លោកនាយករដ្ឋមន្រ្តី ហ៊ុន សែន ថ្លែងថា ច្បាប់ស្ដីពីសិទ្ធិទទួលបានព័ត៌មានអាចនឹងអនុម័តនៅក្រោយការបោះឆ្នោតជាតិរួច ពោលគឺអាចនឹងអនុម័តក្នុងឆ្នាំ២០២៤ ឬ២០២៥ ខណៈសេចក្ដីព្រាងច្បាប់នេះ បានតាក់តែងឡើងរយៈពេលជិត ១០ឆ្នាំមកហើយនោះ។
ក្នុងពិធីជួបជុំសំណេះសំណាល និងពិសារអាហារសាមគ្គីជាមួយអ្នកសារព័ត៌មានលើកទី៥ នៅថ្ងៃទី១៤ ខែមករា ដោយមានអ្នកសារព័ត៌មានចូលរួមប្រមាណ ៥ពាន់នាក់ លោក ហ៊ុន សែន ថ្លែងថា ច្បាប់ស្ដីពីសិទ្ធិទទួលព័ត៌មាននឹងអនុម័តនៅអាណត្តិទី៧ ក្រោយពីកម្ពុជាបោះឆ្នោតជ្រើសតាំងតំណាងរាស្ត្រ ពោលគឺនៅចន្លោះឆ្នាំ២០២៤ -២០២៥ ខាងមុនេះ។ លោកបញ្ជាក់ថា បច្ចុប្បន្នច្បាប់នេះ កំពុងស្ថិតក្នុងដំណាក់កាលពិភាក្សាទាក់ទងនឹងបទល្មើសនៅក្រសួងយុត្តិធម៌នៅឡើយ។
លោកមានប្រសាសន៍ថា៖«ការយឺតយ៉ាវនេះ វាមិនមែនជារឿងដាច់ដោយឡែក បើយើងគ្រាន់តែប្រើសិទ្ធិរបស់រដ្ឋសម្រាប់ការសម្រេច វាជាការងាយទេ វាអត់មានអីលំបាកទេ។ រដ្ឋមន្ត្រីធ្វើរួចហើយ បញ្ជូនមកគណៈរដ្ឋមន្ត្រី អនុម័តបញ្ជូនទៅសភាអនុម័ត ក៏ប៉ុន្តែយើងចង់ប្រមូលផ្ដុំនៅមតិយោបល់ទាំងឡាយ ដើម្បីច្បាប់មួយនេះចេញទៅទទួលបានផលប្រយោជន៍ទាំងអស់គ្នា។ អង្គការក្រៅរដ្ឋាភិបាលខ្លះទាមទារហួសហេតុ ទាមទារជ្រុល។ ការទាមទារជ្រុល និងហួសហេតុនឹងហើយ ដែលទាមទារឱ្យរដ្ឋមន្ត្រីធ្វើការសម្របសម្រួល»។
មុនជំនួបជាមួយអ្នកសារព័ត៌មានពីរថ្ងៃក្រុមអង្គការសង្គមស៊ីវិលចំនួន២៤ស្ថាប័ន កាលពីថ្ងៃទី១២ ខែមករា ឆ្នាំ២០២៣ បានចេញសេចក្ដីថ្លែងការណ៍មួយដោយស្នើរដ្ឋាភិបាលពន្លឿនការអនុម័ត «សេចក្ដីព្រាងច្បាប់ស្ដីពីសិទ្ធិទទួលព័ត៌មាន» នាជំនួបជាមួយអ្នកសារព័ត៌មាន ដើម្បីលើកកម្ពស់សេវាសាធារណៈ និងការអភិវឌ្ឍដោយចីរភាព។
សេចក្តីព្រាងច្បាប់ស្តីពីសិទ្ធិទទួលបានព័ត៌មាន មាន ៩ជំពូក និង៣៧មាត្រា ត្រូវបានផ្តួចផ្តើមឱ្យមានកិច្ចពិភាក្សា និងពង្រាងជាច្រើនឆ្នាំមកហើយ ដោយមានការចូលរួមផ្តល់យោបល់ពីអង្គការយូណេស្កូ (UNESCO) វិទ្យាស្ថានតស៊ូមតិនិងគោលនយោបាយ (API) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងអង្គការតម្លាភាពកម្ពុជា (TI) ជាដើម។
សេចក្តីព្រាងច្បាប់ស្តីពី «សិទ្ធិទទួលព័ត៌មាន» ត្រូវបានអនុញ្ញាតឱ្យតាក់តែងនៅឆ្នាំ២០១៣ ដោយមានក្រសួងព័ត៌មានជាអ្នកទទួលបន្ទុក។ ច្បាប់នេះមានគោលបំណងធានាឱ្យសាធារណជនគ្រប់រូបនូវសិទ្ធិសេរីភាពក្នុងការទទួលព័ត៌មានពីស្ថាប័នសាធារណៈដោយស្របទៅតាមរដ្ឋធម្មនុញ្ញកម្ពុជា។
សេចក្តីព្រាងច្បាប់ស្តីពី សិទ្ធិទទួលបានព័ត៌មាននេះ នៅតែត្រូវបានសង្គមស៊ីវិលដែលធ្វើការងារលើវិស័យនេះមើលឃើញថា មានភាពយឺតយ៉ាវបើប្រៀបធៀបទៅនឹងច្បាប់ផ្សេងទៀត ដែលប្រមុខរដ្ឋាភិបាលចង់បាន។
ជាក់ស្តែង ច្បាប់ស្តីពីការគ្រប់គ្រងប្រទេសគ្រាអាសន្ន ដែលត្រូវបានព្រះមហាក្សត្រឡាយព្រះហស្ថលេខាប្រកាសឱ្យប្រើកាលពីខែមេសា ឆ្នាំ២០២០។ ច្បាប់ស្តីពីការធ្វើវិសោធនកម្មរដ្ឋធម្មនុញ្ញ «កំណត់សញ្ជាតិខ្មែរតែមួយ» សម្រាប់មេដឹកនាំកំពូលរបស់ជាតិ រួមមាន ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ដែលត្រូវបានព្រះមហាក្សត្រឡាយព្រះហស្ថលេខាប្រកាសឱ្យប្រើកាលពីខែវិច្ឆិកា ឆ្នាំ២០២១។ ច្បាប់ធម្មនុញ្ញស្តីពីវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម ដែលត្រូវបានព្រះមហាក្សត្របានឡាយព្រះហស្ថលេខាប្រកាសឱ្យប្រើកាលពីខែសីហា ឆ្នាំ២០២២ ជាដើម។
ច្បាប់ដែលស្នើឡើងដោយប្រមុខរដ្ឋាភិបាលទាំងនេះ ត្រូវបានគេមើលឃើញថា ប្រព្រឹត្តទៅដោយរលូន ហើយអនុម័តដោយស្ថាប័នកំពូលៗរបស់ជាតិយ៉ាងរហ័ស រួមមានរដ្ឋសភា ព្រឹទ្ធសភា ក្រុមប្រឹក្សាធម្មនុញ្ញ ព្រមទាំងត្រូវបានព្រះមហាក្សត្រប្រកាសឱ្យប្រើជាផ្លូវ ដោយដំណើរការក្នុងរយៈពេលខ្លីប៉ុណ្ណោះ៕