មន្ត្រីជាន់ខ្ពស់ក្រសួងយុត្តិធម៌ អះអាងថា ឆាប់ៗនេះ ក្រសួងនឹងអនុវត្តយន្តការដោះលែងទណ្ឌិតដែលអនុវត្តទោសជិតចប់តាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារ និងយន្តការមួយចំនួនទៀត។
កាលពីថ្ងៃម្សិលមិញ រដ្ឋមន្រ្តីក្រសួងយុត្តិធម៌ លោក កើត រិទ្ធ បានអនុញ្ញាតឱ្យលោកស្រី PAULINE TAMESIS ប្រធានអ្នកសម្របសម្រួលអង្គការសហប្រជាជាតិប្រចាំកម្ពុជា អមដោយតំណាងការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា (OHCHR) និងតំណាងអង្គការ UNICEF ចូលជួបពិភាក្សាការងារ ពាក់ព័ន្ធនឹងការដោះស្រាយភាពចង្អៀតណែនក្នុងពន្ធនាគារ ក្នុងក្របខណ្ឌនៃយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត និងបញ្ហាមួយចំនួនទៀត។ នេះបើតាមការផ្សព្វផ្សាយនៅលើទំព័រហ្វេសប៊ុករបស់ក្រសួងយុត្តិធម៌។
អ្នកនាំពាក្យក្រសួងយុត្តិធម៌ លោក គឹម សន្តិភាព បានប្រាប់ VOD នៅថ្ងៃសុក្រនេះថា ក្នុងជំនួបនោះ លោករដ្ឋមន្ត្រី កើត រិទ្ធ បានស្នើតំណាងអង្គការសហប្រជាជាតិ ជួយចូលរួមចំណែកស្តារនីតិសម្បទាអ្នកជាប់ឃុំ ដើម្បីឱ្យពួកគេមានជំនាញ អាចរកប្រាក់ចំណូលបាននៅពេលពួកគេត្រូវបានដោះលែង ដើម្បីបញ្ចៀសកុំឱ្យពួកគេត្រឡប់ចូលទៅពន្ធនាគារជាថ្មីឡើងវិញ ដោយសារតែប្រព្រឹត្តបទល្មើសជាថ្មីទៀត។
នៅពេលសួរថា តើតំណាងអង្គការសហប្រជាជាតិមានបានលើកពីជម្រើសអនុវត្តទោសសហគមន៍ ដើម្បីកាត់បន្ថយភាពចង្អៀតណែនក្នុងពន្ធនាគារឬទេ? លោកអះអាងថា ក្រសួងយុត្តិធម៌កំពុងសិក្សាពីលទ្ធភាពនេះ តែថាជំហានដំបូង ក្រសួង ត្រូវអនុវត្តយន្តការដែលមានស្រាប់សិន។
លោកថា៖ «ឆាប់ៗខាងមុខនេះ ក្រសួងយុត្តិធម៌នឹងរៀបចំយន្តការ ដែលគេហៅថាគណៈកម្មការមួយពាក់ព័ន្ធនឹងការដោះលែងមានលក្ខខណ្ឌ អាហ្នឹងជាច្បាប់អនុញ្ញាត! អ៊ីចឹងចំពោះទណ្ឌិតដែលប្រព្រឹត្តបទល្មើស ហើយដែលអនុវត្តទោសជិតចប់អីហ្នឹង យើងធ្វើទៅលើរូបភាពហ្នឹង! បន្ថែមពីលើអ្វីដែលយើងមានហើយ គឺបន្ធូរបន្ថយនិងលើកលែងទោស»។
លោកបានបន្តថា ក្រៅពីនេះ ក្រសួងកំពុងសិក្សាពីលទ្ធភាពដាក់ឱ្យអនុវត្តទោសសហគមន៍នៅតំបន់ណាមួយជាជំហានដំបូងផងដែរ ប៉ុន្តែលោកថា ត្រូវការពេល ដើម្បីបណ្តុះបណ្តាលធនធានមនុស្សសម្រាប់ពង្រាយតាមគោលដៅ រួមទាំងត្រូវពន្យល់ពលរដ្ឋឱ្យយល់ដឹង បញ្ចៀសការប្រើអំពើហិង្សាណាមួយលើជនត្រូវចោទដែលបានបញ្ជូនទៅអនុវត្តទោសសហគមន៍នេះ។
លោកថា៖ «យើងមានក្រុមការងារមួយកំពុងសិក្សាទៅលើបញ្ហានេះ ហើយបើដាក់ចេញ ក៏យើងដាក់ក្នុងតំបន់ណាមួយជាការសាកល្បងសិន ឥលូវមិនទាន់ដល់ជំហានសាកល្បងនៅឡើយទេ»។
យ៉ាងណា លោកបានគូសបញ្ជាក់ថា យុទ្ធនាការដោះស្រាយការកកស្ទះសំណុំរឿងរយៈពេល៣៦៥ថ្ងៃកន្លងទៅនេះ បានកាត់បន្ថយការហក់ឡើងចំនួនអ្នកជាប់ឃុំ។
បើតាមមន្ត្រីរូបនេះ យុទ្ធនាការកន្លងទៅ ត្រូវបានបិទបញ្ចប់ហើយ ជាលទ្ធផលទទួលបាន២៣សាលាដំបូងខេត្ត លើកឡែងតែសាលាដំបូងរាជធានីភ្នំពេញ និងសាលាដំបូងខេត្តព្រះសីហនុ នៅមិនទាន់បានបិទបញ្ចប់។ លោកបន្តថា តាមរយៈយុទ្ធនាការនោះ សំណុំរឿងចាស់ជាង៩៥ភាគរយ និងសំណុំរឿងថ្មី៧៥ភាគរយ ត្រូវបានដោះស្រាយបញ្ចប់។
វីអូឌី មិនទាន់អាចទាក់ទងតំណាងការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជាបាននៅឡើយទេ គិតត្រឹមថ្ងៃសុក្រនេះ។
លោក រ៉ុង វិជ្ជា ត្រូវជាក្មួយរបស់លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ដែលត្រូវបានចាប់ខ្លួនអំឡុងខែកក្កដា ឆ្នាំ២០២០នោះ មានប្រសាសន៍ថា តាមរយៈយន្តការរបស់ក្រសួងយុត្តិធម៌នេះ លោករំពឹងថា ឪពុកមារបស់លោក រួមទាំងអ្នកទោសមនសិការផ្សេងទៀត នឹងត្រូវបានដោះលែងឱ្យមានសេរីភាពវិញ ដោយសម្អាងថា អ្នកទាំងនោះមិនបានធ្វើអ្វីខុសដូចការចោទប្រកាន់ឡើយ។
លោកថា៖ «យើងនៅតែមានសង្ឃឹមថា បើតុលាការមានភាពយុត្តិធម៌នៅប្រទេសកម្ពុជាយើងហ្នឹង ត្រូវតែផ្តល់យុត្តិធម៌ឱ្យគាត់ទាំងអស់គ្នាមានសិទ្ធិសេរីភាពឡើងវិញ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត បានលើកឡើងថា យន្តការថ្មីរបស់ក្រសួងយុត្តិធម៌នេះ ដូចគ្នាទៅនឹងអ្វីដែលក្រុមអង្គការសង្គមស៊ីវិលធ្លាប់ស្នើកន្លងទៅ ដែលនោះគឺការឃុំខ្លួនបណ្តោះអាសន្នជាជម្រើសចុងក្រោយ ហើយត្រូវយកអាទិភាពសេរីភាពនៃជនជាប់ចោទជាធំ។
លោកថា៖ «ការដោះស្រាយអាភាពចង្អៀតណែនហ្នឹង យើងស្វាគមន៍! ក៏ប៉ុន្តែធ្វើឱ្យមានប្រសិទ្ធភាពដែលអាចអនុវត្តទៅបានហើយឆាប់ទៀត បើសិនជាគ្រាន់តែគម្រោង ហើយយូរទៀត អាហ្នឹងវានៅតែមិនអាចកាត់បន្ថយបាន ហើយវានៅតែជាហានិភ័យនៃការព្រួយបារម្ភខ្ពស់ នៅក្នុងអំឡុងនៃកូវីដរីករាលដាលទៅដល់ពន្ធនាគារមួយចំនួនហើយហ្នឹង។ អ៊ីចឹងយើងចង់បានឱ្យការអនុវត្តហ្នឹងឱ្យបានឆាប់»។
អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានថ្លែងកាលពីដើមសប្តាហ៍នេះថា អ្នកជាប់ឃុំសរុបនៅទូទាំងប្រទេសមានជិត៤០ ០០០នាក់។
ដោយឡែក អង្គការលើកលែងទោសអន្តរជាតិ (Amnesty International) កាលពីដើមឆ្នាំមុន បានបង្ហាញរបាយការណ៍មួយថា គិតត្រឹមខែមីនា ឆ្នាំ២០២០ អ្នកជាប់ឃុំនៅទូទាំងប្រទេសជិត៤០ ០០០នាក់ ខណៈពន្ធនាគាររបស់កម្ពុជាអាចដាក់អ្នកជាប់ឃុំបានប្រមាណ២៦ ០០០នាក់តែប៉ុណ្ណោះ។
អង្គការអន្តរជាតិនេះបញ្ជាក់ថា៖ «វិបត្តិនៃការចង្អៀតណែនក្នុងពន្ធនាគារនេះ កំពុងបង្កឱ្យមានការរំលោភបំពានយ៉ាងធ្ងន់ធ្ងរ និងលក្ខណៈជាប្រព័ន្ធ»៕
អត្ថបទទាក់ទង
- មន្រ្តីកម្ពុជារិះគន់ UN លើសំណើបញ្ចេញអត្តសញ្ញាណអ្នកឆ្លងកូវីដ-១៩ក្នុងពន្ធនាគារ
- អង្គការអន្តរជាតិ២ អំពាវនាវឱ្យដោះលែងអ្នកជាប់ឃុំខ្លះក្រោយជំងឺកូវីដ-១៩ឆ្លងចូលពន្ធនាគារ
- សង្គមស៊ីវិលបារម្ភថាឥទ្ធិពលនយោបាយនឹងធ្វើឱ្យការជំរុញប្រសិទ្ធភាពការកាត់ក្តីដោយយុត្តិធម៌ជួបបញ្ហា
- អ្នកទោសនយោបាយនិងអ្នកទោសមនសិការឆ្លងជំងឺកូវីដ-១៩នៅពន្ធនាគារព្រៃស