អាជ្ញាធរបាននិយាយថា ខ្មាន់កាំភ្លើងម្នាក់បានបាញ់សម្លាប់មនុស្ស ១០នាក់ នៅក្នុងក្លឹបមួយកន្លែង ក្នុងអំឡុងពេលប្រារព្ធពិធីបុណ្យចូលឆ្នាំចិន កាលពីល្ងាចថ្ងៃសៅរ៍ នៅជិតទីក្រុង Los Angeles មុនពេលរត់គេចខ្លួនពីកន្លែងកើតហេតុ ហើយក្រោយមកបានបាញ់សម្លាប់ខ្លួនឯងនៅពេលនគរបាលចូលទៅជិតកាលពីថ្ងៃអាទិត្យ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៣ ខែមករា ឆ្នាំ២០២៣ នេះ។
លោក រ៉ូប៊ឺត លូណា (Robert Luna) នាយតម្រួតប្រចាំនៅទីក្រុង Los Angeles បាននិយាយក្នុងសន្និសីទសារព័ត៌មាននៅរសៀលថ្ងៃអាទិត្យថា មូលហេតុនៃការការបាញ់ប្រហារនេះនៅមិនទាន់ដឹងនៅឡើយ។ លោកបានកំណត់អត្តសញ្ញាណជនសង្ស័យថាមានឈ្មោះ ហ៊ូ ចាន់ត្រាន់ (Huu Can Tran) អាយុ ៧២ ឆ្នាំ។
លោក Luna បានប្រាប់អ្នករាយការណ៍ព័ត៌មានថា៖ «យើងចង់ដឹងថាតើរឿងដ៏អាក្រក់នេះ អាចកើតឡើងបានដោយរបៀបណា»។
លោក Luna បាននិយាយថា ខ្មាន់កាំភ្លើងបានបាញ់សម្លាប់ខ្លួនឯងកាលពីព្រឹកថ្ងៃអាទិត្យ នៅពេលដែលនគរបាលបានចូលទៅជិតឡានពណ៌សមួយគ្រឿង ដែលបើកបរដោយខ្មាន់កាំភ្លើងក្នុងទីក្រុងតូរ៉ែនស៍ (Torrance) ចម្ងាយប្រហែល ៣៤គីឡូម៉ែត្រ ពីកន្លែងនៃការបាញ់ប្រហារនៅក្លឹបមួយឈ្មោះថា Star Ballroom Dance Studio ក្នុងទីក្រុងម៉ុនតេរី ផាក (Monterey Park)។
លោក Luna បានបន្តថា ក្នុងចំណោមជនរងគ្រោះជនរងគ្រោះទាំង១០នាក់ ដែលបានស្លាប់ គឺមាន ៥នាក់ជាស្ត្រី។ អត្តសញ្ញាណរបស់ជនរងគ្រោះ មិនត្រូវបានបង្ហាញជាសាធារណៈទេ។
អាជ្ញាធរបាននិយាយថា មនុស្ស១០នាក់ផ្សេងទៀតរងរបួស ហើយ៧នាក់ក្នុងចំណោមពួកគេកំពុងសម្រាកព្យាបាលនៅមន្ទីរពេទ្យ ដោយយ៉ាងហោចណាស់មនុស្សម្នាក់ស្ថិតក្នុងស្ថានភាពធ្ងន់ធ្ងរ។
លោក Luna បានបញ្ជាក់ថា ខ្មាន់កាំភ្លើងដដែលនេះ ជាប់ពាក់ព័ន្ធក្នុងឧប្បត្តិហេតុមួយផ្សេងទៀតនៅក្លឹបមួយកន្លែងទៀតក្នុងទីក្រុងអាល់ហែមប្រា (Alhambra) ដែលមានចម្ងាយធ្វើដំណើរប្រហែល ២០នាទី បន្ទាប់ពីការបាញ់ប្រហារកាលពីយប់ថ្ងៃសៅរ៍នៅ Monterey Park ។ នៅទីនោះ [កន្លែងទី២] សាក្សីបាននិយាយថា ខ្មាន់កាំភ្លើងបានដើរកាន់កាំភ្លើងដែលក្រោយមកត្រូវបានគេឆក់យកកាំភ្លើងបាន។ លោក Luna បាននិយាយថា គ្មាននរណាម្នាក់ត្រូវបានបាញ់ប្រហារឡើយ ហើយខ្មាន់កាំភ្លើងបានរត់គេចខ្លួន។ គួរបញ្ជាក់ថា ការបាញ់ប្រហារនៅទីក្រុងម៉ុនតេរី ផាក (Monterey Park) នេះគឺជាការបាញ់ប្រហារដ៏ធំមួយនៅសហរដ្ឋអាមេរិក ចាប់តាំងពីខែឧសភា ឆ្នាំ២០២២ នៅពេលដែលខ្មាន់កាំភ្លើងម្នាក់បានបាញ់សម្លាប់សិស្សចំនួន ១៩នាក់ និងគ្រូបង្រៀន២នាក់ នៅសាលារៀនមួយក្នុងទីក្រុងយូវ៉ែល (Uvalde) រដ្ឋតិចសាស់។ ការបាញ់ប្រហារដ៏ប្រល័យបំផុតនៅក្នុងប្រវត្តិសាស្ត្ររដ្ឋកាលីហ្វ័រញ៉ាគឺក្នុងឆ្នាំ១៩៨៤ ដោយខ្មាន់កាំភ្លើងម្នាក់បានបាញ់សម្លាប់មនុស្សចំនួន ២១នាក់ នៅភោជនីយដ្ឋាន McDonald’s ក្នុងខណ្ឌសាន ស៊ីដ្រូ (San Ysidro) ក្បែរទីក្រុងសាន ឌីហ្គោ (San Diego)៕
