នាយករដ្ឋមន្ដ្រីថ្មីនៃប្រទេសនូវែលសេឡង់ ដែលនឹងស្បថចូលកាន់តំណែងឆាប់ៗនេះ លោក គ្រីស ហីបឃីន (Chris Hipkins) បាននិយាយនៅថ្ងៃចន្ទនេះថា រដ្ឋាភិបាលរបស់លោកនឹងកំណត់អាទិភាពឡើងវិញឱ្យបានឆាប់ និងពិចារណាថាតើគោលនយោបាយបច្ចុប្បន្ន ចាំបាច់ត្រូវកាត់បន្ថយឬយ៉ាងណា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៣ ខែមករា ឆ្នាំ២០២៣នេះ។
លោក Hipkins បានបង្ហាញខ្លួនជាសាធារណៈនៅថ្ងៃចន្ទនេះ នៅលើប្រព័ន្ធផ្សព្វផ្សាយមួយចំនួនរបស់នូវែលសេឡង់ បន្ទាប់ពីលោកត្រូវបានជ្រើសរើស កាលពីថ្ងៃអាទិត្យ ដើម្បីជំនួសលោកស្រី ចាស៊ីនដា អាឌើន (Jacinda Ardern) ជាប្រធានគណបក្សការងារ ដែលលោកនឹងក្លាយជានាយករដ្ឋមន្ត្រីថ្មីរបស់ប្រទេសនេះ។
លោក Hipkins បានប្រាប់ទូរទស្សន៍ TVNZ’s Breakfast ថា រដ្ឋាភិបាលនឹងផ្តោតលើបញ្ហា
អតិផរណា ហើយនឹងពិនិត្យមើលឡើងវិញនូវគោលនយោបាយផ្សេងទៀត។
លោក Hipkins មានប្រសាសន៍ថា៖ «យើងនឹងពិនិត្យមើលបញ្ហាទាំងអស់នោះឱ្យបានឆាប់។ ក្នុងរយៈពេលពីរបីសប្តាហ៍ខាងមុខ អ្នកនឹងឃើញពីភាពច្បាស់លាស់អំពីការកំណត់អាទិភាពឡើងវិញ»។
លោកបន្តថា៖ «ខ្ញុំពិតជាមានសុទិដ្ឋិនិយម ដែលមានការគាំទ្រយ៉ាងច្រើន ហើយខ្ញុំគិតថា ប្រទេសនូវែលសេឡង់កំពុងផ្តល់ឱ្យខ្ញុំនូវការវិនិច្ឆយប្រកបដោយយុត្តិធម៌»។
លោក Hipkins នឹងស្បថចូលកាន់តំណែងជានាយករដ្ឋមន្ត្រីថ្មីរបស់ប្រទេសនូវែលសេឡង់ នៅថ្ងៃពុធនេះ បន្ទាប់ពីលោកស្រី ចាស៊ីនដា អាឌើន (Jacinda Ardern) បានលាលែងពីតំណែងជាផ្លូវការ។
សូមរម្លឹកថា លោកស្រី ចាស៊ីនដា អាឌើន (Jacinda Ardern) បានប្រកាសលាលែងពីតំណែងជានាយករដ្ឋមន្រ្តីនូវែលសេឡង់ កាលពីថ្ងៃទី១៩ ខែមករា ឆ្នាំ២០២៣ ដោយបាននិយាយថា លោកស្រីមិនអាចបន្តដឹកនាំប្រទេសតទៅទៀតឡើយ។
លោកស្រី ចាស៊ីនដា អាឌើន (Jacinda Ardern) បានថ្លែងថា វាគឺជាការតានតឹងមួយក្នុងរយៈពេល៥ឆ្នាំកន្លងមកនេះ ក្នុងនាមជានាយករដ្ឋមន្ត្រី ហើយវាគឺជារឿងចាំបាច់ដែលលោកស្រីត្រូវតែចុះចេញពីតំណែង ដើម្បីផ្ដល់ឱកាសឱ្យអ្នកដទៃដែលមានសមត្ថភាពជាងនេះ។
លោក គ្រីស ហីបឃីន (Chris Hipkins) នឹងក្លាយជានាយករដ្ឋមន្រ្តីទី៤១របស់ប្រទេសនូវែលសេឡង់។ លោកកើតថ្ងៃទី៥ ខែកញ្ញា ឆ្នាំ១៩៧៨ ក្នុងទីក្រុងវែលលីងតុន (Wellington)។ លោកបានចូលបម្រើការនៅក្នុងសភាក្នុងឆ្នាំ២០០៨ ហើយនៅឆ្នាំ២០២០ លោកបានក្លាយជារដ្ឋមន្ត្រីក្រសួងសុខាភិបាល ដែលដើរតួនាទីសំខាន់ក្នុងការប្រយុទ្ធប្រឆាំងនឹងជំងឺកូវីដ-១៩៕
