធ្វើរាល់ថ្ងៃអត់មានចង់ចាញ់ឈ្នះថៅកែទេ។ យើងអត់ត្រូវការលុយមកទិញសិទ្ធិការងាររបស់យើង ប៉ុន្តែយើងសុំតែភាពយុត្តិធម៌សម្រាប់បុគ្គលិកកម្មករ»។
អ្នកនាង សុខ រតនា ស្នើទៅលោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ ដោយថា វិវាទការងារនេះ មានតែលោកនាយករដ្ឋមន្ត្រីទេ ដែលអាចដោះស្រាយបាន ខណៈថៅកែក្រុមហ៊ុនវិញ អ្នកនាងថា គ្មានឆន្ទៈក្នុងការដោះស្រាយទេ ទោះបីជាអ្វីដែលពួកគាត់ទាមទារនោះ ស្របតាមច្បាប់ស្ដីពីការងារកម្ពុជាក្ដី។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន ១ ៣២៩នាក់ ក្នុងចំណោមបុគ្គលិកសរុបជាង ៨ ០០០នាក់ ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ យ៉ាងណា បុគ្គលិកដែលចេញធ្វើកូដកម្មជាង១២ខែមកនេះ អះអាងថា ការបញ្ឈប់នោះ ដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ។
ក្រៅពីនោះ កូដករណាហ្គាវើលដ៍ប្រមាណ១០រូបក៏ត្រូវបានសាលាដំបូងរាជធានីភ្នំពេញកោះហៅឱ្យចូលបំភ្លឺជាបន្តបន្ទាប់នាពេលថ្មីៗនេះ ក្រោមបណ្តឹងរបស់ក្រុមហ៊ុន ដោយចោទប្រកាន់រួមមាន បទរំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារព្រៃស រាជធានីភ្នំពេញ ជាលើកទី២ កាលពីថ្ងៃទី២៦ ខែវិច្ឆិកា ឆ្នាំ២០២២ ពេលត្រលប់មកពីកិច្ចប្រជុំអន្តរជាតិនៅប្រទេសអូស្រ្តាលីវិញ។ ការចាប់ និងឃុំខ្លួនប្រធានសហជីពរូបនេះ ដោយតុលាការចោទប្រកាន់ថា កញ្ញាបានល្មើសបម្រាម ឬគេចវេះពីការត្រួតពិនិត្យរបស់តុលាការ។
កាលពីថ្ងៃទី២៨ ខែធ្នូ ឆ្នាំ២០២២ សាលាឧទ្ធរណ៍រាជធានីភ្នំពេញបានទាត់ចោលបណ្តឹងសុំនៅក្រៅឃុំរបស់កញ្ញា ស៊ីថរ ដោយតុលាការបន្តឃុំខ្លួនប្រធានសហជីពរូបនេះ ក្រោមហេតុផលថា សំណុំរឿងរបស់កញ្ញាត្រូវបានបញ្ជូនទៅជំនុំជម្រះ។
ការសម្រេចនេះ សង្គមស៊ីវិលបានចាត់ទុកថា ជារឿងមិនត្រឹមត្រូវ ដោយថាបទល្មើសបម្រាមតុលាការនោះ ពុំមែនជាកំហុសរបស់កញ្ញា ឈឹម ស៊ីថរ ទេ តែជាកំហុសនីតិវិធីរបស់តុលាការ ដែលមិនបានផ្តល់ដំណឹងពាក់ព័ន្ធដីកាដាក់ក្រោមការត្រួតពិនិត្យរបស់តុលាការទៅកញ្ញា និងមេធាវីឱ្យបានដឹងជាមុន៕
